برغم الجو كان برد وقت الفجر . بس مكونتش قادرة أنزل شقتي . وقفت شوية ف البلكونه بعد ما ياسين مشي شغلت الريكورد لصلاة الفجر ال لسه مسجلاها وسمعته تاني وأنا بعيط ومش متخيلة انه ده آخر ريكورد خلاص .. مشاعري كانت مختلطة . ما بين الحزن ع فراق كرلوله من تاني وما بين السعادة لانه صلي بسورة الزمر وال عرف اني بحبها من بوست الفيسبوك . كنت عايزة اطمنه زي ما طمني وأحسسه اني معاه بقلبي . مكنتش عارفه اعمل اي ومفيش حل عندي غير الفيس ف كتبت بوست ...
تذكر دائما اني هنا بجانبك يا صديقي . أنا هنا معك للأبد لا تدع باب اليأس مفتوحا . اغلقه وبقوه فأنا لن أتركك أبدا .. قد تُفرِّقنا الأيام والسنين . قد لا تَنبض قلوبنا برؤية كلا منا الآخر لفترة لا يعلمها إلا الله . لكن أشعر أن قدرنا أن نلتقي مرة أخري وعندها لن نفترق ابدأ .. لا أعلم متي وكيف سيحدث ذلك . يكفيني ثقتي بالله أنه لن يخذلنا . استودعك الله يا رفيق قلبي إلي أن يعود لنا نبض قلوبنا مرة أخري فرِحاً باللقاء ..
متأكدة ياسين بيفتح صفحتي وهيشوف البوست ده وهيفهم انه أقصده هو بالكلاام ده . يارب بقي يفرح عشان حساه مش كويس وفيه حاجه مضايقاه معرفش سبب الحزن ده بس بتمني اقدر ادخل السرور لقلبه زي ما هو دايما بيكون سبب سعادتي ..
كتبت البوست وتأكدت انه كرلوله أونلاين يعني أكيد هيشوفه . بحب جدا كل يوم قبل ما أنام أشوفه أونلاين بحس بأمان وراحة مش طبيعيه . صحيت بعد الضهر صليت وبعدها رتبنا شنطنا وخلاص هنمشي للاسف السكن هيقفل انهارده وبنات كتيييير مشت من أول ما انتشر خبر تأجيل الدراسة . طبعا أنا فضلت أقنع ف ندي عشان نقعد الكام يوم دول وأعرف أشوف ياسين لفترة أطول عشان بابا مش هيرضي واحدة فينا تنزل البيت والتانية لسه ف السكن ! الحمد لله قدرت أستغل كل الوقت واشوف ياسين وان شاء الله مش هنطول ف الاجازة .. ركبنا أنا وندي ومنه عربية واحدة ومروحين . منه من نفس مركزنا بس احنا ف المركز وهي ف قرية جنبنا ف بنمشي ف مواصلات واحدة . طول الطريق وأنا حاطه الهاندفري وبسمع قرءان بصوت ياسين . دموعي مكتومه ومش عارفه اعيط وسط الناس ومش عارفه اوقف اسمع قرءان بصوت ياسين !! (ربنا أفرغ علينا صبرا )
ندي: مالك ي أشرقت ساكته من أول ما ركبنا ليه ؟ أشرقت : مفيش ي ندي عادي . ندي : زعلانه عشان راجعين البيت وأسلوب ماما ال بتعاملك بيه ! أشرقت : لاء خالص . متشغليش بالك انتي . ندي: ازاي مشغلش بالي بأختي ؟ الوضع دلوقتي اتغير ي أشرقت متشيليش هم أنا هساعدك فكل حاجه وهحاول ابعد ماما عنك وانها متعملش معاكي مشاكل وان شاء الله هي كمان تعرفك ع حقيقتك الطيبة وتتوب لربنا عن معاملتها ليكي ونبقي أسرة بجد . أشرقت : يارب ي ندي ☺ منه جنبي سامعه كلامنا ومش بتتكلم ولا بتقول حاجه . لقيتها فجأه مسكت ايدي وشدت عليها بخفه وكأنها بتحاول تقولي هوني عليكي أنا حاسه بيكي وعارفه سبب حزنك الحقيقي . وبصتلي بابتسامه بدون ما تتكلم وكأن عيونها جواها يقين انه حزني مش هيدوم بإذن الله 💙 .
