بدأت الدراسة وكنت طايرة من الفرحة وأخيرا هرتاح من اللي اسمها أحلام . ياااه دي مش أحلام دي كابوس والله شفت تعذيب نفسي وجسدي كتير بسببها بس الحمد لله ربنا عوض صبري واهو هرتاح منها وقررت مش هنزل البيت غير كل شهر يومين بس .. وعدت سنة أولي كلية هي كانت مرحلة جديدة بس كانت جميلة ع الرغم من كنت فيها وحدي حرفيا معرفش حد لا ف السكن ولا ف الكلية . بس دي حاجه مش بتأذيني انا طول عمري وحيدة ومعنديش اصحاب خلاص اتعودت ع كده .. صحيح عانيت كتير ف الاول بسبب كل ال ف السكن كانوا سنة رابعة واصحاب جدا مع بعض وكانو مزعجين اوي بجد . هو انتو اصحاب ع عيني وراسي وكل حاجه بس ادوني حريتي شوية ف حقي ف الشقة . هما ٢٤ ساعة هزار وضحك بصوت عالي يعني ربنا يبسطهم اكيد بس يجماعة عايزة انام . طب يجدعان عندي فاينال . يابني آدمين مصدعة هموت وانام ولكن لا حياة لمن تنادي .. طبعا انا عصبية جدا ومتحملتش ال بيعملوه وسبت السكن بعد الامتحانات ع طول وروحت سكن جديد . ومكنش مختلف عنه كتير نفس طبع الاشخاص ونفس الدوشة وانا كائن بيحب الهدوء يجماعه حرام عليكو بقي .. بس ال اختلف ف السكن الجديد ده اني اتعرفت ع واحدة فنفس سني كنا انا وهي ف سنة تانية بس هي كانت كلية حقوق واسمها هدير .. هي مكنتش صاحبتي اوي يعني . الحقيقة احنا طبعنا مختلف جدا ولكن الظروف حكمت نقرب من بعض ... هي كانت تعبانة ف يوم بالليل وانا خدتها المستشفي ومن وقتها بقينا اصحاب كويسين رغم اختلاف طباعنا .. ولكن كالعادة مش بعمر ف أي سكن وبزهق من الدوشة والمرة دي كنت بجد جبت آخري . عشان تفهمو ال حصل تخيلو معايا الشقة ٣ أوض كل أوضة فيها ٣ بنات ماعدا أوضتي انا و هدير اتنين بس . ف الأوضتين التانيين معرفش حصل بينهم ايه وكانوا دايما ف خناق مع بعض وبيعاندوا جدا ف الصوت يعني احنا كان عندنا فاينال الترم الاول ودول بيعملو صوت عالي ومش مخليين الشقة كلها تعرف تذاكر.. والتانيين بيعاندوا ويعلو صوتهم . انا كنت بحاول اوفق بينهم يجماعة مش كدا انتو كبار وعاقلين . وساعة بيسكتوا وعشرة بيعملو مشاكل . حاولت افهمهم اننا ف أيام امتحانات وضغط بس مفيش . قولتلهم لو مبطلتوش ال بتعملوه هكلم صاحب السكن يتصرف. الحقيقة كنت بقول كده وخلاص قال يعني عشان يخافوا ونخلص من حواراتهم ولكن مش بيخافوا ومفيش حاجه اتغيرت . كده بقي طفح الكيل منهم وفعلاً كلمت صاحب السكن وقال هيجي يشوف الحوار .. وفعلاً تاني يوم كان عندنا صاحب السكن وحكيتله ع ال حصل . طبعا كان مجمعنا كلنا ف الصالة والبنات زعلو مني اني كلمته بس انا حذرتهم كذا مرة وهما ولا هنا وانا حرفيا لا عارفة اذاكر ولا انام بسببهم وقربت اكلم نفسي من قلة النوم . صاحب السكن قراره مكنش عادل ومش عارف يعمل ايه ف قالنا كلكم تمشوا من هنا مش عايز ولا واحدة فيكم الترم التاني . طبعا انا اتصدمت طب ي عمو انا وهدير كده مظلومين ولا عملنا صوت ولا مشاكل مع حد من اول الترم .. مسمعش لينا وقالنا كله يمشي. طب ياسيدي شكراً . هدير حاولت تقنعني نكلمه تاني ونعتذر له عشان نفضل ف السكن لانه حاليا وقت امتحانات وصعب ندور ع سكن تاني من الأول. بس انا رفضت اعتذر ع حاجه انا معملتهاش انا مغلطتش ف حد ولا عملت مشاكل مع حد.. وقلتلها اكيد خير ربنا جاي مش يمكن كل الدوشة ال حصلت دي عشان ربنا مخبيلنا الاحسن ويمكن نلاقي سكن افضل وناس كويسين بدل المشاكل دي . هدير : طيب ي أشرقت خلاص بكرا آخر يوم امتحانات وننزل مع بعض ندور ع سكن . أشرقت : ان شاء الله . وتاني يوم خلصنا امتحانات وبعد الامتحان ع طول نزلنا نشوف سكن وشوفنا أكتر من واحد ومفيش ولا واحد فيهم مناسب الا سكن واحد بس هو ف الاول مكنش عاجبني ولكن لما لقيت جنبه مسجد حبيته جدا عشان بحب أسمع صوت الآذان والصلاة بشكل واضح اوي وكأني جوا المسجد .. وبالفعل سكنا فيه خلاص .. وهنروح نقعد فيه من بداية الترم التاني ان شاء الله .
