منه: والله يبنتي انتي مجنونه وهتجننيني معاكي 😂🤦🏻♀️ يعني الراجل طول بعرض ما شاء الله وحافظ قرآن وفي الآخر يبقي اسمه كرلوله !؟
أشرقت: ايوة كرلوله . وانا مالي مكنتش اعرف اسمه وانا مبعرفش انادي حد غير بالاسم الاول ال عرفته عنه . خلاص هو اسمه كرلوله مش ياسين .. منه: وماله كرلوله حلو ومميز . أشرقت : حصل : عمرك شوفتي حد ف العالم اسمه كرلوله . مش هتلاقي اصلا . منه: مفيش طبعا ي مجنونه 😂 قوليلي بقي حصل اي وانتو ف الماركت .. أشرقت: بصي ي ستي اول ما كرلوله دخل وهو بيقول السلام عليكم وكان مبتسم كده وموجه نظره عليا كأنه بيكلمني انا مش عموفتحي خااالص . كنت هموت وافضل باصة عليه نفسي اعرف ملامحه عامله ازاي بس كالعادة يعني اتكسفت ومعرفتش اشوفه خالص .. منه: اوعي كمان ابتسملك لاء بقي احنا اطورنا ولا اي. أشرقت : اسكتي وربنا كنت هزعقله . منه: ليه كده ي دبوشة هانم عمل ايه ؟ أشرقت : عموفتحي بيقوله قال ايه عاش من شافك وهو كان لسه معاه ف الصلاة ولا كأنهم وقفوا واتكلمو مع بعض .. منه: عموفتحي ده فظيع والله 😂😂 . أشرقت: كرلوله بقي قال جيت اسلم عليك وماشي ع طول وهو ف ايده الكرسي وهيقعد ! تحسي انه عبيط يبني منين هتمشي ع طول ومنيين هتقعد هل انت أهبل ! منه: 😂😂 خليه يقعد براحته بقي .. فين الأكشن ليه كنتي هتزعقيله ! أشرقت : عشان هو مقعدش ع طول فضل يلف حواليا مرة يمين ومرة شمال ومرة يقف ورايا وانا كنت متوترة جدا ومش عارفه افضل مكاني ولا اروح حتة تانية وخايفة اتحرك كده ولا كده اخبط فيه وهو طويل كده ومش عارفه اتحرك من مكاني .. منه:😂😂 يعيني كان نفسي اشوفك وانتي كده تلاقيه كان بيقيس طولك معاه . وانتي يعيني قصيره كده . أشرقت : بس يبت بلا قصيرة .. اسمها متوسطة الطول اسمها قمر كده يعني . منه: متوسطة طول مين يحبيبتي دنتي تلاقيكي مش واصلة لكتفه أصلاً . أشرقت : معرفش بصراحه مركزتش عشان كنت متفاجئة من ال حصل ... صحيح هي شيرين فين ؟ منه : نزلت مع أصحابها .. أشرقت : طب كويس اهو تفك ع نفسها شوية .. منه: فعلاً هي بتحب أصحابها دول وبتنبسط معاهم .. أشرقت : قومي يسطا شوفيلنا حاجه ناكلها . منه: وه ؟ اومال مين اللي بيقولي مش هاكل بالليل بطني بتوجعني ! أشرقت : الله جعانه ايه عادي . منه: حقك يسطا هي الفرحة بتجوع كده . أشرقت : 😂😂 حصل حصل ..
عدت الأيام وكانت فترة الامتحانات دي أحلي فترة امتحانات ف حياتي رغم كل حاجه صعبة مريت بيها منعتني من المحاضرات .. بس كنت بذاكر كويس جداً وكنت لما بتعب باخد بريك كنت بسمع فيها ريكورد قرآن بصوت كرلوله وارجع اذاكر تاني. صوته كان بيديني أمل كبير.. أحلي احساس كان لما تروح عليا نومه وأصحي ع صلاة الفجر بصوته . والله مكنتش بسمع المنبه خالص من التعب ولا حتي صوت اللي بيأذن ولا اقامة الصلاة . كنت بفتح عيني اول ما أسمع كرلوله بيقول الله أكبر وهيبدأ الصلاة. مكنتش عارفه ازاي كده صوته بس اللي بيصحيني. ..
