كنت مبسوطة جدا من ياسين واهتمامه ده وإنه مرضيش يدخل السكن بتاعه من بعد ما عرف إني زعلت من نظراته . اهتمامه بالتفاصيل الصغيرة دي بيسعدني جدا وبيقوي عندي احساس انه كل حاجه بيعملها عشاني وعشان يثبتلي حبه وكل كلمة كان بيكتبها أكيد يقصدني بيها . هو صحيح بتعدي فترة بدون ما يكتب أي تلميحات . بس كل فترة والتانية بيعمل موقف يفضل محفور ف ذاكرتي عشان أحارب بيه يأسي ويثبتلي إنه كل حاجه فيه تقصدني أنا وبس .. وهو ده ال مخليني متمسكة بالدعاء وكل ما ادعي ربنا يقربنا أكتر تحصل حاجه جديدة وغريبة 💙
طلعت ع السطح قبل الفجر بساعة كنت بقرأ ورد القرءان بتاعي وكانت سورة آل عمران السورة دي خاصة بحبها جدا جدا معرفش اي سر الراحة النفسية فيها عن باقي القرءان .. كنت بقرأ من قوله تعالي :
(وَسَارِعُوٓاْ إِلَىٰ مَغۡفِرَةٖ مِّن رَّبِّكُمۡ وَجَنَّةٍ عَرۡضُهَا ٱلسَّمَٰوَٰتُ وَٱلۡأَرۡضُ أُعِدَّتۡ لِلۡمُتَّقِينَ ٣٣١ ٱلَّذِينَ يُنفِقُونَ فِي ٱلسَّرَّآءِ وَٱلضَّرَّآءِ وَٱلۡكَٰظِمِينَ ٱلۡغَيۡظَ وَٱلۡعَافِينَ عَنِ ٱلنَّاسِۗ وَٱللَّهُ يُحِبُّ ٱلۡمُحۡسِنِينَ) إلي نهاية الربع
بحب الآيات دي جدا جداً كنت بحب أسمعها بصوت ناصر القطامي جميلة جداً اللهم بارك .. بس وأنا بقرأ معرفش اشمعنا المرة دي بالذات اتمنيت لو أسمعها ف صلاة الفجر بصوت كرلوله ورجعت اقرأها بنفس طريقة ترتيل ياسين . أنا حافظة طريقة ترتيله من كتر ما بسمعه ليل نهار . كمان في آيات معينة بيكررها برغم انها مش موضع تكرار ومش كل القراء بيكرروها بس سبحان الله وأنا بتخيله بيقرأ بيكرر نفس الآيات . معرفش الحقيقة ليه المرة دي بالذات من كل قلبي عايزاه يقرأ من سورة آل عمران ومن بداية وسارعوا إلي مغفرة من ربكم . برغم إنه أهو السنة داخله ع السنة التالتة ال أعرفه فيها وعمره ما قرأ الآيات دي . فضلت أقرأ وأتخيله بيصلي الفجر بنفس الآيات . والله كأني سامعة صوته ف دماغي فعلاً وهو بيقرأ .. خلصت قراءة الورد بتاعي وكان فاضل حوالي نص ساعة ع الفجر فضلت واقفة ف البلكونة ع السطح وبستغفر لغاية ما يجي وقت الصلاة ..
أذن الفجر ياسين كعادته الفترة الأخيرة وبدأ يصلي . والله حسيت قلبي اتحرك من مكانه من فرط الفرحة لما قرأ ف الركعة الأولي من سورة آل عمران من بداية الآية وسارعوا إلي مغفرة من ربكم ... يا الله ازااااي كده !! دنا حتي منزلتهاش ستوري ولا بوست ولا حتي كتبت حاجه تدل إني نفسي يقرأ من الآيات دي !!؟ الغريب إنه أول مرة يصلي بالآيات دي .. معقوله قلوبنا متصلة للدرجة دي !!🥺 ياااارب شكراً ع الفرحة دي . مجرد حاجه بسيطة زي دي كان نفسي فيها وحتي من غير ما ادعي ربنا وألح ف الدعاء ربنا حققها ف لحظة ! فكيف تظن يا قلبي أن الله لن يجبرك ولن يستجيب ؟؟ حاشاه سبحانه فصبرٌ جميل . والله لن يخذلك الله بعد أن زرع فيك رغبة الوصول 💙
خلصت صلاة الفجر وصليت الفجر ونزلت عشان أنام شوية قبل ما أنزل ع المحاضرات . من جمال صوت ياسين كالعادة يعني فضلت حاطه الهاند فري بسمعه لغاية ما نمت . صحيت ع الساعه 9 وكنت دايخة من قلة النوم وقمت بسرعة أخدت شاور ونزلت ع المحاضرة الساعة 10 . خلصت المحاضرة ع الساعة 12 وكان عندي سيكشن ع الساعة 2 كان نفسي اوي ارجع السكن انام شوية بس أكيد مش هينفع 😢
