الأيام بتعدي بصعوبة جداً .. مبقتش عايزة أعيش تاني .. الأرق بيزيد عندي بشكل كبير جداً ممكن أنام أربع ساعات ومش متواصلين في ٣ أيام ال هو كل يوم ساعه وشوية !!؟
معرفش السبب في ده اي .. لا باخد علاج يعملي كده ولا حاجه .. بعمل مجهود كبير عشان أتعب وأنام ومفيش فايدة . بنزل كل يوم بعد صلاة العشاء أتمشي حوالي ساعتين متواصلين عشان أتعب شوية وأرجع أنام بس للأسف مفيش فايدة .. والله بقيت أبكي بدموعي بس عشان عايزة أنام ومش عارفة!! حتي التفكير مش بفكر عشان أفضل صاحية !
أنا مؤمنة بقضاء الله جداً ومؤمنة بكل حاجه بتحصلي لحكمة ما سواء الشئ ال بطليه من رينا هيحصل أو لا . ف المستقبل عندي مش شايله همه .. الله سبحانه وتعالي يُدبر الأمر فمش مستاهلة أرهق نفسي في التفكير ..
قبل ما أنام بحب أحط السماعة وأسمع قرآن . الأول بسمع ياسين وبعدين بشغل سورة البقرة بصوت القطامي .. سورة البقرة حوالي ساعتين .. كان في مُخيلتي إني هنام قبل ما تخلص . بس للأسف بتخلص وبتتعاد تاني وأنا لسه صاحية .. حرفياً ممكن أقعد خمس أو ست ساعات ع السرير مغمضة عيني بحاول أنام ولكن كلها محاولات تبوء بالفشل! ..
يارب لطفك ..
قبل المغرب بنص ساعة وقفت ف البلكونة وكنت بكلم ربنا وبشكيلة من كل حاجه تعباني .. أكتر وقت ف اليوم مفضل عندي هو الوقت ده قبل المغرب بشوية وأفضل أحكي لربنا عني .. بحس براحة مش طبيعية بعدها .. وبحس إني مش محتاجة أحكي مع أي إنسان .. واقفة وبدعي ياسين يجي الأيام دي هو ال بيهون عليا .. كفاية عندي كل يوم بسمع صوته 3 مرات في الصلاة .. وحشني الصلاة بصوته وخشوعه جداً .. واقفة في مكاني المعتاد ف البلكونة وإذ فجأة ظهر ياسين .. يا الله لسه مكملتش الدعوة .. حسيت قلبي طاير من الفرحة أول ما شوفته مكنتش مصدقة والله وأخيرا .. كان يوم 23/2/2021 .. فرحتي برجوعه نستني زعلي منه إنه اتأخر عشان يجي .. كمان هو ال أذن المغرب عشان كده اتفاجأت لما شوفته لأنه جه قبل الآذان بخمس دقايق .. أنا متعودة أقف ف نفس المكان ده أستناه كل يوم ع أمل إنه يجي .. ودايماً بيجي بين الآذان والإقامة .. المرة دي هو ال أذن المغرب .. يا الله ع جمال صوت الآذان منه .. زمان أيام إعدادي كنت مستحيل أقدر أسمع الآذان بصوت عالي قريب مني .. كنت بصدع وبتعصب جداً معرفش ليه!! بس ياسين الوحيد ال بحب الآذان بصوته ..
ياسين صلي المغرب وقرأ فيها أول ركعة من سورة البقرة . سبحان الله نفس الآيات دي كنت بسمعها بصوته امبارح من تسجيل قديم .. والركعة التانية قرأ من سورة يونس .. هو للأسف مكنش مركز واتلغبط ف الآيات .. بدأ قال :
( وَٱضۡرِبۡ لَهُم مَّثَلَ ٱلۡحَيَوٰةِ ٱلدُّنۡيَا كَمَآءٍ أَنزَلۡنَٰهُ مِنَ ٱلسَّمَآءِ فَٱخۡتَلَطَ بِهِۦ نَبَاتُ ٱلۡأَرۡضِ) افتكرته هيقرأ من سورة الكهف لأنه الآية دي في سورة الكهف أصلاً بس بعدها كمل في سورة يونس !🙂 كان المفروض يقول :
(إِنَّمَا مَثَلُ ٱلۡحَيَوٰةِ ٱلدُّنۡيَا كَمَآءٍ أَنزَلۡنَٰهُ مِنَ ٱلسَّمَآءِ فَٱخۡتَلَطَ بِهِۦ نَبَاتُ ٱلۡأَرۡضِ مِمَّا يَأۡكُلُ ٱلنَّاسُ وَٱلۡأَنۡعَٰمُ)
بس هو اتلغبط بين الآيتين وكمل في سورة يونس .. شكله من تعب السفر وكده مش مركز .. ربنا يتقبل منك ويعفو عنك خطأك يارب يا ياسين .. حبيت جداً صوته وهو بيقول
