الإجازة والتأجيل من تاني .. كل حاجه بتتعاد من الأول وكل ذكري وحشة كانت ف أول مرة لتأجيل الدراسة بترجع تاني .. يمكن المرة دي أصعب بتكتيير كمان . حاليا عدي شهر كامل وأنا بعيدة عن كرلوله .. الشهر عدي كأنه سنه . حتي مكنش بينزل غير بوستات حزينه كل فين وفين .. أنا مبقتش عارفه أواسيه ولا أواسي نفسي .. كنت كل ما بحس بخنقة أقوم أصلي وأشكي لربنا كل همي وأعيط .. ال واجعني أكتر انه دي خلاص يمكن تكون آخر سنة هشوف ياسين فيها . والوضع ال مش قادرة أعيش فيه لمدة شهر ده . هيبقي هو هو نفس وضعي لسنيين ف البُعد عنه !! شهر 1 المفروض ده شهر امتحانات الترم الأول وأكيد أول ما هنرجع للدراسة هنمتحن ع طول .. مش عارفه أذاكر معنديش طاقة ولا عارفه استوعب حاجه من المنهج ال ملحقناش نعرف حاجه فيه ده 🙂 طول الوقت قاعدة ف أوضتي وحيدة والحزن كله ف ملامحي وكل التعب والهم ف قلبي وكأنه كل جبال العالم فوق قلبي .. ندي أختي اتغيرت معايا للأفضل وواضح ده ف تصرفاتها . توقتعتها لما نرجع البيت هتخبي حبها ليا قدام مامتها بس بالعكس . حبها بيزيد وبيبان ف أفعالها معايا . وبتدافع عني قصاد مامتها لو اتخانقت معايا زي ما دايماً بتعمل . وبتتخانق مع ندي كمان ومرات كتير بسمعها من أوضتي بتتكلم عني مع ندي وبتحاول تفهم منها هي ليه بتحبني كده وانه مينفعش تحبني . وكل مرة ندي بترد عليها بانه ندمت ع ال كانت بتعمله فيا وحرام وكما تدين تدان وكده ..
محمد أخويا الصغنن ده قمر وبيهون عليا كتيييير بحبه جدااا . بكون قاعدة ف أوضتي مخنوقة وبعيط ألاقي محمد بيخبط عليا ويقولي هنام عندك انهارده . بياخد قلبي لما يقولي شغلي قرآن بصوت الشيخ الحلو ال عندك . أنا عشان مش بعرف أنام غير وأنا بسمع قرآن بصوت ياسين فبشغل الفون جنبي طول الليل بصوته . مكنتش أعرف انه محمد ال عنده ١٢ سنه هيلاحظ ده وكمان يحفظ صوت ياسين وبيحب صوته جداااا. بقي زيي ميعرفش ينام غير ع صوته ولو كنت مشغلة قرآن بصوت شيخ تاني بلاقيه يقولي لا هاتي صوت الشيخ التاني الحلو. ده مش حلو زيه . سبحان الله حتي الأطفال بتحب ياسين من غير ما يشوفوه . هتحبه أكتر بكتييير ي محمد لو شوفته ان شاء الله ربنا يجمعني بيه وتشوفه ..
دخلت ع صفحة ياسين ع الفيس أشوفه كاتب اي لقيت مفيش جديد من اول امبارح كان كاتب :
لازم نفهم انه الدنيا دار بلاء . مش لازم تبقي سعيد ومبسوط طول الوقت . لا سعادة فيها دائمة ولا حزن فيها دائم . بالعكس يمكن حزنك فيها أكتر بكتير .. الدنيا مش لينا .. مكانا مش هنا . مكانا هناك ف الآخرة ونسأل الله أن يهدينا جميعاً ويُصلح أحوالنا ويجعلنا من أهل الجنة . فواللهِ لهو الخسران المبين إن شقينا هُنا وهُناك . انت جاي الدنيا دي عشان تبني لك مكان ف الجنة . خلينا متفيق إنه مهما عملنا فاحنا عبادتنا ناقصة . ناقصة كتيييير الحقيقة. ولو كان دخول الجنة بالعمل فاحنا مش هنلحق حتي نشوفها من بعيد .. الواحد مننا لو صلي ركعتين قيام بقصار السور يعمل فيها شيخ واهو يارب بقيم الليل اغنيني بقي وارزقني وحققلي كل ال بتمناه وبطلبه منك .. صلاتك دي تيجي اي قصاد النبي صلي الله عليه وسلم وهو مريض ف صلي بالسبع الطوال . تخيل ! مريض ومش قادر يقوم فصلي القيام بالسبع الطوال !! الواحد منا لو قرأ سورة البقرة بشكل يومي بيحس انها تقيلة ع قلبه ..
