نزلت انا ومنه نتمشي . اكتر حاجه بحب اعملها انا ومنه اننا نتمشي ف الشارع مع بعض ونشرب عصير قصب ونحط الهاندفري ونسمع قرآن واحنا ماشيين . واكيد بنحكي مع بعض كمان ف الطريق .. واحنا راجعين السكن في الطريق قبل السكن بكام شارع كده .. وانا ماشية حاطه السماعة وباصة ف الفون فمش مركزة اوي ف الطريق كنت ثانية واحدة وهخبط ف واحد ف الشارع بس منه شدتني. منه : أشرقت خلي بالك .. انا اتوترت جدا من الولد ال كنت هخبط فيه ده لحظه واحدة وكنت هبقي ف حضنه خلاص . فزعقت فيه معرفش ليه . مش تفتح يعم انت وانت ماشي . وسبته ومشيت من غير م استني يرد .. منه بضحك: هههههه يبنتي انتي عبيطة ولا في حاجه ف دماغك مين اللي يفتح وهو ماشي . اللي ماشي ف حاله ولا اللي ماسك الفون وحاطط السماعة ولا شايف ولا سامع حد !!؟ . أشرقت : الله مخلاص يستي انا اتوترت جدا لحظة وهبقي ف حضنه وهو طويل كده بعدين اه هو اللي يفتح مش هو شايفني مش مركزة يركز هو بقي ويبص قدامه . منه: يلهوي هتشليني اه قلبي .. أشرقت : سلامتك ي جبيبتي امشي وانتي ساكتة بقي .... منه: بقولك عارفة اللي كنت هتخبطي فيه ده مين ؟ أشرقت : واعرف من فين حضرتك حد قالك اني جني المصباح وانا معرفش ! منه : اقولك انا ده مين ده الشيخ اللي مش بتحبي صوته . أشرقت باستغراب : وانتي عرفتيه ازاي انه هو ! منه :يبنتي انا ليا سنة ونص ف السكن نسيتي ولا ايه . أشرقت اه صح. طب يلا بقي عشان فاضل نص ساعة والسكن يقفل ولسه عايزين نجيب خضار .. منه: تماام الخضار هنجيبه من عند عمو فتحي اللي جنب السكن . أشرقت : اشطا..
بعد شوية .. أشرقت: السلام عليكم ورحمة الله وبركاته عمو فتحي : وعليكم السلام ازيك ي بنتي. أشرقت: الحمد لله بخير ي عمو حضرتك عامل اي . عمو فتحي :الحمد لله . ازيك ي بنتي . منه: الحمد لله ي عمو . أشرقت : لو سمحت ي عمو عايزة كيلو طماطم وكيلو بطاطس. عمو فتحي: بس كده احلي خضار ليكي اهو يبنتي . أشرقت : تسلم ي عمو . عمو فتحي : ربنا يوفقكم يارب ف الكلية. اهم حاجه الصلاة يابنات واوعوا تسيبوا صلاة الفجر دي فيها كل البركة . أشرقت : الحمد لله ي عمو بنصحي نصلي الفجر ادعيلنا ربنا يهدينا ويصلح حالنا . عمو فتحي: يارب يبنتي ربنا يصلح حالكم ويهديكم ويكتر من أمثالكم. أشرقت ومنه: اللهم آمين. عمو فتحي: بما انكم بتصحوا الفجر ايه رأيكم ف صوت الشيخ اللي بيصلي الفجر ف المسجد عندي. أشرقت : هااا ! احم صوته حلو اللهم بارك . منه: صوته جميل ما شاء الله بنصحي ع صوته اصلاً. عمو فتحي : فعلا صوته جميل وفيه خشوع كبير . أشرقت: اه فعلا ربنا يبارك ف صوته ويزيده .. عن اذنك بقي ي عمو عشان معاد السكن . عمو فتحي : اتفضلوا يبنتي .
في السكن ... منه: الله الله هو مين ده اللي صوته حلو اللهم بارك . اومال اي اللي صوته مش حلو واقفلي الشباك مش عايزه اسمعه وصوته مخيف. أشرقت : وانا لسه عند رأيي ع فكره. يعني عايزاني اقول للراجل ايه اقوله لا صوته وحش اكيد لاء يعني . منه : امممم وهو عمو فتحي واضح عليه انه بيعزك اوي كمان . أشرقت : ايوه فعلاً لاحظت كده . يمكن عشان دايما بشتري منه هو بس ودايما بقوله السلام عليكم لو معديه من جنبه . منه: ممكن برضه ده هو مش بيحب معظم البنات اللي في سكنا وكذا مرة يكلم صاحب السكن ع البنات اللي بتبص من البلكونه بنص كم وشعرها .. أشرقت:والله مغلطش عشان بجد اللي بيعملوه البنات مستفز اوي يعني . ربنا يهديهم ويهدينا ملناش دعوة مش هنتكلم ع حد هما عارفين ايه الصح وايه الغلط. منه: صح هقوم اغير انا واحضر عشا. أشرقت : اشطا يسطا وانا جاية اعمل معاكي . منه: ايه ده انتي قولتي يسطا ولا انا بيتهيألي !!؟ أشرقت : ههههههههه من عاشر القوم أربعين يوم صار منهم . وحضرتك ٢٤ ساعة بتقوليها لزقت ف دماغي وحسيتها حلوة . منه : والنبي انتي اللي حلوة يقمر انتي . أشرقت : خلاص بقي يبت بتكسف في اي قومي يلا عشان نعمل أكل ...
