حاولت انام ساعتين قبل ما انزل الصبح بدري بس مكنتش عارفه انام كالعادة للأسف . فتحت الماسنجر ولقيت كرلوله قافل ف سبت الفون مفتوح وقمت عشان اشرب .. رجعت لقيت الفون وقع من ع السرير .. اتخضيت ليكون اتكسر واول حاجه جات ف بالي ازاي هعرف اسمع الريكوردات بتاعت كرلوله ال عندي مستحيل الاقيهم كلهم عند حد تاني غيري .. ولكن قلبي اطمن لما لقيته ع الأرض وفيه صوت رنة ماسنجر . بس بيرن ع مين ف الوقت ده!! قلبي حسيته اتشال من مكانه وضرباته زادت جداً لما لقيته بيرن ع كرلوله وكمان فيديو كول . اتخضيت جداً قفلت بسرعه والحمد لله مكنش أونلاين .. معرفتش اعمل ايه من الصدمه عيطت!! .. المشكلة الفون بيعلق أحياناً عشان المساحه وطبعاً ياسين والريكوردات بتاعته السبب.. يعني الفون ساب كل الناس دي ورن عليه هو بعد كل الشهور وكل المدة دي !!! معرفش اعمل اي ف المصيبة دي.. يلهوي لو افتكر اني رنيت بقصد المصيبة فيديو كول كمان!! فضلت اعيط وخلاص مش عارفه اتصرف.. والله ياربي مش قصدي والله مليش ذنب ..بصيت ف الساعه كانت 4:36 Am .. اعمل اي طيب احذفها ازاي بس الرنة مش بتتحذف زي المسدج العادية . ولو سبتها وحدها كده بدون ما اقول حاجه ممكن يفتكرني قاصده اعمل كده وانا مش قصدي ولا كان ف بالي ان حاجه زي دي تحصل أصلاً. ف بعتله وقولت .. آسفة جداً بس والله الفون معلق ورن لوحده مش انا ال رنيت .. استنيت يرد بس كان قافل آخر مرة من ساعه .. يعم افتح بقي ما انت من الصبح أونلاين 😔.. حاولت انام بس معرفتش من التفكير دماغي كانت بتودي وتجيب وياتري لما يرد هيقول اي! هيضايق؟ ولا عادي!! يااارب عديها ع خير ..
نزلت الكلية وكنت كل شوية اشوف اذا ياسين رد عليا ولا لسه! وأخيراً رد الساعه 9:18 Am وقال .. مش محتاجة تتأسفي محصلش حاجه أكيد ولا يهمك .. كتبتله شكراً فقالي الشكر لله .. وبس كده ☺
ياااربي ع لطف رده الحمد لله مزعقش ولا قالي انتي مين وازاي ترني الفجر ع حد ميعرفكيش .. ولا اي حاجه من هذا القبيل.. رده كله يعني مش بس قالي حصل خير او عادي .. ده مش محتاجة اتأسف أصلاً محصلش حاجه أكيد ولا يهمك... أكيد مش محتاجه اتأسف عشان احنا واحد صح ! قول ي كرلوله قول متتكسفش😂😂😂. فرحت جداً جداً ب رده ده ويومي بقي كل سعادة بسبب ياسين كالعادة ☺ خلصت محاضرات وروحت السكن وكان باين عليا الفرحه .. منه: أشرقت غيري بسرعه يلا عشان انا جهزتلنا الغدا واوعي تقولي مش هتاكلي زي كل يوم ..
أشرقت: مش هاكل ايه ده انا هموت من الجوع يسطاااا عملتي اي ع الغدا بقي يقلبي! منه: 🙄🙄 أشرقت: مالك يبنتي بس بتبصيلي كده ليه هو انا قلت حاجه غريبه! منه:إلا غريبة مين دي ال جعانه لامؤاخذة!! اومال فين وش البومه ال كانت تقولي مليش نفس آكل كلي انتي .. انا هصلي وانام عشان اصحي اذاكر ..
