رجعنا السكن وذاكرت شوية لغاية الساعة 1 قلت اروح انام شوية عشان اصحي الفجر .. الحقيقة معرفتش انام ف اليوم ده من الفرحة .. كنت فرحانه اوي ان شيرين بنفسها اتأكدت كرلوله معجب بيا .. انا والله بحبها شيرين بس تصرفاتها وغيرتها مني مش بحبها يلا مش مشكلة ان شاء الله ترجع زي الأول ..
سمعت ريكورد صلاة فجر امبارح بصوت كرلوله عشان انام بس مكنش جايلي نوم برضو . فقمت صليت قيام وقرأت شوية قرآن وطلعت اقعد ع السطح لوحدي. . بحب جداً اقعد وحدي وقت قبل الفجر كده والشوارع فاضية مفهاش حد وأسمع قرآن يسلااام عظمة والله .. لقيتني لا إرادياً بفكر ف ياسين وحاسة اني عاوزه اعرفه اكتر عاوزه اعرف عنه كل حاجه .. بس ازاااي !! بس لقيتها ازاي مفكرتش كده من زمان ؟ انا هحاول أجمع صفحته ع الفيسبوك بس ازاي دنا معرفش اسمه غير ياسين بس .. وشوف بقي فيه كام أكونت باسم ياسين .. مش مشكلة هفضل ادور لغاية ما ألاقيه .. دورت كتير اوي حوالي ساعة وشوية بس بدون أي نتيجة معرفتش اجمع صفحته .. بس انا مش هيأس هدور تاني وتالت وعاشر .. الفجر كان خلاص بيأذن .. طبعاً مش هنزل أوضتي دلوقتي لازم أشوف كرلوله الأول .. هو دايماً بيجي بين الآذان والإقامة.. كنت واقفة مستنياه وهموت من البرد . الجو برد اوي واحنا في شهر 1 رغم اني كنت لابسة تقيل بس الجو ع السطح برد جدا .. بس مش مشكلة انا بفرح لما بشوف كرلوله وهو جاي . والشارع فاضي ومفيش غيره ماشي فيه . وهو ماشي كده بهدوء .. اي ده ثواني كده ده بيبص ع السطح اه والله بص ع البلكونه انا متأكدة.. يلهوي ليكون عارف ان دي أنا .. لا لا أكيد مش هيعرفني .. ده تلاقيه اتخض أصلاً من الزعرورة اللي عملاها ف شعري دي ولابسة عليها الطرحة كمان ف الضلمة دي أكيد افتكرني عفريت ولا حاجه 😂😂. كان نفسي أقوله كرلوله متخافش يسطا دي أنا 🤭🤭 ..
أقاموا الصلاة وكرلوله بدأ يصلي وكان صوته جميل جداً وهاااادي مع هدوء الفجر .. كان بيقرأ بعض من آيات سورة البقرة .. اتأخر المرة دي ف الصلاة يعني خد حوالي ربع ساعه .. وانا واقفة تلجت ايدي ورجلي مش حاسة بيهم من البرد .. أخيراً ياسين خرج من المسجد وشوفته وهو ماشي ومرضتش انزل غير لما اتأكد انه مشي خلاص ودخل شارع السكن بتاعه .. كنت نازلة وقابلت منه ع السلم كانت جيالي ..
منه: يشيخة حرام عليكي تخليني اسيب الدفا والبطانية ف وقت زي ده .. أشرقت: ايه خير في ايه؟ منه: صحيت ع صوت الصلاة ملقتكيش قولت ممكن تكوني بتتوضي بس مكنتيش تحت . قولت أكيد قاعدة ع السطح .. يبنتي مش كل يوم كده حرام عليكي نفسك .. أشرقت: ليه يعني حصل ايه مش انتي اللي قولتيلي مينفعش اقف علي الشباك ف أوضتنا عشان شيرين؟ منه: اه بس مقولتش تطلعي كل يوم السطح ف الجو التلج ده هتتتعبي كده . أشرقت: يروحي يعني انتي جاية من تحت عشان خايفة عليا .. منه:اومال عشان ايه يلا بقي انزلي .. أشرقت: حاضر انتي تؤمريني يقمر انتي ..
كل يوم حبي ل منه بيزيد أكتر وأكتر دايماً بتخاف عليا من أقل حاجه . حاسة ربنا عوضني عن كل حاجه وحشة ف حياني بيها . هي أختي اللي مخلفتهاش أمي ... تاني يوم العصر .. منه: أشرقت قومي ذاكري هما خلاص آخر مادتين اللي فاضلين سيبي الفون ده وقومي ذاكري . أشرقت:مش قادرة والله ي منه زهقت من المذاكرة وبعدين ضهري هيموتني حاسه غضم ضهري ب أكتافي كله مكسر معرفتش انام بسببه .. منه:طبعاً تلاقيكي خدتي دور برد ف ضهرك عارفة ليه حضرتك!! عشان كذا مرة اقولك بلااش السطح بالليل بس اقول ايه لا حياة لمن تنادي .. أشرقت: اهو بقي اللي حصل انا هعمل ايه يعني .. منه: قومي ننزل الصيدلية نشوف الدكتور هيقولك ايه وتاخدي حاجه تخفف الألم اللي عندك .. أشرقت: لااااء صيدلية ايه بس هو انا قادرة اقوم . انا هتغطي بالبطانية اهو وهلبس جاكيت كمان عشان ادفي وهخف عادي. سيبيني بقي اركز ف اللي بعمله .. منه:هتكوني بتعملي اي يعني ف الفون بتذاكري مثلاً .. وريني كده بتعملي ايه .. أشرقت:ي منه هاتي الفون بقي خلاص .. منه: امممم وانا اقول البنت ليها فترة بتمسك الفون كتير وع طول اونلاين ع الفيس بتعمل ايه ؟ أتاريكي بدوري ع صفحة ياسين .. ذاكري يختي احسن ذااكري خليها تعدي ع خير . أشرقت: هتعدي والله . أصلاً مادة بعد بكره دي مخلصاها مرتين وآخر مادة دي فرعية وسهلة يعني مش حوار .. هاتي بقي الفون . منه:خدي اهو بس شوية كده تقومي تذاكري . أشرقت :حاضر والله ..
عدي اليومين وروحت الامتحان والحمد لله حليت كويس . بس المشكلة ألم ضهري بيزيد ومش بعرف انام ولا اتحرك بسببه .. ف روحت الصيدلية والدكتور اداني شوية أدوية كده والحمد لله بتحسن يوم عن التاني.. طبعاً لسه ميأستش وفضلت ادور ع صفحة كرلوله ع الفيس لغاية ما أخيراً لقيتها . كان اسم الصفحة Yassin Ali كان عامل صورته صورة شخصية بس مكنتش متأكده هو ده ولا اي لانه معرفش ملامحه لسه والصورة كانت سيلفي كمان .. بس حسيته هو من شعره الكيرلي اللي انا عارفاه من كتر ما بشوفه من البلكونه. ف ناديت منه تأكدلي أكتر انه هو او لاء ..
