رجعت السكن وانا مش مستوعبة ال حصل لسه وفرحااانه جداً من جوايا .. اول مرة الاحظ بجد ان كَرْلُولَه فعلاً بيبص عليا بقي وكده .. ده غير يدوب ف ثانية كده لمحت شكله بسرعه .. للأسف مازلت معرفش ملامحه برضه لكن اللي قدرت اشوفه انه عنده غمازة دقن زيي او اسمها طابع الحسن .. الله احنا الاتنين عندنا منها ..
طبعاً اول ما دخلت الأوضة منه سألتني ها حصل اي كعادتها.. حكتلها كل اللي حصل بالتفصيل ومثلتلها كمان كل حركه عملها كرلوله .. منه: ياروحي ي ياسين أكيد اتكسف وبسرعه غمي عينه . أشرقت: ايوه يبنتي وقال استغفر الله العظيم. منه: 😂😂😂 بيستغفر عشان معرفش المرة دي يغض البصر كعادته . يبنتي ده وربنا كان تحسيه هيخبط ف الرصيف وهو ماشي من كتر ما كان يبص ع الأرض .. أشرقت : 😂😂 هو كان باصصلي بتركيز كده عشان عموفتحي مكنش موجود . لكن لما بيبقي موجود بيتكسف يبص ع حد .. منه: ايوه حصل . أشرقت: ااه تماام .. منه: اي ده ماالك في ايه! أشرقت : معرفش .. تفتكري هو فعلاً معجب بيا ولا كان مستغربني أصل انا لسه صاحية وشكلي باين عليا كنت نايمة وتعبانه من الامتحانات وكده .. منه: بس يعبيطة والله انتي قمر جداً يعني وانا متأكده انه هو بيحبك . ابتسمت ومعرفتش ارد بايه ف قولتلها .. صح عارفة عنده طابع الحسن زيي .. اول مره الاحظها فيه . منه: الله انتو الاتنين زي بعض .. يمكن عشان كده عموفتحي قالك انكم شبه بعض .. أشرقت: ااه ممكن فعلاً واحنا بنتكلم جات شيرين ..
شيرين : بتتكلمو في ايه بقي ! منه: كرلوله هو احنا ورانا غيره .. شيرين : يااه هو انتو مش معاكو حاجه تتكلمو فيها غير ياسين . وأخرة كل ده ايه يعني .. أشرقت : ازاي مش فاهمه! شيرين : يعني قصدي لو بيحبك كان خد خطوة ع الأقل وكلم عموفتحي عنك وكده .. معرفش ليه شيرين بتتكلم معايا كده وأسلوبها اتغير معايا من فترة حاولت اطنش بس مش عارفة .. كنت لسه هرد عليها لقيت منه هي اللي ردت . منه: ومين قالك ي حبيبتي انه مكلمش عموفتحي عنها ده خلاها تشوفه ف السوبر ماركت بتاعه كمان وقالها اهو الشيخ ياسين اللي بكلمك عنه .. ده كان ف اليوم اللي نزلنا ندور عليكي فيه..وعرض عليها الجواز منه ولا بتاع ست مرات بس أشرقت مكنتش عارفة تتصرف تقوله ايه فكانت بتزعق وخلاص وبيبان من أسلوبها انها رافضة.. مش بس كده ده كمان كل ما تروح السوبر ماركت يروح قبلها عشان يشوفها وانهارده كمان راح وراها وكان باصلها بتركيز جدا ولما هي لاحظته غمض عينه بسرعه واستغفر وعمل نفسه بيلعب ف الفون . كل ده وتقولي مش معجب بيها . لما هو مش معجب بيها بيعمل الحركات دي ليه . ياسين ده انا اعرفه من قبلكم كلكم وهو فعلاً اتغير من اول ما شاف أشرقت.. شيرين: بجد ي أشرقت!! يارب بقي يحصل بجد وتتخطبو كده ونفرح بيكي . أشرقت: ان شاء الله.. حسيت شيرين من كلامها انها مش فرحانه وكده بس عديتها عادي .. شيرين: لما تنزلي بقي تاني هنزل معاكي .. أشرقت : ماشي .
حسيتها من كلامها عاوزه تتأكد اذا فعلاً ياسين معجب بيا ولا لاء. معرفش هي اتغيرت كده ليه انا كنت بحبها ف الاول وبعاملها زي منه .. بس حاجه من ناحيتها جوا قلبي اتغيرت ..
عدي كام يوم ونزلت السوبر ماركت تاني بس كان بالنهار انا كنت متعمدة انزل ف الوقت ده ومنزلش بالليل مش عاوزه اتعود اشوف كرلوله كتير . في حاجه جوايا خايفة منها بس معرفش هي ايه!!
دخلت الماركت واشتريت اللي محتاجاه وانا باخد باقي الفلوس وقعت مني .. كنت واقفه ف نفس المكان اللي بيقعد فيه كرلوله للحظة حسيت كأني شايفاه واتوترت ف ايدي اترعشت ووقعت مني الفلوس بدون قصد.
عموفتحي قالي وهو مبتسم.. ايه ده .. الفلوس وقعت هنا ليه هو في جاذبية ف المكان ده ولا ايه !؟
اتكسفت جداً طبعاً انا عارفه قصده ع مين .. معرفتش ارد ابتسمتله ومشيت . لما رجعت السكن حكيت ل منه ع اللي حصل .. منه: ياربي عموفتحي لئيم والله . كبير ف السن بس لئيم . أشرقت :فعلاً والله .. منه: يعبيطة كنتي قولتيله قصدك ايه اكيد كان هيكلمك عن كرلوله تاني ويشوف رأيك بعد ما كذا مره شوفتيه وهو شافك .. أشرقت: معرفش بقي ي منه معرفش ليه دايماً مش بعرف ارد عليه .. منه: متقلقيش ي حبيبتي كله خير . أشرقت :ان شاء الله . اومال شيرين فين؟ منه : لسه مجاتش من الجامعة.. بقولك ي أشرقت البت دي بتغير منك جدا جدا والله انا قلتلك كده من الأول . بلاش تبيني انك فرحانه لما بتشوفي ياسين بلاش تخليها تحس بحاجه ولا تقفي ع الشباك قدامها.. أشرقت: انا حسيت كده برضه .. هحاول ان شاء الله .. هحاول ولو اني مش عارفه هعمل كده ازاي واحنا قاعدين في اوضه واحدة..
