بدأت صلاة الفجر خلاص .. بحب جداً أسمع الله أكبر من كرلوله .. ليه نبرة مختلفة لما بيقول الله أكبر ف بداية الصلاة او بين الركعات وكل مرة فيهم بتخطف قلبي ..قرأ الفاتحة وتنهد بعدها وسكت شوية وانا احساس قلبي بيقول ايوه هي اكيد هيصلي بأول سورة طه.. ياالله قلبي حرفياً طار من الفرحه أول ما قال طه ما أنزلنا عليك القرءان لتشقي.. والأجمل انه كان بيقلد هدوء وصوت القطامي 💙 مع هدوء الفجر . صوته كأنه صوت من الجنة حرفياً وبدون مبالغه . الجميل انه كمان الركعة التانية كمل سورة طه وهو بيقول (قد أوتيت سؤلك يا موسي) دموعي نزلت وشكرت ربنا ان بدعيه فيُجيبني .. سواء كانت دي صدفة انه قرأ سورة طه ف نفس الوقت ال نزلت فيه البوست او كانت مقصودة ف كلا الحالتين انا فرحانه جداً.. بس جوايا احساس كبير انه شاف البوست وعشان كده حب يراضيني . وال أكدلي ده وهو خارج من المسجد وعند آخر الشارع كده وقف لكام ثانيه وبص ع البلكونه ال واقفة عندها وابتسم وبعدها مشي عادي ..
صليت الفجر ونزلت معرفتش انام وفضلت صاحية بفكر ف ندي واي ال حصلها ومش عارفه هتصرف ازاي ولا عارفه هل هي هتفضل معايا ولا ممكن تقول ل مامتها ع ال حصل وتخليها تسيب السكن عندي وتروح مكان تاني والله أعلم هيحصلها اي بعدين ..
عندي محاضرة الساعه 8 خلصت لبس ع 8 ونص وطعلت عند ندي فوق اشوفها قبل ما انزل ..
أشرقت: انتي نازلة ولا اي ي ندي ..
ندي : ايوه عندي محاضرة دلوقتي .. أشرقت: معاكي فلوس ؟ ندي:ها!! اااه عادي انا أصلاً هروح مشي. الجامعه مش بعيد من السكن بتاعك أقرب من السكن ال كنت فيه.. أشرقت: وانا كمان مبحبش المواصلات وبحب اتمشي .. اي رأيك ننزل مع بعض انا كمان عندي محاضرة . ندي:ماشي يلا . أشرقت: استني خدي الفلوس دي خليها معاكي عشان لو احتجتي حاجه ..
ندي: لاء شكراً انا معايا .. أشرقت: انا أختك الكبيرة ومفيش شكر بينا خديهم ولو مش محتجاهم دلوقتي عادي خليهم معاكي اكيد هتحتاجيهم . ندي: ماشي شكراً .. أشرقت:الله ! مش قولتلك مفيش شكر بينا .. يلا بقي عشان منتأخرش ..
خلصت محاضرات من 8 ل 12 كان لسه معايا للساعه 4 محاضرات وسكاشن .. ف روحت مُصلي الكلية صليت الضهر وبعدها رجعت للمحاضرات تاني وجه وقت العصر صليت العصر قبل ما أمشي عشان كنت مرهقة جداً ومش نايمة كويس ف خوفت اروح السكن انام من التعب وتفوتني صلاة العصر.. صليت العصر ومشيت ع السكن ..
في السكن ..
منه:ي روحي ي أشرقت شكلك مرهق جداً .. أشرقت: نفسي انام ي منه بجد تعبت خالص انهارده .. منه: طب قومي خدي شاور وصلي ع بال ما اجهزلك الغدا انا من بدري مستنياكي مكلتش .. أشرقت: صليت ف الجامعة . يدوب هاخد شاور واناااام .. منه:مش هتاكلي . أشرقت مليش نفسي والله مش عايزة غير انام دلوقتي .. متقلقيش انا عارفه نفسي مش هكملهم ساعتين ع بعض وهصحي ابقي آكل بعدين ..