فانت هنا ف الدنيا عشان تضمن لك مكان ف الجنة بشوية ابتلاءات بقي ع حزن ع وحدة علي اكتئاب . بس فيه شرط انك تكون راضي بكل ابتلاء مريت بيه حتي لو كان صعب وفوق طاقتك . خليك واثق انه لا يكلف الله نفسا إلا وسعها.. فرق كبير بين انك تكون صابر ع الابتلاء وكلك يقين بأن الفرج قريب من الله برغم كل الظروف من حولك توحي بالعكس . وبين إنك تكون صابر ومش راضي ال هو اهو صابر لما اشوف آخرتها .. تأدب مع الله في ابتلاءك . لما ربنا يقضي بشئ لازم تسلم أمرك لله حتي لو ظاهره كان شر .. نسأل الله أن يرزقنا الرضي بقضاءه خيره وشره . .
عندك حق يا ياسين في كل كلمة قولتها .. مكانا مش هنا .. مكانا ف الآخرة وان شاء الله يبقي الجنة معاك يارب .. فعلاً الحياة كلها ابتلاءات ولازم نصبر عليها ونشكر الله في السراء والضراء . فإن أعطانا سبحانه فله الحمد وإن منع عنا ما نتمني فهو قمة العطاء .. رب الخير لا يأتي إلا بالخير ولكن تجهل بصيرتنا تدابيره سبحانه . فاللهم اقدر لنا الخير حيثُ كان ثم ارضنا به ..
أنا بحب جدااا ابتهال النفس تشكو للشيخ النقشبندي .. أقرب صوت مبتهل لقلبي هو النقشبندي بحب أسمعه بالليل جدا معرفش اشمعنا الليل . يمكن عشان فيه هدوء وسكينة مناسبين للابتهالات .. من حوالي عشر أيام كده نشرت الابتهال ده بصوت النقشبندي .. معرفش ليه بسمعه ف دماغي بصوت ياسين ! اشمعنا يعني . ده هو ولا مرة نشر ابتهالات بصوته !! يمكن عشان نفسي أسمعه بصوته فبتخيله بصوته .. بعد يومين بالظبط اتصدمت من الفرحة أول ما فتحت بروفايل ياسين لقيته منزل ابتهال النفسي تشكو بصوته .. يا الله ع جمال صوته . هو ال أنا بسمعه ده حقيقي يعني ولا أنا بيتهيألي ! معني كده هو أكييييد شاف البوست بتاعي .. يا الله شكراً إنك طمنت قلبي . مش قادرة أصدق والله . حاسة قلبي كأنه فراشة طايرة وسط الورد من الفرحة ..
سبحان مغير الأحوال . من كام يوم كنت مخنوقة جداً وبعيط بغباء وكل الأحزان اتجمعت مرة واحدة . كانت الساعه ٢ بالليل .. بعد ما عيطت قومت عشان أتوضي وأصلي قيام عشان قلبي يرتاح .. معرفش ليه وأنا بتوضي عيطت تاني وقلت يارب يارب اديني أي رد فعل من ياسين يبين اذا كان كل ده حقيقي ولا بيتهيألي ! يارب سبحانك قلت (ادعوني أستجب لكم) اللهم إني دعوتك كما أمرتني فاستجب لي كما وعدتني .. يارب سبحانك إذا وعدت فإن وعدك الحق .. يارب اربط علي قلبي واجعل أري حقيقة الأشياء من حولي . يارب مش هزعل والله إذا كان كل حاجه محصلتش بجد ولا هزعل لو أيقنت انه ياسين ميعرفنيش ولا بيفكر فيا وإن قلبي خدعني .. الحقيقة أفضل من إني أعيش ف وهم وأبني عليه حاجات كتير تاني وبعدين أتصدم .. يارب وضحلي الحقيقة وأنا والله راضية بالنتيجة سواء سلبية أو ايجابية .. واقدر لي الخير حيث كان ثم ارضني به ياالله
..
