العشا أذن وأخيراً قررت هنزل انهارده عشان بجد نفسي اشوف ياسين .. يعني ليا اسبوعين مش بنزل وكده كده مش بعرف ابص عليه اساساً ف هنزل عادي عشان حساه هيزعل يعني هو عامل ال عليه وزيادة وبيحاول يراضيني وبيقرأ ف الصلاة من نفس الآيات ال بنزلها .. صليت العشا انا ومنه ونزلنا .. الحمد لله عشان الأيام دي وقت امتحانات ومفيش ناس كتير موجودة . ده غير زي ما قلت لسه حوار الكورونا موجود وبيزيد واحتمال نرجع لتأجيل الدراسة تاني .. ومفيش طلبه كتير موجودة .. فضلت واقفه انا ومنه ع باب السكن بتاعنا ومستنية ياسين يخرج من المسجد.. بس هو ليه اتأخر كل ده جوا !! الناس كلها مشت والشارع فاضي وتقريباً مفيش حد ف المسجد. يمكن مشي من قبل ما ننزل!! هستني لو عمو فتحي خرج وقفل الباب يبقي فعلاً مفيش حد جوا وياسين مشي 🙂
يدوب مكلمتش دقيقتين لقيت كرلوله خارج لوحده من المسجد الحمد لله إنه لسه موجود 😍 بس لحظة اي يسطا باصصلي كده ليه .. انا خفت وربنا !!
عشان تتخيلو المسجد طبيعي عندهم سلم بس مش طويلة يعني كام سِلمة كده . وهو نازل باصصلي كده 😠 ومكشر عن أنيابه وعضلات ايده مرفوعه كده وللحظة حسيت اني عملت حاجه غلط. ف بصيت عليه عشان ياخد باله من نفسه ومن نظرته المريبة دي . ف لقيته بيبصلي بنفس الطريقة وأكتر 😂🤦🏻♀️طول ما هو بينزل من ع السلم لغاية مانزل ع الأرض وهو عاملي كده 😠 فأنا قلت لمنه يلا بينا من هنا يبنتي عشان منتأخرش . قال يعني بعمل نفسي رايحة مكان . ومنه جنبي بتضحك 🙂 ومشيت خطوة كده لقيت كرلوله مشي أسرع مني وجه جنبي كده وبصلي وتنهد كده بسخرية وعملي كده ومش 😠😒هه!!
اسكت انا بقي؟!! لاااااء لا إرادياً لقيت نفسي بقول بصوت عالي وهو سمعني متأكدة عشان الشارع فاضي أصلاً . لقيتني بقول . يعني كده ؟ ماااشي مااااشي طب تمااام 🙂 منه ماشية جنبي هتموت من الضحك . وأنا متعصبة عليها وقولتلها.. بتضحكي ع اي انتي كمان وربنا اروح اتخانق معاه دلوقتي ؟ بيبصلي كده ليه ده هو عبيط!!؟ وربنا خفت بيشمر كمه وباصصلي بعصبية.افتكرته هيديني بوكس فوشي . بس أنا عملت اي؟ لاء كمان بيمشي بسرعه ويجي جنبي ويبصلي ويعملي هه!!؟ ماااااشي ي كرلوله انا أصلا غلطانه .. عليا النعمة أنا غلطانة إنك مهونتش عليا ونزلت عشان متزعلش .. وسبت حالي مالي ومذاكرتي ونزلت ف عز البرد ده منه:😂😂 اهدي يسطااا خلااص مشي وراح السكن بتاعه اهدي العصبية مش كويسة عليكي . أشرقت: منه اسكتي عشان انا دلوقتي مش طايقة وشي أصلاً.. وربنا ماشي ي ياسين وشوف مين بقي ينزلك تاني ولا مين يفضل يكتبلك بوستس عميقة باللغة العربية الفصحي ويقولك لا تحزن يا صديقي وهون عليك وكلام حلو كده عشان أواسيك ف حزنك وشوف مين يفضل مستنيك ف صلاة الفجر والجو تلج وبرضو بقف أستناك لغاية ما تمشي عشان متبقاش حزين ووحيد وانت أصلاً بتبصلي كده وتسيبني وتمشي ولا كأن ليا اسبوعين مش بتشوفني . وعاملي فيها زعلان وبتكتب بوستس حزينه وانا أواسيك وانت تنكد علياا .. مااااشي كده تماام اوي . منه:😂😂😂 يبت خلاااص وربنا شكلك يفطس من الضحك وانتي متعصبة. كفاية بالله عليكي مش عايزة اضحك واحنا ف الشارع . أشرقت: بت انتي معندكيش دم وتقوليلي شكلي بيضحك؟ وربنا هاين عليا اروحله دلوقتي واتخانق معاه عشان ليه يبصلي كده يعني ! وانا بتكلم لقيت كرلوله لسه ف الشارع كان واقف عند أول شارع السكن بتاعه متخبي ورا الحيطة ومدخلش السكن . واول ما شافني بص عليا وفضل يضحك ع شكلي وطلع الفون بتاعه وكان عامل نفسه بيكلم حد . وهو أصلا حاطط الفون ع ودانه ومش بيتكلم !! 😂😂
أول ما شوفته بيضحك عملت نفسي مش متعصبة ولا حاجه ووقفت كلام وفجأه بقيت هادية وقلت ل منه تعالي نتمشي لغاية بوابة الجامعة.. وفعلاً اتمشينا لغاية آخر الشارع خالص وبصيت من بعيد لقيت كرلوله لسه واقف وكان مركز معايا وهو مبتسم كده ..
منه: وربنا انتو الاتنين مسخرة 😂😂 والله هموت من الضحك . انتو الانتين اطفال اوي اي ال حصل ده معلش !!؟ أشرقت:وأنا مالي مش هو ال قموصة وعامل فيها زعلان منه: حقه يزعل يسطاا ليه أسبوعين مش عارف يشوفك أكيد هيتعصب عليكي .. نظراته وهو متعصب كأنه بيقول دلوقتي ال افتكرتي يعني .. وبعدين يبنتي انتي عبيطية هو اي ال ماااشي ماااشي تماام كده . مفيش بينا مسافه أصلاً وأكيد سمعك وهيقول عليكي عبيطة وربنا 😂😂 أشرقت: يقول براحته ما هو ال عصبني الله! منه: بس شوفتي يسطا مرضيش يزعلك اهو ويمشي وفضل مستني يشوفك ع أول الشارع هو كان شكله زي الأطفال بالظبط وهو متخبي ورا الحيطة قال يعني مش هناخد بالنا 😂😂
اتمشينا شوية صغيرين ورجعنا السكن وطول الطريق بنحكي ع ال حصل وكنت مبسوطة جداً ..
داخل سكن ياسين وأدهم..
أدهم: اي يسطا كل ده بتصلي العشا ؟ انت بتصلي التروايح ولا اي😉 ياسين: مفيش ي باارد كنت قاعد لوحدي شوية .. أدهم: قاعد لوحدك برضو ولا قاعد ورا الحيطة ع أول الشارع وبتضحك مع نفسك!!؟ هو انت سخن يسطا أوديك للدكتور؟ ياسين:وانت شوفتني ازاي ؟أدهم:من البلكونه. بس سيبك شكلك كان مسخرة وانت ماسك الفون وبتعمل نفسك بترن ع حد وانت أصلاً مش بتتكلم ! يسطا بقيت غريب الأيام دي
قولي انت عيان!؟ ياسين:بس ي رخم انت مش عارف حاجه هو انا بكلم مين دنت حلوف متفهمش ف المشاعر والحاجات دي.. أدهم: فضفضلي كده يجدع اومال دنا صاحبك . جربني بس دنا كلي أحاسيس مرهفه انت متعرفش لسه🥺 . ياسين : 😂😂😂 طب اسمعني يسيدي .. ياسين:حكيت ل أدهم كل حاجه حصلت وإنه مضايق وخايف تكون أشرقت نسيتني عشان ليها أسبوعين بتتعمد تبعد عني وال أكدلي كده إني كنت بشوفها وأنا رايح الجيم ع الساعه 9 ونص بالليل كده وهي بتتمشي مع صاحبتها وكانت بتبقي مبسوطة وحتي بتبقي ماشية ف الشارع يدوب تلمحني تبص بعيد عني وبتتعامل عادي كأني مش موجود !!
