متأكدة ان ربنا عالم بحالي أكتر مني وعندي يقين انه مش هيسيبني اتعذب .. أكيد هيحصل حاجه توضحلي سواء ايجابية أو سلبية .. أي حاجه هتبقي أفضل من الحيرة والفرهدة ال انا فيها دي ..
صليت الضهر وحاولت أنام ليا فترة كبيرة مفيش نوم .. بس للأسف معرفتش أنام .. ف شغلت قرآن بس المرة دي بقي بصوت ياسين .. ليا فترة بحاول مسمعش صوته بس مش قادرة صوته وحشني جدا .. فتحت البروفايل بتاعه فجأة واللي حصل صدمني .. امبارح بالليل كنت كاتبة ف البايو بتاعي ..
إن الاستيقاظ كل يوم بنفس الحزن مؤلم جداً .. كتبتها وأنا بعنيها فعلاً ده بقي حالي كل يوم يادوب لو عرفت انام مش بيبقي أكتر من ساعتين بصحي ع أمل اكون نسيت او أي حاجه جوايا اتغيرت ومبقتش أحس بيه برغم اني حاولت كتير ابعد عنه بس مقدرتش .. حتي لو بطلت اسمع صوته لمدة بس صوته كان جوايا . صوته مازال جوا قلبي وده بيترجم جوا عقلي الباطن ع هيئة حلم جميل وكأنه حقيقه .. مازلت بشوفه وهو جاي للصلاة .. بشوفه حتي لو صاحية !! مش عارفة انسي شكله وهو جاي للصلاة وهو ماشي بسرعه واول ما يلمحني من البلكونه يمشي بطئ ويطلع الفون من جيبه وكأنه بيعمل حاجه .. مش عارفه أنسي فرحة قلبي وانا واقفة بسمع صوته ف الصلاة .. صوته مميز جداً ليه نبرة كده مميزة مش موجودة عند أي حد .. مش عارفة أنسي خشوعه ف الصلاة وهدوء صوته .. كل ما بحاول أنسي بلاقيني فاكره كل حاجه بالتفصيل.. أكيد كل المشاعر دي مش هتبقي من كرف واحد !! وده ال حسيته من بعد ما كتبت ف البايو بتاعي (إن الاستيقاظ كل يوم بنفس الحزن مؤلم جداً) كتبتها بالليل وطبعا منمتش فضلت سهرانه لغاية تاني يوم الضهر .. طول فترة الليل مفتحتش البروفايل بتاع ياسين بس بعد ما صليت الضهر حسيت ف هتحصل ف اليوم ده تفرحني معرفش حسيت كده ازااي! وبسرعه روحت فتحت البروفايل بتاع كرلوله عشان مفيش حاجه بتفرحني غيره .. ولقيته كاتب ف البايو بتاعه (عاجز قليل الحيلة عن أي حاجه ممكن تسعده..) مش عارفة اوصف احساسي وقتها .. صدمه ع فرحة مع شوية تناحة .. اه والله فضلت متنحة كتير ومش مستوعبة ان الجملة دي ممكن تكون رد ع ال كتبته ف البايو! فكرة انه كاتب عاجز قليل الحيلة عن أي شئ ممكن يسعده تدل ع ان الكلام ده رد ع كلامي يعني هو مهتم بيا! يعني يهمه مكونش حزينة طول الوقت ! طب ليه عاجز ! ليه متقولش كده ؟ ايه السبب ال يمنعك تقولي! مش مهم السبب المهم حسيت بالأمان بعد ما قرأت كلماته حسيت انه حاسس بيا مش بس حاسس بيا لاء ده كمان عاوز يعمل أي حاجه تفرحني .. شعور جميل ان حد يحاول يفرحك من غير ما يعرف سبب حزنك اي . هو مش عايز حاجه غير انك تكون كويس وبس .. فضلت متنحة كتير ف الفون وكل شوية بحدث الصفحة وأقرأ الكلام كلمه كلمة ليكون بيتهيألي ولا حاجه! بس بيتهيألك ازاي بس ي أشرقت بطلي عبط مهو الكلام مكتوب قدامك اهو عاوزه اي دليل أكتر من كده!! فرحت اوي وحسيت بسلام نفسي وراحه بعد ما فقدت الشعور ده من فترة كبيرة من فرحتي خدت اسكرين للبايو .. بس لاء طب ما يمكن الكلام ده مش ليا فعلاً يمكن قصده ع حد تاني مش انا .. انا هكلم منه واشوفها مليش غيرها ..
بعت لمنه اسكرين ب البايو بتاع وبتاع كرلوله وقالتلي : أشرقت انتي عبيطة بجد أقسم بالله ما أهي واضحه أهي يبنتي انتي هتشليني والله .. واضح جدا ان الكلام عليكي لانك بتقولي بتصحي كل يوم بنفس الحزن ده غير البوستس الكئيبة ال هحضرتك بتشيريها فهو رد عليكي انه عايز يعملك اي حاجه تفرحك بس .. أشرقت: بس ايه! منه: بس عاجز ومش عارف زي ما هو كاتب! أشرقت : عاجز ليه اي ال يمنعه !! منه:معرفش يمكن عشان هو لسه طالب يعني اكيد مش جاهز لأي خطوة ارتباط دلوقتي اكيد لسه محتاج يكون نفسه .. انا فاكرة كويس يوم ما سمعته بيكلم عموفتحي وقاله اكيد عندي نية للخطوة دي بس مش دلوقتي وانت فهمها ظروفي عشان متفهمنيش غلط.. متقلقيش ي حبيبتي والله هتفرحي ان شاء الله وبطلي عبط وتقولي مش قصده عني ومش عارفه اي .. انا من قبل ما يكتب كده وبقولك انه معجب بيكي وحاسس بيكي كمان من وقت ما كنا ف السكن ولاحظت التغيير عليه . اصبري وان شاء الله الأيام مخبيالك كل حاجه حلوة . أشرقت:يارب ي منه يارب ادعيلي .. منه: بدعيلك ع طول يقلبي والله .. طمنيني عليكي عامله اي ف الاجازة المملة دي .. أشرقت : مخنوقة طول الوقت والله ي منه وع طول قاعدة ف شقتنا ال ف الدور الأرضي ده غير احلام وكل شوية عاوزاني اعمل شغل البيت وكل يوم خناق .. ولا عارفة انام ليل ولا نهار والحياة بايظة جداً يعني .. نفسي انام حتي ساعتين ع بعض لو نمت بنام نص ساعه ولا ساعه وبصحي افضل صاحية ع. الأقل ساعتين عشان ارجع انام تاني .. منه: يروحي حرام عليكي ال بتعمليه ف نفسك ده ليه كل ده فكك من أحلام واعملي ال تقدري عليه وطنشيها .. ونامي واهتمي بنومك انتي بتتعبي لو مش بتنامي كويس .. أشرقت : حاضر هحاول انام شوية .. حاسة اني نفسي انام جدا وجوايا نوم كتير .. منه:ايوه بقي يسطا هتنامي بعد ما اطمنتي وكرلوله كتبلك كلام حلو🤭😉 أشرقت:يبت بطلي حركاتك دي وايموشن الغمزة ده مش برتاحله خالص 😂😂 منه: معلش يسطاااا هتلاقي مين غيري يغلس عليكي يعني