عدي يومين ع رجوعنا للبيت . كانت كل حاجه عاديه وتماام إلا احساسي بياسين .. مازلت حاسه فيه حاجه والمشكلة هو مش موضح ده ولا كاتب اي بوست من أربع أيام ومش موضح حزنه أصلا ولا حتي رد ع البوست ال كتبته عشانه 😔 يعني انت شوفته ولا لاء . طب ليه أحيانا توضحلي إنك بتابع كل حرف وكلمه بكتبها وأحيانا تتجاهلني! ليه تسيبني بين الوهم والحقيقة ! ليه تسيبني لحيرتي وحزني!! حتي آخر بوست كان فيديو قرءان . ومن فترة مش بيكتب بوستات حزينه زي الأول . وقت ما كنا في السكن وبشوفه يوميا كنت اطمئن عليه لما أسمع صوته ف الصلاة . أو لما بشوفه ف الحقيقة قدامي بعرفه إذا كويس أو لا . بس دلوقتي مش عارفه أشوفه بس إحساسي بيه مازال قوي .. مكنتش عارفه أعمل اي فقمت صليت ركعتين قضاء حاجه ودعيتله ربنا يفك كربه ويسعد قلبه ويجبر بخاطره ويصرف عن كل سوء .. وعملت نفسي دخلت اوضتي أنام وأنا كنت بعيط وبسمع الريكوردات بصوته هي الحاجه الوحيدة ال بتهون عليا .. بعد ساعتين كانت الساعه 3 الفجر . اخيرا كرلوله نشر ستوري فيس . بس ستوري كئيبة 🙂 كانت صورة سوده كده مرسوم فيها شخص ملامحه كلها حزن وخيبة أمل . وبيبص من شباك اوضته . ومكتوب عليها : مازلت هنا لأني لا أريد أن أكون السبب في حزن أمي ..
ياربي أنا احساسي صح يعني هو حزين بجد مش مجرد احساس . بس مش فاهمه مازلت هنا فين ؟ يمكن قصده لسه موجود ف قنا ومسافرش بيته .. وهو حزين ومش عايز يرجع البيت وهو حزين عشان مامته متزعلش عليه ؟؟. مش فاهمه غير كده ! خدتها اسكرين وبعتها ل منه وقلتلها ع ال فهمته منها ..
منه: ايوه يمكن قصده كده فعلا حتي انا كنت هقول زيك خاصة آخر صلاة فجر وهو بيصلي بسورة الزمر كان صوته حزين ي أشرقت .. اشرقت: ايوه حصل 😔 سمعتيه ي منه ! صلي بسورة الزمر ال كنت منزله عنها بوست اني بحبها . منه : سمعته ومتأكدة انه شافه وكان قاصد يصلي بيها عشان يفرحك .. اهي واضحة دي وش مش صدفه ولا حاجه عشان لو جبتي سيرة الصدف هعملك بلوك 🙂 أشرقت : هجيلك البيت عادي مش هتخلصي مني بسهوله 😁 ..
خدت شوية صغيرين اكلم منه .. رجعت اشوف ياسين ليكون كتب اي حاجه تاني بس مكنش كتب حاجه . مش هاين عليا اسيبه كده برغم اني كتبت بوست قبل ما اسيب السكن ع أساس يفرح لو شافه وهو معملش أي رد فعل 🙂 افتكرت ليا كتييير جدااا مش بعتله أي حاجه ع صراحه قلت ابعتله حاجه تفرحه وكتبت ..
حاسس بيك ياصديقي وإنك مش كويس فقومت صليت ركعتين قضاء حاجه ودعيتلك ربنا يصرف عنك كل حزن وهم وغم ويجبر بخاطرك ويفك كربك . معرفش سبب حزنك اي . بس سيبها ع الله يدبر الأمر وان شاء الله كل حاجه هتبقي تمام ..
خد حوالي ربع ساعه ورد ف البايو عنده وكتبت : ان شاء الله . تسلم يا صديقي ع اهتمامك ده .. هو اي ده ي كرلوله 🙄 بقولك بدعيلك تقولي تسلم !😒 كتبتله :مفيش حاجه تقولها غير تسلم دي ! 🙂 فرد : اومال اقول اي؟ ... كتبتله : قول أي حاجه ادعيلي مثلا . فرد : أنا معرفش انت مين عشان ادعيلك ! هدعي اقول اي؟؟ أشرقت : اممم متعرفش!! هيكون مين يعني ال بيهون عليك وبيهتم لحزنك من زمان غيري وانت عامل فيها مش واخد بالك 😒 فكتبتله : مش لازم تعرف أنا مين ادعيلي وخلاص . فرد : ازاي لازم اعرف اسمك عشان ادعيلك . فكتبتله : مش لازم تعرف لو مش عايز تدعي متدعيش خلاص 🙂 فرد : خلاص هدعي ان شاء الله ..