أدهم: بص يسطا تحليلي للموضوع أولاً أنت عبيط اوي يسطا . ياسين: مش بقولك حلوف يلاه 😒 أدهم: اسمع مني بس يبنعمي يعني انت بتبصلها وانت مكشر عن أنيابك ليه! عشان تبينلها انك مضايق عشان مش بتشوفها .. ياسين:ما انت بتفهم اهو!! أدهم حط رجل ع رجل وقال طبعاً طبعاً دنا كلي أحاسيس يبنعمي 😎
ياسين: أدهم طب نتكلم جد بقي .. أدهم: قول يخويا أنا كلي آذان صاغية .. ياسين: يبني انت مش بتبطل هزار أبداً اتكلم جد مرة ف حياتك بقي! أدهم: خلاص يسطاا اهو سكت اتفضل احكي ي كبير 😁
ياسين: دلوقتي السنة بتخلص وهنتخرج خلاص وكل واحد فينا هيرجع بلده وأنا مش عايز أمشي من غيرها أنا بحبها ومش هقدر أستحمل بُعدها عني من تاني بعد اجازة كورونا الطويلة الكئيبة دي .. أنا مش بكون مبسوط غير لما بشوفها ومتأكد إنه هي كمان زيي عشان القلوب بتحس ببعضها وأصدق شعور شعور القلوب . من ناحية مش عايز أسيبها ومن ناحية أختي ال لسه هتتجوز دي ولسه مصاريف جهازها كتييير . الحمد لله إني جوزت واحدة من إخواتي البنات وفاضل واحدة .. بس أنا لسه شقتي مش جاهزة ومعملتش فيها أي حاجه وغير كده لسه مخلصتش جهاز أختي . أنا وعدت أمي من بعد وفاة أبويا إنه أخواتي البنات أنا متكلف بكل مصاريفهم لغاية ما يبقو ف بيت رجالتهم .. بس لسه كل ده كتير عليا مش أقل من سنتين ..ده الحمد لله إنه مفيش جيش ليا.. وخايف اتقدم لأهلها أقولهم اي! متخرج من هندسة ومش لاقي شغل وبشتغل ف أي حاجه متاحة ولسه هجوز أختي الأول !!؟ أكيد هترفض! ياااارب قولي أعمل اي ...
أدهم: بص يصحبي مش هقولك كده مجاملة .. انت بجد أنضف بني آدم عدي عليا فحياتي ومن واحنا عيال انت راجل ومتحمل مصاريف اهل بيتك ومش مهتم بنفسك واخواتك و والدتك عندك أهم حاجه . وعلشان طول حياتك راضيهم ربنا هيراضيك . وعشان انت واخد الموضوع جد وعايز البنت دي كزوجة وبتسعي ل ده ف ربنا مش هيضيع سعيك ده أبداً وإن شاء الله ربنا ييسر الأمور انت بس حاول دايماً تبينلها إنك مش مجرد حد معجب وخلاص وانك بتفكر بجدية ف الموضوع بس لسه الوقت مش مساعدك وإن شاء الله ربنا هيقف معاك يا صاحبي ونفرح بيك قريب كده . ياسين: يااارب يصحبي ياارب 💙
أدهم: قولي بقي كنت واقف ف الشارع كل ده بتعمل اي برضو 😁😁 ياسين: تصدق بالله قتلك حلال يلاه 😒🔪🔪
