استنيت العشا بفارغ الصبر عشان يأذن وأصلي وأنام كانت اول مرة أنام فيها من وقت ما جيت من السكن .. يمكن منه عندها حق اطمنت شوية من ال كتبه ياسين حسيت ان كل الأيام ال كنت فيها مكتئبة مراحتش ع الفاضي . حسيت كل دعواتي وبكائي ف صلاة القيام ان ربنا يساعدني ويوضحلي مراحش ع الفاضي .. ربنا لطيف بعباده وأكيد مكنش هيسيبني محتارة كل المدة دي .. كنت فرحانه اوي يمكن هو بالنسبة لأي حد مجرد بايو عادي .. بس بالنسبالي مش كده . أثبتلي حاجات كتير كنت بدعي انها تبان .. هو صحيح ياسين ساب البايو يوم واحد وشاله لما اتأكد اني شوفته بس مش مشكلة. روحت انام لاول مرة وانا مبسوطة كده وشغلت قرآن سورة الشوري بصوت ناصر القطامي . بحبها جداً .. كان نفسي تبقي بصوت كرلوله بس للأسف عمره ما صلي بيها ..
ع الجانب الآخر :
أدهم : ياسين أخبارك اي . ياسين: الحمد لله ي أدهم كويس .. أدهم: يبني كويس من فين بكلمك كتير مش بترد عليا وطول الوقت مضايق ! مالك احكيلي مش انا صاحبك واخوك من واحنا صغيرين! انت من وقت ما رجعنا من قنا من كام شهر وانت مش زي منا اعرفك مش بنخرج زي زمان ولا بنتكلم وكل ما اقولك نخرج تقولي مش هينفع . الأول ع الأقل المسجد كان بيجمعنا بس للأسف دلوقتي حتي المسجد اتقفل.. والله وحشتني الصلاة وراك يصحبي .. في اي بقي احكيلي . ياسين:مهو مش هينفع نخرج فعلاً يعني مش شايف الحظر ال احنا فيه ده بسبب كورونا ! ده حتي المسجد ال الواحد كان بيرمي كل همومه في سجدة ممنوعين منه .. تخيل غضب ربنا علينا لدرجه ممنوع ندخل بيته!
أدهم : الوضع محزن للغاية يعني بجد الواحد قلبه مش مرتاح من ال بيحصل أول مرة نشوف الوضع ده .. إن نَجَوْنا فمن رحمة الله وإن هلكنا فواللهِ إنه لعدل من الله من كتر المعاصي والذنوب ال بقت ف كل مكان دي .. ياسين: فعلاً ربنا ينجينا ويردنا إليه رداً جميلا.. أدهم: اللهم آمين .. متتهربش يعم الشيخ من السؤال احكيلي مالك !؟ ياسين: مفيش ي أدهم ياخويا اطمن انا كويس .. أدهم: امممم حاسس في إن ف الموضوع . ياسين: إن ليه بس ؟أدهم: بصراحه شوفت البايو بتاعك من يومين تلاتة كده .. هو انت كنت كاتب لمين يسطا الكلام ده ؟ ياسين : كلام اي؟ أدهم: مش فاكره بالنص بس فيما معناه انك مش قادر تعمل حاجه ليه عشان تسعده .. وعاجز وغصب عنك ؟ هو مين ده يسطاااا😉 ياسين:يادي النيلة وانت شوفتها ازاي دي ؟ أدهم : بااااس قفشتك احكي فضفض ل أخوك وصاحبك وحبيبك فضفض يخويا انا هسمعك .. باسين: افضفض اي ! بقولك اي ي أدهم روح شوفلك حاجه اعملها مش فاضيلك انا عاوز انام .. أدهم: تنام اي بس احنا العصر دلوقتي . انت مش بتنام ف الوقت ده . متحاولش مش هسيبك غير لما تحكي وبالتفصيل الممل كمان .. ياسين: ياربي عليا مصاحب زِنانة .. اسمع يسيدي .. ياسين: بعت فويس ل أدهم بكل حاجه حصلت من البداية لغاية اللحظة ال بكلمه فيها..
