ما فعلاً مبعتش حاجه وبعدين ازاي مش ف بالي وانا بنام وبصحي ع البروفايل بتاعه ومتابعه كل حاجه هو عبيط يعني ! ازاي هرد ع الكلام ده برغم انه مسح البوست من كام يوم يبقي شوفته ازاي غير لو بفتح صفحته كل شوية! وبعدين مين اللي بعتله كده ! منه: اممم مش عارفة ليه حاسه ممكن تكون شيرين ال عملت كده ؟ أشرقت : شيرين ! اكيد لا ء مش هي .. وهي تعمل كده ليه مثلاً .
منه:بالعكس ده محدش ليه مصلحة يعمل كده غيرها مين يعني ف السكن كله يعرف الاكونت بتاعه غيرها كل البنات ال ف السكن ميعرفوش اسمه حتي .. وبعدين مش هي راحت كلمته عنك من وراكي . اكيد هي كمان ال عملت كده عشان تشوف رد فعله ومش بعيد عاوزاه يبعد عنك . فلتلك قبل كده انها بتغير منك .. أشرقت:ايوا هي بتغير مني فعلاً لكن تحاول تبعدنا ليه ! ده حتي كرلوله مش من نوع الشباب ال بتحبهم ! .. منه: ولا هي من نوع البنات ال بيحبهم ده كفاية لبسها لوحده اكيد شخص زيه وحافظ قرآن مش هيبصلها .. هي بس بتحب تاخد كل حاجه منك عشان بتغيير منك .. أشرقت:محدش بياخد حاجه حد .. لو ربنا كاتبنا لبعض محدش غيري هيكون ليه ولا حد غيره هيكون ليا ..
فضلت متابعة كرلوله ع طول ومش عارفه اعمل اي قلبي واجعني اوي عليه وحاسه بحزنه مش هبقي اوفر لو قلت مكنتش بنام الليل كله وانا بعيط معرفش ليه .. يمكن عشان حاسه بحزنه ومش هاين عليا اسيبه كده ! او يمكن عشان خايفة يكون كل دي اوهام وانه مش بيكتب حاجه ليا ولا زعلان ع فراقنا والله اعلم هنتجمع تاني امتي وكل شوية الدراسة تتاجل بسبب فيروس كورونا .. كنت خايفة يبقي حب وهمي مش اكتر .. وخوفي الاكبر احساس قلبي مستعدة اي شخص يخذلني الا قلبي .. قلبي ال كل حاجه بيحسها بتبقي حقيقة .مش هما دايما ف الافلام والروايات بيقولو للشخص ال بيحب اسمع صوت قلبك بيقولك اي ! اهو انا قلبي بيقولي ان كرلوله حزنه لا يقل عن حزني وانه حزين اننا فجاة بعدنا بسبب حاجه مش بايدنا .. يعني ياربي كل الناس بتحب وتتحب عادي ولما انا احب الدنيا كلها تتقلب والدراسة تتاجل بالشهور كده ! دي عمرها ما حصلت ابدا جات ع حظي يعني 💔 . الفترة دي مكنتش بكتب اي بوستات بس كنت متابعه كرلوله كويس جدا . ف يوم كان بالليل لقيت كاتب ..
اصبح فارغاً كأن حزن العالم يملأه مع أنه فقد شخص واحد لم يفقد العالم!! معرفش اول ما قرأتها افرح ولا ازعل .. افرح ان في حد مهتم ليا ولوجودي وغيابي بالشكل ده لدرجه ان غيابي عنه بيطفيه للدرجة دي وبيحس من غيري كل حاجه ناقصة حتي لو حواليه العالم كله بس انا مش معاه فمش هيبقي مبسوط ! ولا ازعل ع اني السبب ف حزن شخص للدرجه دي مش بس كده كمان الشخص ده اقرب حد لقلبي ! ولا ازعل اذا الكلام ده مش ليا ولا اي ! يااااارب انا تعبت واحترت ومعرفش اعمل اي ولا اتصرف ازاي ! من ناحية مش عاوزه اسيبه حزين كده لوحده بدون ما احسسه اني حزينه لحزنه بل حزينه اكتر منه .. ومن الناحية التانية خايفة اقرب اكتر وف الاخر يبقي كل ده وهم مش موجود غير ف خيالي انا وبس ! معرفتش اعمل اي كالعادة روحت كلمت منه وبعتلها اسكرين بالبايو بتاع كرلوله ..
منه: يروحي. يبنتي حرام عليكي ال بتعمليه فيه ده .. يعني هو حاسس بكل الحزن ده عشانك .. وانتي تقوليلي يمكن مش بيكتب كده ليكي !
أشرقت: عارفة ي منه والله انا حزينة اكتر منه بكتير .. نفسي ابقي جنبه دلوقتي واطمنه انه ف قلبي وعمري ما اقدر انساه ولا اي حاجه تبعدني عنه حتي لو الدراسة اتاجلت السنة كلها ومقدرتش اشوفه مش المسافات ال هتخليني ابطل تفكير فيه او احس بيه لو زعلان .. مفيش اي حاجه ف الدنيا هتقدر تبعدني عنه غير لو ربنا أمر قلبي أنساه زي ما جعل حبه ف قلبي .. نفسي أطمنه .. لكن الحقيقة انا ال محتاجه انه يطمني .. محتاجه يكون جنبي ويقولي ايوه كل كلمة بكتبها ليكي وكل حزني اني مقدرتش اقرب منك اكتر والدنيا خدتك مني زي ما كل حاجه بحبها بتروح .. نفسي يقولي انه مش ناسيني وانه حزين زيي ومش بيعرف ينام من التفكير فيا زي ما بفكر فيه .. وانه هو كمان متابع كل كلمة بكتبها زي منا متابعه كل حاجه .. نفسي يقولي انه لما بيتخنق بيقوم يصلي ويدعي ربنا يجمعنا ببعض زي ما انا بعمل .. انا خايفة كل ده يبقي وهم وقتها هفقد ثقتي ف كل الناس وعمري ما هعرف احب تاني ولا هيبقي عندي ثقة ان اي حد ممكن يعمل حاجه عشاني .. انا مجربتش شعور حد يحبني ويزعل لفراقي زي ما جربته مع ياسين مش عاوزه الاحساس ده يضيع مني .. مش عاوزه اصحي ف يوم الاقي كل ده كأنه حلم جميل وانتهي بكابوس غير حياتي للاسوأ..
منه: مش هيحصل ي حبيبتي والله مش هيحصل .. حاسه بيكم انتو الاتنين وانتو الاتنين خايفين يكون ده وهم بس الحقيقة مش وهم فكري كويس انتي تعرفي صفحته من قبل ما تكلميه عمره ما كتب اي حاجه من دي معملش كده غير لما عرفك ! يبقي اكيد كل كلمة بيكتبها ليكي . اكيد هو عايش دلوقتي نفس معاناتك . اكيد بيفضل يفكر فيكي زي ما بتفكري فيه اكيد مش ناسيكي زي ما انتي مش ناسياه وكلامه اكبر دليل ع كده .. اصبري انتي بس وتأكدي ربنا هيراضيكي ف النهاية ..