اشرقت: يعني أنا كنت عايزة احسسك انك مش لوحدك واحدهم يهتم لامرك وانت عامل فيها متعرفش !!😒
ياسين ف غرفته : يا تري مين ال بيبعت ع صراحه ده . مش يمكن أشرقت !! معتقدش حد غيرها يارب بجد تكون هي يااارب ..
أشرقت :حسيت رد ياسين مستفز وال هو مصمم يعمل نفسه ميعرفش حاجه فكانت لحظه تسرع وعبط مني وكتبتله .. انت هتفضل كده كتير ؟ فرد : مش فاهم !! افضل كده ازاي يعني ؟ فكتبت : خلاص مش مهم سيبك .. افتكرتك هتفهم .. فرد : مش مهم !! مش مهم أي حاجه فعلا .. يمراااري مالك يعم انت فرفش كده زعلان ليه .. فكتبت : خلاص يسطاا متزعلش مفيش حاجه مش مهمه . فرد : اي المهم واي ال مش مهم؟ فكتبت: اقصد يعني هتفضل كده كتير زعلان ؟ توكل ع الحي الذي لا يموت وسيب كل أمورك لله هو سبحانه قادر ع زوال كل ما أهمك واحزنك . يدبر الأمر من السماء إلى الأرض . فلتطمئن انت مش لوحدك ربنا معاك وانا كمان دايما بدعيلك .. فرد : شكرا يا صديقي ع اهتمامك ده ممكن اعرف انت مين بقي ؟ فكتبت: مش مهم تعرف المهم انك متفضلش حزين وبس . فرد : مهم مهم مهم مهم .. قول اي حاجه وأنا هعرف حتي لو تلميح او موقف بسيط حصل بينا.. اشرقت: ياربي اي ال دخلني فكل ده مخلااص ي عم ياسين الله !! دي مكانتش رساله افرحك بيها وخلاص 🙂
كتبت: مش هعرف اقول تلميح . قول انت طيب تلميح عن الشخص ال ف بالك واقولك انا صح ولا غلط . ياسين: طب بلااش تلميح او موقف .. قول أول حرف من اسمك . ممكن ممكن ممكن ؟؟؟؟ اشرقت: في اي ياربي شارب اي انت يسطا ع المسا كده !!
كتبت : ولا ينفع اقول اول حرف . قول انت طيب أول حرف من الشخص ال ف بالك وأنا هقول صح ولا غلط . ياسين : اي يعم انت بتعاملني كده ليه يعم😢💔 اشرقت: مش لسبب والله بس مش هينفع تعرفني . بص اعتبرني مكتبتش حاجه اصلا .. ياسين : خلاص ياصديقي كنت بتمني اعرف أي حاجه فعلا 😢 أشرقت : ان شاء الله قريب يمكن اقولك . ياسين: امتي طيب وبتحدده ع أي اساس ؟ اشرقت: معرفش ! بصراحه قلت كده وخلاص عشان معنديش رد .. بقولك اي .. قوم صلي الفجر هيأذن . ياسين: تماام ياصديقي شكرا لاهتمامك ..
أشرقت ف غرفتها: ماله ياسين حصله اي !! أول مرة يبقي مصمم كده يعرف مين ال بيبعتله كل فترة والتانيه! اه صحيح مش دايما ببعتله بس فعلا معظم الرسايل كلها حاجه مطمئنة كده . معرفش ازاي الصبر ده عنده بصراحه وعادي كده ميعرفش مين ! انا لو مكانه كان دماغي لفت ..
ياسين ف غرفته: هيكون مين يعني غير أشرقت مفيش غيرها أنا عارف أسلوبها وترددها 😂 أصلا عارف انه انتي بس حبيت اتأكد وتأكدت . الحمد لله لسه الفجر هيأذن اقوم بقي ع بال ما أوصل المسجد ع وقت الإقامة ..