أشرقت: يسطااا جعت والله اعمل اي يعني مكالش! مش كفاية كل المدة دي وانا منكدة عليكي قلت ابسطك شوية غلطانه يعني دنا غلبانه والله 😥 منه: لا مش غلطانه احكيلي بقي اي ال مفرح روح قلبي كده ! كرلوله وصل صح؟ أشرقت بتنهيدة : معرفش مش منزل حاجه تدل انه جاي لسه 🙂 .. منه:اممم لما شوفتك فرحانه كده افتكرته وصل .. مفيش حاجه هتفرحك غيره. أشرقت:ما هو برضو السبب في فرحتي لا تقلقي 😁 منه:هو ازاي يعني متحكي بقي بلاش الغاز .. أشرقت: بصي يستي انهارده الفجر ....
حكيت لمنه ال حصل بالتفصيل .. منه: طبعاً يسطاااا مش محتاجه تتأسفي. انتي مش غريبه يسطا😁😉.. أشرقت: بس يعبيطة مش كده هو يمكن قصده عادي يعني وارد جداً الفون يرن لوحده بالغلط ع اي حد وكده مش حاجه تاني! منه: اسكتي بس والله محدش عبيط غيرك عيطتي عشان موقف زي ده 😂😂 أشرقت: اسكتي والله اتخضيت جداً يعني بعد كل الشهور دي وانا ولا عمري كلمته ولا حاجه وجاي دلوقتي الفون الزفت ده يرن عليه!هيقول اي عليا اكيد هيفهم اني مراقباه ليل نهار ومش ناسياه.. منه: ايووووه هو ده المطلوب أصلاً🤭 أشرقت: نسأل الله التساهيل .. يلا بقي نتغدي ريحة البطاطس بالفراخ قمر هموت من الجوع ..
اتغديت وصليت العصر وطلعت ع السطح قرأت ورد القرءان وفضلت اسمع قرءان بصوت كرلوله .. كنت فرحناه اوي وكان عندي احساس قوي انه جاي انهارده حسيت انه هو ال هيصلي المغرب انهارده برغم انه نادراً ما كان بيصلي المغرب.. السنه ال فاتت كان دايماً يصلي العشاء والفجر .. كان فاضل يدوب خمس دقايق ع آذان المغرب وانا كنت واقفة ف بلكونة السطح وكلي يقين اني هشوف كرلوله وجاي جاي ع اول الشارع دلوقتي . فجأة سمعت صوت منه ورايا .. منه: واقفة هنا برضو زي كل يوم ! يبنتي انتي بتتعبي نفسيتك كده . كل يوم تقفي تستنيه كده ! أشرقت: متقلقيش انا متأكدة انه جاي دلوقتي وهيصلي المغرب كمان 💙 منه: اي ال مخليكي متأكدة كده ؟ أشرقت: قلبي حاسس جداً انه خمس دقايق بالكتير وهشوفه .. منه:اوعي العاشقة والولهانه يارب يجي يااارب .. مفيش ثانية واحده والمغرب أذن .. قولت الآذان ورا المؤذن وفضلت ادعي كتير ان كرلوله يجي انهارده ولو مكنش صلاة المغرب بصوته يبقي صلاة الفجر. ودعيتله ربنا يحفظه من كل شر وسوء ويسعده ويجبر بخاطره ويبعد عنه ولاد وبنات الحرام ويهديه ويصلح حاله وحال قلبه ويقربه ليه ويجعله من عباده الصالحين ويصرف عنه كل سوء وكل من أراد له السوء ويقرب له كل خير وكل من أراد له الخير .. وختمت الدعاء بدعوتي ال دايماً بدعيها.. يارب اجمعني ب ياسين ف حلالك عاجلاً غير آجلا يارب عجل باللقاء.. لسه يدوب بقول آخر دعوة ولقيته جاي من اول الشارع وباصص ع بلكونه السطح واضح جداً كان معاه أدهم صاحبه .. اول ما شوفته حسيت قلبي طاير من الفرحه وفضلت اتنطط لا إرادياً لدرجه انه هو وصاحبه لاحظو العبط ال بعمله وياسين ضحك 🤭 وصاحبه خبط ع كتفه كده وضحك .. منه: يبنتي اهدي ياسين بيضحك عليكي يعبيطة 😂😂 أشرقت:مش مهم خليه يضحك ربنا يجعله يضحك دايماً. منه: يعيني ع الحب 😉😁 صحيح مين ال معاه ده اول مره يجي حد معاه. . أشرقت: ده أدهم صاحبه عرفته عشان صورته ع الفيس لانه هو ده ال بيرخم ع كرلوله ..