في مرة كنت راجعة من الامتحان وخلاص هموت وانام بس حاولت استني لبعد صلاة العشاء عشان يعني انام بدري واصحي بدري . بس مقدرتش خالص يدوب صليت المغرب من هنام ونمت ع طول بس ظبطت المنبه ع آذان العشاء هي كلها ساعه بالظبط بين المغرب والعشاء. كالعادة مصحتش غير ع صوت كرلولة وهو بيقول الله أكبر..
منه: يسطااا مش نازلة انهارده ولا ايه! أشرقت : لاء مش قادرة مش شايفة منظري لسه صاحية من النوم وشكلي بايظ . منه: وربنا قمر صاحي من النوم قومي حرام عليكي كرلولة اهو رايح عندالماركت . أشرقت: ايه ده هو رايح ليه وعموفتحي أصلا مش ف الماركت ومفيش غير الولد ال شغال معاه؟ منه: يسطا هيروح عشان مين يعني غيرك . والله انا أكتر واحدة مستغربة من الللي بيعمله ده عمره ما كان يقعد مع عموفتحي خالص . كان من المسجد ع سكنه ع طول. أشرقت: يعم لاء مش هنزل انا دايخة وبردانه وأصلاً مفلسه هروح أشتري ايه يعني ! منه: يبت قومي حرام عليكي حسي بيه شوية .. خدي يستي اهي الفلوس اشتري ال عاوزاه . أشرقت: بس .. منه: انتي لسه هتبسبسي قومي البسي .. أشرقت : ده ع بال ما اقوم وألبس هيكون مشي . منه:لا متخافيش مش هيمشي غير لما يشوفك .. انتي مش بتتأخري ف اللبس يلا قومي ..
لبست بسرعه ونزلت وفعلا عموفتحي مكنش موجود ف اترددت ادخل بصراحه بس كنت خلاص واقفة عند الماركت وكرلوله شافني ف هيبقي منظري عبيط لو رجعت ع طول.. كالعادة قولت السلام عليكم وهو اللي رد السلام بصوت عالي . كنت متلغبطة جدا ومتوترة بغباء ومش عارفة هشتري ايه اصلا.. كنت حاساه مركز معايا بس محاولتش ابص عليه عشان متوترش أكتر لو كان فعلا نظره عليا .. لكن بالصدفة وانا بشوف هشتري ايه لقيته فعلاُ كان باصصلي ..عملت نفسي مش واخدة بالي واشتريت اي حاجه وخلاص واقفة بحاسب وهنا بقي لغبطة الدنيا كلها اتجمعت عندي .. انا حاسة كرلوله باصصلي ومركز اوي معايا . حاولت اقنع نفسي انه باصص ع حاجه ورايا بس لاء انا متأكده من جوايا انه باصص عليا.. هموت من التوتر وكرلوله بجد اول مره اشوفه كده .. كل المدة دي وهو مركز معايا. حوالي ٣٠ ثانيه كده وهو محركش نظره من عليا .. ابو شكلك ي منه كان لازم يعني تديني فلوس لسه عايزة تتفك . وانت كمان يعم انت حاسبلي بسرعه انا عايزة امشي ... الولد ال ف الماركت كان بيحاسب ع الحاجه وبيفك الفلوس والغريبة انه كان بيكلم كرلوله بس هو ولا معاه ولا بيرد عليه أصلاً . اتوترت أكتر وخفت الدبش ال جوايا يتكلم . لقيتني فجأة بصوت عالي بقول احم احم .. حسيته اتخض كده فجأة كأنه كان سرحان وبسرعة البرق حط ايده ع وشه وغمض عينه بسرعه وتنهد بصوت عالي وقال أستغفر الله العظيم .. وبعدها مسك الفون بتاعه وعمل نفسه بيعمل حاجه فيه .. أخيراً بقي ي عم كرلولة بصيت ع حاجه تاني .. والحمد لله أخيراً خدت الباقي ومشيت بسرعه ..
