أدهم: اقولك انا ليه...راجع كده الشات بتاعتك ال بعتها لصاحبتها لما كلمتك عنها شوف ردك كده وانت هتعرف هي ليه بتبعد وتقرب ف نفس الوقت ومش واخده قرار.. ياسين: أدهم مش رايق ل ألغازك دي دلوقتي ال فيا مكفيني قول دوغري كده .. أدهم: خلاص يعم هقول اهو .. عشان حضرتك عبيط . يعني بتقولها مش هكلم حد ولا اتعرف ع حد دلوقتي والظروف ال انا فيها تمنعني اعمل خطوة زي دي . ومرة تقولها معرفش صاحبتك دي ولا شوفتها مخدتش بالي ليها ومرة ترجع تقول اه شوفتها وبصتلها فعلاً وكده .. وهكلم عم فتحي عشان ميتكررش الموضوع ده تاني .. عاوزها ترد عليك بايه يعني غير بالكلام ال قالته ! البنت عندها حق ع فكرة .. ياسين : انا مكنش قصدي ال قولته والله انا اتلغبطت واتفاجئت أصلاً اول ما لقيت حد بيكلمني عنها متوقعتش حد ملاحظ حاجه وتوقعت كل مشاعري دي من طرف واحد . ومعرفتش ارتب كلامي اول مرة اتحط ف موقف زي ده انا مكنتش عامل حسابي ع أي مشاعر دلوقتي غير بعد التخرج ولما الاقي شغل مناسب ليا ان شاء الله .. وبعدين هي المفروض تفهمني انا لو رافضها ليه هخلي عم فتحي يكلمها قدامي. وليه هروح السوبرماركت وهي موجودة فيه ؟ وليه هبرر واقول مش هاخد خطوة زي دي دلوقتي ومش هتكلم ف الموضوع ده تاني غير لو كنت ناوي فعلاً ع جواز . هي لو متهمنيش كنت قولتلها مكنتش واخد بالي من ال عمله عم فتحي وآسف ع ال حصل واكيد مش هيتكرر ده تاني ومكنتش قلت كل التفاصيل ال وضحتها ! أدهم: فعلاً بس هي يسطا متعرفش اسلوبك عشان تفهمك هي قدامها حاجه واضحة وخلاص مش هتجيب كلام من دماغها يعني عشان تزين بيه كلامك .. ياسين: صح .. بس هي أكيد بعدين فهمت ده لأنها بترد عليا ف البايو زي ما قولتلك . أدهم: اها أكيد بالذات بعد ال انت كتبتهولها وانا قفشتك .. بس انتو الاتنين يسطا مفيش عبط أكتر من كده .. ما بدل الفرهدة دي قولها ! ياسين: انت جاموسة يالاه دانت اكتر واحد عارف ظروفي .. أدهم امشي من قدامي دلوقتي عشان متعصبش عليك .. أدهم: خلااااص يسطااا سلام عليكم بقي اجيلك وقت تاني شكلك مجنون دلوقتي ...
أشرقت : عدي اسبوع وكان عادي جداً مفيش جديد بقيت انزل اي بوست يعجبني وبهزر مع اصحابي وماشية عادي بس الغريب ان كرلوله مكنش بيكتب اي حاجه ولا حتي بوست واحد .. مجاش ف بالي غير اكيد هو شاف البايو بتاعي وفهم اني مهتم بيه زي ما فهمت انه مهتم بيا وبحزني من البايو بتاعه . كان فاضل خلاص يومين ع رمضان كنت فرحانه وفنفس الوقت الحزن مالي قلبي .. فرحانه عشان جو رمضان والتراويح والقرآن بس للأسف اتمنعت صلاة التراويح بسبب فيروس كورونا .. يعني خلاص مفيش تراويح ف المسجد تاني . لا حول ولا قوة إلا بالله ياارب ارفع غضبك ومقتك عنا .. رمضان ده حاولت اخليه مختلف عن اي رمضان صحيح مفيش تراويح والوضع صعب لكن مازال هنصلي ف البيت .. كان نفسي ماما تبقي عايشة وأصلي بيها التراويح ف البيت مليش غيرها دلوقتي . بس هي أكيد ف مكان افضل من كنوز الدنيا كلها.. ياااه لو كنا ف السكن دلوقتي وكرلوله هو ال بيصلي التراويح يعني ياربي لما كنت مش بحب صوته السنة ال فاتت كان كل يوم بيصلي التراويح ومكنتش بحب صوته أصلاً وأول ما حبيت صوته العالم كله يتلقب ويقفل يادي الحظ 😞 حاولت اعمل جو رمضان شوية كنت بشغل قرآن بصوت ياسين من ال كنت بسجلهم آخر فترة وكنت بصلي التراويح وحدي طبعاً أحلام وبنتها علاقتنا وحشة اوي ببعض ف بتجنبهم تماماً .. زودت ورد القرآن شوية . ولو اني قرأت القرآن كتييير اوي بس وكأني اول مرة ألاحظ سورة النور وأتعمق في معانيها بالشكل ده وأبحث عن تفسير آياتها .. واكتشفت ان الخمار فرض .. اه فرض عشان هو ايه مواصفات اللبس الشرعي ! انه يبقي طويل وواسع ولا يصف ولا يشف والحجاب يبقي طويل ويداري الجزء العلوي كله وكمان طويل من ورا هو ده اللبس اللي أمرنا بيه ربنا كله ستر وعفة لدرجة اي حد غريب ميعرفش من لبسك انتي صغيرة ولا كبيرة ف السن .. خدت خطوة اني خلاص لازم البس خمار .. انا لبسي فعلاً طويل وواسع وكله دريسات بس بلبس حجاب عادي مش طويل لدرجه الخمار يعني مش ناقصني غير خطوة واحدة بس .. استعنت وتوكلت ع الله وتاني يوم كنت نزلت أشتري خمارات عشان ابدأ أول يوم رمضان بالخمار . نزلت وحدي اشتريت كام خمار كده وطبعا أول لون كنت حريصة أجيبه أزرق زهري 💙 بعشق اللون ده هيبقي جميل ع الدريس الاسود .. طنت فرحانه جداً لما جربت الخمار لأول مرة يااه شعور جميييل اوي مش عارفه اوصفه غير اني ندمانة ع طل سنين حياتي ال ملبستش فيها الخمار .. والله لو كنت عرفت من زمان انه فرض مكنتش سبته انا لبسته ابتغاء وجه الله وحده .. وعشان أكون بارة بأمي الله يرحمها أكيد لو كانت موجودة دلوقتي كانت هتفرح بيا وهو أكيد حاسة بيا دلوقتي وفرحانة بيا .. اسأل الله أن يرزقها الفردوس الأعلي بلا حساب ولا سابقة عذاب .. اتصورت شوية صور كتير من فرحتي بالخمار وبعتهم ل منه . أشرقت: منه بصي المفاجأة دي .منه: اللهم بارك اي القمر ده يسطااا ما شاء الله انتي لبستي خمار! أشرقت: اها الحمد لله . نزلت اشتريتهم انهارده اي رأيك حلو عليا؟ منه: قمر جداً اللهم بارك ربنا يثبتك ي روحي يارب . أشرقت: اللهم آمين يارب وعقبالك يقلبي . الخمار جميل اوي والله ي منه . منه: ان شاء الله ربنا يكرمني والبسه . ع فكره الخمار الأزرق جميل جداً عليكي .. أشرقت:بجد🙈💙💙 !!