خدت شاور وقرأت ورد القرءان ونمت ع طول .. صحيت ع الآذان بصوت كرلوله اول ما قال اللهُ اكبر صحيت . برغم اني كنت ظابطه المنبه مسمعتهوش أصلاً اول ما سمعت اللهُ اكبر بصوت ياسين صحيت ع طول 💙 مقدرتش اطلع ع السطح عشان اسمع الصلاة بصوته وقفت ف شباك أوضتي الصوت مسموع برضو .. منه:امممم ف حد يصحي يقف ع الشباك كده ع طول ! أشرقت:الله بسمع الصلاة يبنتي فيها اي دي .. منه:مفهاش حاجه بس سمعتي فجر انهارده بسورة طه غريبة دي ف نفس الوقت ال نزلتي فيه البوست 😉 أشرقت: صدفة يستي عادي فيها اي ؟؟ هو بيصلي بسورة طه من السنة ال فاتت أصلاً عادي يعني .. منه: تاني صدف يبت وربنا احدفك من الشباك دلوقتي .. أشرقت : 😂😂 خلاص خلااص مقصودة يبشه 😁 هاتيلي خمار بالله عليكي عشان قريبين من الشارع وعايزة اشوف ياسين وهو خارج من المسجد .. منه: يبنتي قومي اغسلي وشك حتي الأول .. أشرقت: يستي سيبيني مش كفاية مشوفتهوش وهو جاي كمان مشفهوش وهو ماشي ده اي الظلم ده 🥺 منه: خدي خدي اهو واسكتي مش هقدر عليكي انا واستني هاجي اقف معاكي 😁😁..
جه وقت صلاة العشاء المرة دي طلعت ع السطح عشان اشوف ياسين وهو جاي وصلي العشاء بأواخر سورة طه .. تحديداً (ويسئلونك عن الجبال فقل ينسفها ربي نسفا) سبحان الله من شوية كنت بسمع ريكورد قديم بصوته لنفس الآيات بيقرأ بشكل جميل جداً جداً وانا بسمعها بقول ياااه لو يصلي بيها كمان .. ربنا استجاب للدعوة البسيطة دي وصلي بيها .. بحس كل ده اشارات من ربنا ليا ان قلوبنا مرتبطة ببعض وانه يوماً ما هيجمعنا ان شاء الله الحاجات البسيطة دي بتديني أمل كبير .. بعد ما سجلت اول ركعتين كالعادة صلينا انا ومنه وكرلوله كان لسه جوا المسجد ..
منه:غريبة يعني لسه ملبستيش مش نازلة ولا اي؟؟!
أشرقت:لاء مش قادرة انهارده خليها يوم تاني .. منه:حرام عليكي طيب بصي ياسين واقف لوحده اهو ف الشارع والمسجد اتقفل وكل الناس مشيت ! هيكون مستني مين غيرك يعني؟ أشرقت: معرفش بقي الله اعلم يمكن مستني حد اشمعنا انا يعني؟ منه: يبنتي انتي بتنزلي كلها دقيقة ع بعضها وبتمشي يعني لا بتلحقي تشوفيه ولا هو بيشوفك ! أشرقت:مش مهم بقي .. منه:مش مهم!!؟ اكيد ف حاجه مالك .. أشرقت: مليش ي منه مفيش .. منه:لاء فيه قولي مالك شكلك مش مبسوطه .. أشرقت: دخلنا ع شهر 12 خلاص وسمعت انه احتمال الدراسة تتأجل تاني والله اعلم امتي هرجع اشوف كرلوله من تاني.. اول مرة فضلنا سبع شهور بعيد عن بعض الله اعلم المرة دي هنبعد قد اي ؟ من انهارده مش هنزل تاني غير كل فين وفين .. مش عايزة اتعود كده اني بشوفه كل يوم وبسمع صوته .. انا بحاول اسجل كل صلاة ليه ومش بفوت وقت واحد عشان دي الذكريات ال بتصبرني ع بعده ..منه: خلااص طيب ي أشرقت متعيطيش .. ان شاء الله خير .. أشرقت: معرفش ليه الحياة ضدي كده كل ما احاول افرح يوم بزعل قصاده سنيين .. من يوم ما بدأنا تعليم وعمره ما حصل والدراسة اتأجلت وكل الوقت ال كنت بكره فيه الدراسة مكنتش بتتأجل .. ولما لقيت الشخص ال بيهون عليا حياتي وحزني هو كمان الحياة بتاخده مني .. معدش في حاجه بحبها الا وبتروح مني .. منه:استهدي بالله كده وصلي ع النبي ومتعيطيش والله ربنا هيجبر بخاطرك ف النهاية . أشرقت: عليه افضل الصلاة والسلاام .. منه: قومي بقي البسي وننزل نتمشي ويستي هعزمك ع عصير قصب ع حسابي . أشرقت: لاء مش قادرة ي منه عايزة انام .. منه:وربنا ما هسيبك يلا انتي عارفاني لما بصمم ع حاجه ومش هسيبك غير لما ننزل .. أشرقت: طب استني شوية .. منه:امممم طيب عارفه عايزة تستني ليه عشان ياسين يكون مشي من شارعنا! أشرقت:ايوه .. هو اكيد هيمشي دلوقتي عشان ليه ربع ساعه واقف ...