روحت أصلي . أنا عادة بحب أصلي القيام من المصحف مش من ال حافظاه كنوع من التغيير يعني . هو عامةً عادي صلاة القيام أو التراويح من المصحف أما الصلوات المفروضة مينفعش نصلي واحنا ماسكين المصحف ..
المهم عندي عادة تاني وهي اني بعتبر صلاة القيام دي بخاطب فيها الله عز وجل وبحب أسمع رسايله ليا وعادةً بفتح المصحف بشكل عشوائي وبصلي الركعة الأولي بالوجه ال ع اليمين والركعة التانية بالوجه ال ع الشمال .. وبقرأ بتدبر وخشوع وبحاول أفهم رسايل ربنا في كلامه .. كنت خلاص نسيت دموعي قبل الصلاة وحسيت براحه نفسية مش طبيعية . لكن حسيت بقشعريرة فجسمي كله أول ما فتحت المصحف وبقرأ منه كانت سورة غافر الصفحة ٤٧٣ و ٤٧٤ .
الوجه ال علي اليمين كان من ضمن آياته .
(فَٱصۡبِرۡ إِنَّ وَعۡدَ ٱللَّهِ حَقّٞ وَٱسۡتَغۡفِرۡ لِذَنۢبِكَ وَسَبِّحۡ بِحَمۡدِ رَبِّكَ بِٱلۡعَشِيِّ وَٱلۡإِبۡكَٰرِ) (٥٥).
والوجه التاني كان من ضمن آياته .
(وَقَالَ رَبُّكُمُ ٱدۡعُونِيٓ أَسۡتَجِبۡ لَكُمۡۚ ) .
يا الله مش معقول نفس الآيات ال كنت بخاطب ربنا بيها وبدعي بيها 😢 حسيت برودة ف جسمي كله ومتخيلة ربنا قدامي وهو بيقولي إني هُنا أسمع وأري .. وكأنه سبحانه بيقولي سامع حديثك ومناجاتك انتي مش لوحدك .. حسيت بجهلي لما كنت بشك فنفسي انه محدش حاسس بيا واني هفضل دايماً في حزني لوحدي .. سامحني يا الله ع جهلي . واللهِ شعور عظيم لما يجيلك الرد ع مناجاتك لله فنفس الوقت . حتي لو مش هتنال ما تطلب . فكرة ان ربنا سامعك وأعلم بحالك منك ده لوحده شعور عظيم . نعمَ الرب أنت وبئس العباد أنا .. برغم إنه زمان لما كنت بحفظ قرءان كنت حافظة سورة غافر بس تقريباً دي أول مرة آخد بالي من الآيتين دول فيها .. دلوقتي بس أيقنت إنه مفيش حاجه صدفة . مكنش صدفة لما كنت بدعي ربنا بنفس الآيتين دول وفنفس الوقت أفتح المصحف ألاقيهم قدامي مكنتش صدفة والله .. يُدبر الأمر ..💙
وأكيد برضو مش صدفة بعد ما أدعي ربنا يبين لي حقيقة شعوري إنه ياسين ينزل ابتهال النفس تشكو بعد ما أنا نزلته 🤗 الحمد لله علي لطف الله💙 .. كنت بحب النفس تشكو من النقشبندي ومتوقعتش أحبه بصوت شخص تاني . ولكن بصوت ياسين أجمل بكتييير والله وتقريباً هسمعه ١٠٠ مرة ف اليوم 😅 وخلاص بقي يا ست أشرقت يكش ترتاحي بعدين ومش عايزة أسمع صوت جوا عقلك البلوظة ده إنه كل حاجه صدفة .. اسكتي بقي خليني أستمتع بالجمال ده ..
بتحبو الابتهالات بصوت النقشبندي؟ واي أكتر ابتهال بتسمعوه ؟!
احم احم .. بعتذر جداً جداً ع الغياب الفترة دي كلها كان غصب عني والله . وبعتذر من كل شخص كتب كومنت فين باقي الرواية ومكنتش برد .. مش قصدي أطنش كلامكم والله بس مكنش عندي سبب واضح ليه مش بكتب!!؟ .. ان شاء الله رجعت خلاص 🤗💙