أدهم: ياااه ي صاحبي كل ده شايله ف قلبك وانا أقول الواد مكتئب ليه . طب يسطا ايه اللي مضايقك دلوقتي مش فاهم؟ ياسين: يعني انا بعد كل الرغي ال قولته ده ومش فاهم!! بقولك قالتلي مش بتفكر ف جواز دلوقتي ولا تعرفني ولا تعرف اي حاجه عني وعمو فتحي هو ال كان بيكلمها عني وهي رفضت اكتر من مرة .. أدهم:اممم يمكن عموفتحي وصلها الفكرة باسلوب مش مناسب ! هو انت أصلاً قولتله يفاتحها ف الموضوع ده ولا هو من نفسه .. بص هو الموضوع معقد شوية انا كنت بشوفها صدفة خارجه من السكن السنة ال فاتت كنت بشوفها الضهر وهي رايحة الجامعه ف الأول هي مكنتش واخده بالها ليا . وانا والله كنت بحاول أغض بصري وغصب عني كنت ببصلها حاسس ف حاجه شدتني ليها معرفش هي ايه . عارف احساس لما تحس انك تعرف الشخص ده من زمان وبتحبه جداً من غير سبب وكأن ربنا أمر قلبك بحب الشخص ده .. أدهم : الله عليك يعم الشيخ روميو وايه كمان ! ياسين: يبني بطل رخامتك دي بقي وإلا مش هكمل واعتبرني مقلتش حاجه أصلاً . أدهم: خلاص يعم بهزر معاك كمل .. ياسين: بس يسيدي كنت بشوفها كتير بالنهار الفترة دي وانا خارج من صلاة الضهر او العصر وكنت بشوفها صدفة بالليل بتتمشي وحدها بس كنت بحسها بتضايق لو بصيتلها وانا بيكون غصب عني .. ده كان اول ترم اشوفها فيه كان وقتها الترم التاني . وبس جينا السنة دي اول الترم مكنتش بشوفها خالص وكنت بحاول انساها بس مش عارف .. مبتمشيش من خيالي . وبعدين كنت أحياناً بشوفها بس حسيتها اتغيرت ومبقتش تضايق لما تشوفني .. ولما لاحظتها بتروح عند عموفتحي ف السوبرماركت بتاعه تعمدت اروح وهي هناك بحيث اشوف رد فعلها وكده .. اول مرة لما شافتني هناك حسيتها اتصدمت وارتبكت كده ف رد فعلها حسسني انها اكيد بتحس بحاجه ناحيتي والا لو انا مهماش كانت اتصرفت عادي .. وبعدين حسيتها هي كمان بتتعمد تيجي ف نفس الوقت ال بكون فيه موجود .. لكن جات فترة شهر كده مكنتش بشوفها خالص لا ليل ولا نهار معرفش فجأة اختفت قلت يمكن مش خير ليا وفوضت أمري لله وحاولت أنساها ومعرفتش . ولقيتها فجأة ظهرت تاني وكل حاجه رجعت . لغاية ما هي كلمتني وقالت مبتفكرش فيا وان عموفتحي لما كان بيكلمها عني كانت بتضايق . حتي انا مرة كنت مكلم عموفتحي يقولها قدامي وكده بس اتعصبت جداً وردت بعصبية ومشيت اتكسفت وقتها من عم فتحي .. انا مش فاهم حاجه دلوقتي ! لو هي مش بتفكر فيا كانت بتنزل وقت ما بكون موجود ليه وبعتتلي الكلام ده ليه ؟ وليه وقت ما انا بكتب حاجات جزينة ف البايو هي كتبت لا استطيع ان أخرجك من عقلي ولا استطيع ان افعل شئ آخر !