روحت مُصلي الكلية صليت الضهر وقرأت ورد الضهر وبعد ما خلصت شغلت قرءان بصوت كرلوله بس صوته الهادي خلاني خلاص شوية وهنام عشان متعودة أنام ع صوته وأنا أصلاً مش نايمة كويس ولو سمعته أكتر من كده هنام ف المُصلي ومحدش هيحس بيا عشان أنا قافلة الباب لأنه مكنش فيه غيري جوا . والله خايفة ف يوم بسبب الأرق الكتير ده أنام ف المُصلي من غير ما أحس بنفسي وأبات لوحدي ف الكلية كلها . يلهوي يارب احميني من نفسي 😢.. خوفت بجد ليحصل كده فمشيت من المُصلي قلت أتمشي شوية ف الكلية وخلاص عشان أصحصح ع بال ما يجي معاد السيكشن .. وأنا بتمشي شوفت ندي أختي من بعيد وهي واقفة مع البنت ال كانت ف السكن القديم بتاعها واللي خليت ندي تسيب السكن بسببها . معرفش ندي واقفة معاها ليه تاني ! في ايه بينهم هما الاتنين خاصةً شايفة البنت دي وكأنها بتزعق ل ندي . قربت عليهم اشوف ايه ال بيحصل .. أشرقت : في ايه ي ندي واقفة مع البنت دي ليه ؟ حسيت ندي اتفاجئت لما لقتني قدامها وقالت: مفيش حاجه ي أشرقت صاحبتي عادي واقفة معاها باخد منها محاضرات بس .. أشرقت: محاضرات اي دي وأنا شايفة البتاعة دي وهي بتتخانق . البنت: بتاعت اي ي حجة انتي بخمارك ده بقولك اي ملكيش دعوة بينا. احنا بينا حساب وبنصفيه . أشرقت: حساب اي ده . ال بين واحدة زيك وزي ندي أختي . ندي: خلااص ي أشرقت يلا نمشي . البنت: لا يحبيبتي مش هتمشي من هنا غير لما تجيبي الفلوس ال عليكي . ندي: حاضر أسبوع كده واجبلك ال عايزاه .. البنت: لا يقلبي ده كان زمان هما يومين بالكتير والفلوس تكون ف ايدي وإلا ... انتي عارفة بقي . أشرقت:وإلا اي انطقي . البنت: انتي مين انتي عشان تقفي تتكلمي معايا بالأسلوب ده وسعي يحجة كده خليني أمشي . عندك أختك اهي اسأليها ..
أشرقت: ندي أنا لما جبتك من السكن بتاعك بسبب أسلوب الزفتة دي معاكي وقتها مكنتش حابة اضايقك واسألك هي بتعاملك كده ليه وسبتك براحتك تحكي وقت ما تكوني محتاجة لده . لو فاكرة اني نسيت ف أنا منستش ال حصل . واتفضلي دلوقتي حالاً قولي ايه ال بينك وبين واحدة زي دي ؟ ندي بعياط: مش هتفهمي حاجه . أشرقت : وعد مني مش هعمل أي حاجه تضايقك . احكيلي يمكن أعرف أخلصك منها ومن ال بتعمله فيكي ... ندي: هي كانت صاحبتي جداً ف أول السنة وكنا بنخرج كتير مع بعض بس هي كلية تاني غيري . ف يوم كان مطلوب مننا نسلم شيت لمادة ف الكلية وكان ف كويز مهم وعليه درجات مهمة وأنا من كتر الخروجات مكنتش بذاكر ومش عارفه اعمل اي . فهي اقترحت عليا إنها تعرف ولد من دفعتي اسمه حسن وقالتلي انه شاطر جدا وهو ابن رئيس الجامعة وانه هيقدر يساعدني ويشرحلي كل ال مش فاهماه واننا نخرج ف أي كافيه ويشرحلي كل حاجه . ف البداية رفضت وقولتها انا عمري ما خرجت مع شباب قبل كده وإنه مينفعش الحل ده وتشوفلي حل تاني أو تشوف بنت من دفعتي عشان هي اكبر مني وليها أصحاب كتير وأنا معرفش حد ف دفعتي . فهي أقنعتني انه عادي مرة واحدة بس نتقابل يشرحلي ال محتجاه وخلاص وهي هتيجي معايا هي وصاحبتها التانية ال شوفتيها ف السكن معاها . ف لما قالت كده قلت خلاص عادي . وروحنا فعلاً واتفاجئت ف الكافيه بتقولي انها هي وصاحبتها هتقعد ع ترابيزة تانية غيرنا بحجة انه حسن هيشرحلي حاجات مهمة وعشان اركز وكده . ف الاول قلقت بس بعدها اطمنت لما حسن كان بيشرحلي وكان باين عليه حد فاهم بجد وكمان سابلي كشكول المحاضرات بتاعه عشان أشوف ال ناقصني وكده .. وبس والله دي كانت أول وآخر مرة خرجت معاه . بعدها اتفاجئت برقم بيرن عليا وكان حسن وعرفت إنها ادتله رقمي من ورايا وإنه عاوز يكلمني ونخرج مع بعض ع طول ونسهر وكده وهما شلة فاشلة وهو حسن ده يعرف بنات كتير مش كويسين .. ف رفضت طبعاً ولكن كان بيطاردني ف كل مكان ف الجامعة وكان بيقولي إنه يقدر يعمل أي حاجه عشان أبقي معاه وحتي لو وصلت إنه يسقطني يعمل كده بسهوله . واكتشفت إنه الزفته دي صورتنا مع بعض يوم ما حسن زفت كان بيشرحلي وبتهددني لو معملتش ال عاوزينه هيبعتو الصور ل بابا وكانت طول الوقت ده هي وصاحبتها بيستغلوني ف كل حاجه وكنت بديهم مصروفي عشان يبعدو عني ..
