صحيت بدري عشان المحاضرات واليوم كان متعب جدا بالنسبالي عشان منمتش كويس . صدقت ما خلصت محاضرات وروحت واتغديت انا ومنه وشيرين . وبعد ما صلينا العصر ..
شيرين : ها بقي احكيلي حوار الكيرلي ده . أشرقت : مفيش ولا حوار ولا حاجه والله عادي انتو مكبرين الموضوع بس . منه: اسكتي بس انتي مش فاهمه حاجه .. هقولك انا ي شيرين بصي ي ستي البت أشرقت دي غريبة الأطوار اول ما جات السكن كانت بتتعصب جدا من صوت الكيرلي وبتزعقلي وتقولي اقفلي الشباك صوته عالي ومزعج ومش حلو ونينينيني. أشرقت :انا برضو . منه: اه طبعاً وأكتر من كده كمان .. أشرقت :ده كان زمان ع فكرة . شيرين : اومال ايه اللي حصل ؟ منه: اللي حصل ي ستي انه الكيرلي اول ما ننزل الشارع مش بيلمح حد فيه غير أشرقت وعيونه بتطلع قلوب كده و.. أشرقت: يبنتي بقي مش هتبطلي الأفورة ال انتي فيها دي ؟منه: ملكيش دعوة خليني أكمل بقي . المهم ي شيرين عمو فتحي بتاع الخضار ال تحت السكن مرة كنا بنشتري منه ف قال ل أشرقت ايه رأيك ف الشيخ اللي بيصلي عندي واي رأيك ف صوته أصل انا بدورله ع عروسة وشايفك مناسبة وكلام من ده . شيرين :وااااو بسرعة كده . منه:اسكتي يختي أشرقت ما شاء الله عليها تاخد جايزة نوبل ف الدبش زعقت ف الراجل وقالتله لاء انا لسه مخلصتش دراسة وانا معرفوش .. أشرقت : الله منا عندي حق علي فكره انا اه مخلصتش تعليم لسه وفعلا معرفش بيتكلم عن مين . شيرين : يعني اي هو مش قصده ع الكيرلي ؟ أشرقت : الله أعلم عشان لو تلاحظي في حد تاني بيصلي المغرب دايماً حتي الكيرلي وقتها مكنش بيجي كل يوم الصلاة ف ممكن يبقي قصده ع حد تاني . منه: لا ان شاء الله قصده علي الكيرلي. أشرقت : مش مهم قوموا بقي خليني أذاكر شوية .. شيرين : مشوفتوش عموفتحي عمل اي ف المحل بتاعه ؟ أشرقت :ايه عمل اي؟ شيرين : حوله لسوبرماركت بدل محل الخضار . منه: بجد خير ما عمل اهو هيبقي أقرب حد لينا .. استني أما أبص عليه من الشباك كده ..
خلص اليوم والمغرب أذن بس الكيرلي مش هو اللي صلي المغرب . لكن هو اللي صلي العشاء . نزلت بعد الصلاة عشان اجيب حاجات من السوبر ماركت انا ومنه وشيرين . هو كان واقف ف الشارع بعد الصلاة . كان واقف لوحده استغربته بس عادي هو انا مالي . اللي ضايقني بقي عمو فتحي قالي تاني ع حوار العريس انا افتكرته نسي من السنة ال فاتت خلاص بس لاء مش بينسي. عمو فتحي: ما شاء الله عليكي يابنتي وع أخلاقك انتي لازم تتجوزي شيخ يبقي محترم كده ويصونك . أشرقت : ان شاء الله ي عمو ادعيلي . عموفتحي : ان شاء الله عريسك عندي خلاص أحسن واحد صلي في المسجد عندي . أشرقت : احم ان شاء الله عن اذنك ي عمو ..
منه: يبنتي بقي ما تبطلي أسلوبك ده ليه كل مرة بتهربي من الكلام . أشرقت :معرفش والله معرف ي منه هو بيضايقني حساه مش بيتكلم جد كده يعني يمكن بيتكلم بصفه عامة . شيرين : صفة عامة اي بس انتي عبيطة ! بيقولك عريسك عندي أحسن حد صلي ف المسجد عندي هيبقي مين غير الكيرلي يعني ..
أشرقت : الله أعلم يعم سيبك منك ليها يلا نرجع السكن عايزة انام انا منمتش كويس ..
معرفتش انام ع طول دماغي كانت مش فاصلة تفكير طب انا ليه كل ما عموفتحي يقولي ع عريس بتعصب وبقفل معاه الحوار وأمشي ؟ ليه بتهرب زي ما قالت منه ! يمكن خايفة فكرة اني اتعلق بحد ويسيبني .. او ايه مش عارفة بالظبط .. بس خلااص لازم انام عشان اصحي لصلاة الفجر .
صحيت صليت الفجر انا ومنه وشيرين وطبعاً عملت ريكورد لصلاة الفجر بصوت الكيرلي . معرفش ليه كل يوم بتشد ليه أكتر مش فاهمه اي العبط ده يعني محصلش اي موقف بينا أصلاً عشان اتشد ليه بالشكل ده .. بعد الصلاة . .
بصيت عليه من الشباك وهو واقف مع اصحابه برا المسجد وبيسلموا ع بعض بعد الصلاة وفضلت باصة عليه لغاية ما مشي من الشارع واختفي خالص . معرفش انا بعمل كل ده ليه بس هحاول الأيام الجاية أسيطر ع مشاعري مش كده .. مينفعش ال انا بعمله ده انا عمري ما عملت كده ف حياتي .. لازم اركز ف دراستي ومستقبلي وبس ..
