عدي تقريباً خمس أيام مفتحتش فيهم نت ولو ل دقيقة واحدة كنت مخنوقة جداً من كل حاجه ف حياتي.. مشاكل ف البيت ، ده غير ظهرت نتيجة الأبحاث وفيه بحث مادة منجحتش فيها للأسف دي كانت أكتر مادة تعبت فيها .. فترة الأبحاث دي كانت صعبة جداً عليا لانها اول مرة اتعامل مع برنامج ال word وفكرة البحث نفسها مش سهلة واني اجيب محتوي من النت عشان اترجمه الأول وبعدين اشوفه اذا مناسب ولا لاء وبعدين لاازم اغير ف صيغة الكلام عشان مينفعش آخد الكلام كوبي بيست كده وحاجات كتير كلها صعبه رغم كده أصريت اكتبه بنفسي بدل ما اروح ل مكتبة اعمله زي باقي الدفعة .. وللأسف ال تعب وسهر مينجحش واللي خد البحث ع الجاهز ينجح عادي !! بكيت كتير لغاية ما عيني ورمت ومعدتش شايفة كويس .. من قهرتي روحت كلمت الدكتورة وبعتلها البحث ع الواتساب عشان انا متأكدة انه افضل من بتاع المكتبة وزي ما توقعت الدكتورة مقالتش سبب مقنع لرفضها البحث .. وقالتلي متقلقيش فيه دور تاني واكيد هتعدي . من قهرتي حلفت اني مش هغير ولا حتي حرف واحد ف البحث وهبعته هو هو تاتي ومش هتعب واكتب تاني من الأول .. فضلت اعيط كتير جداً وكأني ما صدقت لقيت حاجه تزعلني وأعيط ع كل ال مضايقني وال كاتماه جوايا .. فتحت نت ع باليل الساعة 10 كده واول حاجه فتحتها صفحة ياسين .. لقيته كاتب ف البايو بتاعه .. تُنسي كأنك لم تكن كحب عابر تُنسي !؟ يادي النيلة يبني مش ناسياك والله انا مكتئبة وقافلة نت مش اكتر ياربي اعمله اي ده كمان دلوقتي ! كالعادة مفيش حل غير البايو .. كتبت رغم البعد . رغم المعاناة وعدم وضوحك لستُ أنساكَ.. حاسة البايو ده مكان الشات الخاص بتاعنا وانا وهو بس ال نعرفه .. المكان الوحيد ال بنطمن بعض فيه . حسيت اني مطمنه وهو اونلاين وفضلت كل شوية ادخل ع البروفايل بتاعه ع أمل يشيل البايو عنده واتأكد اذا بيشوف صفحتي ولا لاء!
منه كانت عملالي تاج ف بوست بتقولي فيه كلام حلو كتير وانها فخورة بيا برغم كل حاجه مريت بيها ومزعلش عشان زعلي مهم عندها وكلام كتير فيما معناه مزعلش ع المادة ال نزلت فيها دي .. متوقعتش كم الحب اللي ف كلماتها ده فعيطت اكتر بس المرة دي من الفرحة .. رديت ع البوست بتاعها وقولتلها .. ي منه مش عارفه ارد اقولك اي اكتر من اني بحبك جداً جداً يعني +حرام عليكي كل الكلام الجميل ده خلاني اعيط تاني وانا عيني وجعتني من كتر العياط طول اليوم انهارده ..
فضلنا نتكلم ونهزر عادي ف الكومنتس مع بعض وانا والله مش ف بالي ان في حد هيشوف حاجه منهم حتي ياسين .. لكن ال صدمني بعد ساعة بالظبط لقيته منزل فيديو قصيدة ياولدي لا تبكي . للشيخ الإمام . ياااه اول مرة اسمع صوته ف قصيدة وبيغنيها بصوت جميل جداً جداً أحلي بكتير من صوته ف المايك بتاع المسجد .. صوت السماعة بتاعت المسجد ظلم صوته .. حسيت اني اسعد واحدة ف الكون كله لما سمعت القصيدة بصوته انا بحبها اصلاً وبسمعها دايما بس لما سمعتها بصوته حسيت اني اول مرة اسمعها !! للحظة سعادتي زادت لما ركزت شوية وربطت الأحداث ببعضها وان منه بتقولي ف بوست مزعلش وانا بقولها اليوم كله بعيط.. معقول هو سجل القصيدة دي بصوته مخصوص عشاني!! خاصةً دي اول مرة ينزل حاجه بصوته ع البروفايل بتاعه! معقول بيقولي انا لا تبكي وحزني فارق معاه كده ! يعني معني كده انه هو كمان بيدخل صفحتي اكيد مفيش شك ! من فرحتي روحت بعتها ل منه . مفيش غيرها بشاركها فرحتي وحزني .. منه:اوعي يسطااااا شوفتي بقي اهو عشان متقوليش صدفة ! اشمعنا بقي ف الوقت ده بالذات منزل قصيدة ياولدي لا تبكي ! من بعد آخر بوست عندك ؟ أشرقت: بجد ي منه دي عشاني ! انا فرحانه اه بس مش عايزة ارجع اندم بعدين واقول كان بيتهيألي ! منه: يختااااااي بيتهيألك اي بس . طب ممكن انتي بيتهيألك وانا طيب!! هيكون بيتهيألنا احنا الاتنين ؟ دحنا نروح لدكتور بقي !
كنت فرحانة جداً . فكرة ان في حد مهتم بحزنك بالطريقة دي ويهمه يفرحك عشان مش بيهون عليه زعلك . من غير ما يعرف أصلاً سبب حزنك ده ايه؟ المهم عنده انك تكون مبسوط . دي حاجه جميلة جداً ولا إرادياً لو لقيت الشخص ده ف حياتك هتحبه لوحدك وهتتمني تعمل اي حاجه انت كمان عشان تسعده وتقف جنبه . قومت صليت قيام ودعيت لكرلوله كتير جداً يمكن نسيت ادعي لنفسي ودعيتله هو .. جوا قلبي احساس انه مش كويس وفيه حاجه معاه. ومفيش ف ايدي غير الدعاء .. روحت انام وانا حاسة براحه شوية عن الأول حطيت السماعة وفضلت اسمع ف القصيدة بصوت كرلوله لغاية ما نمت وهي لسه شغالة .. صحيت بعد ساعتين معرفتش ارجع انام تاني فقومت صليت الفجر وفضلت صاحية وطول الوقت وانا بسمع القصيدة بتاعت ياسين كررتها ولا مية مرة .. بقت أكتر حاجه بتواسيني وبتفرحني . كمية دفي ف صوته مش طبيعية بتحسسني ان كل صعب هيمر طول ما هو جنبي كده .. الصبح طلع ف قومت عشان اشوف شغل البيت . كنت تعبانه ودايخة ونفسي انام بس للأسف مش عارفة انام أصلاً! طول الليل صاحية منمتش غير ساعتين حتي ياسين طول الليل فاتح فيس معرفش اذا كان صاحي ولا نايم ونسيه مفتوح عادي ! بس اطمنت شوية لما لقيته حذف البايو بتاعه . توقعت انه شاف البايو عندي ف فهم اني مش ناسياه وحذفه . فحذفت انا كمان البايو بتاعي وسبته فاضي ..
