وأخيراً عدت شهور الاجازة بفارغ الصبر أخيراً هنرجع للدراسة من تاني م مصدقة كل الليالي الصعبه دي ع قلبي عدت خلاص وهرجع من تاني اشوف كرلوله بعد غياب 7 شهور مش مصدقة اني هرجع اقف ف السطح من تاني واسمع صوته ويطمئن قلبي من تاني بهدوء صوته ف الصلاة .. هو صحيح طول ال سبع شهور دول كنت كل يوم بسمع صوته وبنام علي صوته . بس الاحساس يختلف جداً عن لما يكون صوته لايف كده واشوفه كل يوم وهو جاي للصلاة وهو ماشي .. الدراسة بدأت 16/10/2020 من اول يوم اتفقت انا ومنه اننا نروح السكن كنت متحمسة جدً اني اشوف ياسين من تاني بس معرفش ليه من جوايا حسيت اني مش هشوفه ع طول لسه الوقت بدري .. وفعلاً ده حصل خلص شهر 10 كله وهو لسه مجاش كنت قلقانه عليه ومش فاهمه ليه مجاش كل ده ليه اتأخر كده!! كنت كل يوم بستناه ف البلكونه .. كل يوم كان عندي أمل انه يرجع بستناه ف المغرب والعشا والفجر .. كان في أمل انه يرتاح قلبي بصوت تلاوته ولكن كان الأمل ده ينقطع ويتحول ل يأس بمجرد ما أسمع صوت حد تاني غيره بيصلي 😪💔..
منه:خلاص ي أشرقت متعيطيش هو أكيد فيه حاجه حصلت تخليه يتأخر كل ده أكيد فيه سبب .. ان شاء الله هيجي متعيطيش بقي ..
أشرقت: هو المفروض يكون هنا من 15 يوم الله أعلم يمكن الدراسة تتأجل تاني وملحقش اشوفه .. والله هو بارد ليه مجاش لدلوقتي ! يمكن انا مش فارقه معاه ونسيني أصلاً .. منه:متقوليش كده لو مكنتيش فارقه عنده مكنش كتبت كل ال كتبته ده ع الفيس يمكن ف سبب تاني أخره .. أشرقت: الله أعلم .. عادي مش مهم يجي ميجيش انا مالي .. منه:اوباااا النكد بدأ بقي .. أشرقت: ولا نكد ولا حاجه وأنكد ليه يعني !! قومي عشان نصلي العشا ولا أصلي وحدي !! منه:أموووووصه هانم استنيني نصلي جماعه اكسبي فيا ثواب يشيخه ..
صلينا العشا ونزلت أتمشي كنت مخنوقة وحاسه نفسي وحيده من غير ياسين مكنتش فاكره غيابه هيأثر فيا للدرجه دي .. ب عند ما رجعت جاتلي فكرة اني ابعتله ع صراحه امتي هيجي بس خايف يعرف انها مني خصوصاً محدش من أصحابه سأله امتي جاي !! فحاولت اسلوبي ميبانش انها انها وكتبتله .. امتي تيجي قنا يصديقي اشتقنا للصلاة خلفك والله .. بعتها ع طول .. اوبس!! يلهوي ع الذكاء ال انا فيه ليه كتبت يصديقي ما كده هيفهم انه انا ياربي نسيت وخلاص اتبعت يلا مش مشكله 🙂
عدي يوم ع الرسالة ومردش عليها .. اضايقت أكتر واتخنقت جداً حتي لسه مجاش .. كان عندي احساس قوي انه جاي انهارده وطلعت السطح استناه قبل الفجر .. صليت صلاة القيام وفضلت مستنيه اسمع صوته هو وبس ف صلاة الفجر .. حسيت هو هيجي الفجر او لسه هيجي ف الطريق .. عمو فتحي أذن الفجر عادي كعادته وبعدين استنيت يطمئن قلبي بصوت ياسين .. اول ما ال مسك المايك عمل صوت كده وانا ضربات قلبي بتزيد يا تري ده كرلوله ولا مش هو .. لكن للأسف بعد لحظات بدأت الصلاة ولكن مش ياسين . معرفش ليه المره دي مقدرتش امسك دموعي وبكيت 😪 اكتر من 15 يوم عدوا وكرلوله لسه مجاش .. يعني انا بعد السبع شهور بتوع الاجازة المميته دي روحت ع السكن بسرعه عشان اشوفه بس هو لسه مش هنا .. صليت الفجر ونزلت شقتي عشان انام وانا كلي حزن .. منه كانت صاحيه.. منه: برضو ي أشرقت طلعتي السطح ف الليل دلوقتي وحدك ؟ أشرقت: عادي كنت مضايقة شوية .. منه: أنا صليت الفجر هنا كنت عارفه انك فوق بس بصراحه كسلت اقوم .. أشرقت: ماشي .. هنام انا عشان عندي سيكشن الساعه 8. منه: مالك ي أشرقت في اي انتي كنتي بتعيطي صح!؟ أشرقت:لاء مفيش انا كويسة .. منه: متخبيش باين ع عيونك أصلاً بصي لنفسك بقيتي عامله ازاي ولا بتاكلي كويس ولا بتنامي كويس وعيونك باين عليها جداً حزنك والسهر . كل ده عشان كرلوله انا عارفه وحاسه بيكي .. بس متعرفيش ايه ال مانعه يجي لدلوقتي ان شاء الله خير .. خليكي متفائلة مش يمكن انهارده العشا تكون الصلاة بصوته ! اكيد مش هيتأخر أكتر من كده عشان دراسته .. أشرقت ببكاء: انا كنت حاساه جاي انهارده معرفش ليه عندي الاحساس ده مع انه منزلش اي حاجه تدل انه جاي وبعتله ع صراحه كأني واحد من ال بيصلوا وراه ليه مجاش ومردش أصلاً.. هو من المغرب أونلاين لغاية دلوقتي .. فقلت أكيد ف الطريق وقرب يوصل وكنت بتمني هو ال يصلي الفجر .. مكنتش عارفه اني هزعل عليه كل ده .. معرفش ليه اتعلقت بيه للدرجه دي . حاولت كتير اتعود ع غيابه والسبع شهور ف البيت دول كانوا كفيلين أنساه تماماً بس بالعكس مراحش من بالي ولو لحظة واحدة .. صليت قيام كتير ودعيت كتير ان أنساه وكل ما أدعي أنساه بيجي ف بالي أكتر وأكتر والاقيه بينزل بوستات رد ع حاجه كنت منزلاها او حاجه شبه ال كتبتها وتوضح انه متابعني ومش ناسيني .. احساس مش هين أبداً إنك تدعي ربنا تنسي شخص ما وتلاقيكي مستحيل تعرفي تنسيه وكل حاجه بتقربك منه أكتر .. دعيت كتير يارب لو احنا مش من نصيب بعض متعلقش قلبي بيه وخليني أنساه ومحبش أسمع صوته ولا أنام ع قرءان بصوته زي كل يوم وأصحي بكامل إرادتي أحذف كل الريكوردات ال بصوته ولو شوفته يبقي عادي زيه زي أي شخص بشوفه ف الشارع ولا أهتم لكل تفاصيله دي .. بس كل مره بدعي بكده بلاقيني اتعلقت اكتر بصوته .. مش عارفه اوصفلك احساسي مهما اتكلمت ..
منه:يقلبي كل ده مخبياه ف قلبك !! متخافيش والله ربنا مستحيل يعلق قلبك بحاجه عشان يحرمك منها حاشاه سبحانه وتعالي والله انا حاسه ان آخرة الصبر ده كله نهاية سعيدة .. ربنا مش هيلهمك دعوه بالشكل ده إلا انها اتكتب من نصيبك أصلاً... اصبري ما ضاقت إلا لتفرج 💙 متعيطيش بقي والله ربنا هيجبرك ..
أشرقت:يااارب يااارب 😭 عارفه بشكر ربنا دايماً انك ف حياتي انتي اكتر حد بيهون عليا .. منه: وانا هفضل ع طول معاكي يروحي 💙 أشرقت:هحاول انام بقي عشان أصحي فايقة .. منه: بتمني والله انك تنامي يبنتي بقيتي شبه الزومبي من قلة النوم لما يجي كرلوله ويشوفك هيتخض 😁 أشرقت: بنت عيب انا أصلاً قمر 😌💙
