عدت الأيام ومكنتش بنزل غير لو بجد محتاجه حاجه من السوبر ماركت وكمان الكيرلي بيلاحظ اني كنت بروح السوبر ماركت بعد الصلاة . ف بقي هو يخلص الصلاة من هنا ويدخل يقعد مع عموفتحي من هنا.. فرحت جدا ف البداية خصوصاً بعد ما عرفت من منه انه عمره ما كان بيقعد مع عمو فتحي كل يوم بالشكل ده. بس مع الوقت بدأت أحس اني بعمل حاجه غلط وبتبع هوي قلبي ومينفعش اعمل كده . ف رجعت ابعد تاني ومنزلش غير بعد العشاء بساعة مثلاً أو أكتر أنا بجد بحب اتمشي جداً ف مش همنع نفسي يعني عشان حد .. المشي بيفرغ كل الطاقة السلبية ال جوايا ..أحلي حاجه كده لما اتمشي لوحدي ومعايا الهاندفري وبسمع قرآن بصوت ناصر القطامي بحبه جداً جربو اسمعو سورة طه كده بصوته عظمة بجد .. الحمد لله مكنتش بشوف الكيرلي كتير بعد كده بقيت اتعمد انزل ف وقت متأخر او بدري عن الصلاة . ولكن ف يوم وانا راجعة من الجامعة روحت اشتريت من عمو فتحي قلت عشان بالمرة مش هنزل بالليل .. عمو فتحي صدمني بجد اليوم ده . أشرقت : السلام عليكم . عمو فتحي : وعليكم السلام ورحمة الله وبركاته. ازيك ي بنتي . أشرقت :الحمد لله بخير ي عمو وحضرتك . عمو فتحي :الحمد لله . أشرقت : عمو عاوزة عيش وجبنه واندومي . عمو فتحي : حاضر ي بنتي . بعد ما جابلي الحاجه وحاسبته كنت ماشية بس وقفني . عمو فتحي :اومال فينك كده ليكي كام يوم مش بشوفك . أشرقت : مفيش والله بس عندي محاضرات وسكاشن كتير والمواد كلها انجلش ولازم اركز واذاكر كويس . عموفتحي: ربنا معاكي اومال انتي ف كلية ايه؟ أشرقت : آداب انجليزي سنة تالتة. عمو فتحي :ما شاء الله شدي حيلك بقي عايزك من الاوائل. أشرقت :ان شاء الله دعواتك ي عمو. عمو فتحي : ان شاء الله ربنا هيكرمك . إلا انتي مقولتليش انتي من فين . أشرقت :من نجع حمادي. عمو فتحي :الله بنت بلدي ..
عمو فتحي فضل يحكي معايا ف تفاصيل غريبة وحقيقي مش فاهمه هو بيسأل كل الاسئلة دي ليه انتي من فين ؟ بنت مين ؟ من عيلة اي ؟ وحاجات من دي لكن بعدين فهمت هو بيسأل ليه . عمو فتحي : بصي ي بنتي بما انك سنه تالتة دلوقتي وفاضلك سنة وتخلصي عندي ليكي عريس وهو محترم جدا ميتخيرش عنك والله . حتي شبهك ف كل حاجه . ولد محترم وابن ناس وما شاء الله عليه حافظ القرآن وكمان ف كلية هندسة. اللي بيصلي عندي ف المسجد ده تعرفيه ؟ أشرقت : اول ما قال اللي بيصلي ف المسجد عندي قلبي دق بسرعه وع طول الكيرلي جه ف بالي .. أشرقت : ي عمو حضرتك كذا مرة تقولي ع الموضوع ده وانا معرفش بتتكلم عن مين في كذا حد بيصلي ف المسجد بتاع حضرتك . عمو فتحي : بتكلم عن الشيخ ياسين الطويل ده ازاي متعرفهوش ! أشرقت :معرفش مش بركز .. عمو فتحي : ياسين ده اللي بيصلي الفجر والعشاء وبيبكي ف صلاته وبيخلي المسجد كله يبكي وراه. هنا بقي حسيت قلبي هيقف ده الموضوع بجد يعني هو طول الفترة دي بيتكلم عن الكيرلي اللي طلع اسمه ياسين ! بس كان لسه عندي شك سيكا . ف قولتله . اللي شعره كيرلي وطويل .. قالي :ايوه بالظبط هو ده ها اي رأيك ؟ أشرقت :اممم مش هو كان آخر سنة ليه السنه ال فاتت ؟ عمو فتحي :لاء ده لسه معاه السنة دي والسنة الجاية كمان . أشرقت : اومال ليه في بنات عندنا ف العمارة بيقولو خلص ؟ عمو فتحي : بنات سكنكم دول بيألفوا من دماغهم في كذا واحدة منهم بتيجي هنا لما ياسين يبقي قاعد عندي وبيقولوله حفظنا ي شيخ وهو بيرفض .. أشرقت : اااه . عمو فتحي :ها قولتي ايه . أشرقت:والله ي عمو مش عارفة اقولك اي انا اول مرة اتحط ف موقف زي ده ف.. عمو فتحي : خلاص خلاص هسيبك تفكري .. أشرقت :تماام عن اذنك ..
خرجت من المحل وانا لسه مش مستوعبة اللي سمعته يعني منه طلع عندها حق ف اللي كانت بتقوله . بس ازاي هو بيقولي ع جواز والكيرلي مخلصش تعليم ده لسه معاه سنتين ! . رجعت السكن وانا مبسوطة ومصدومه ف نفس الوقت . أشرقت: منه ي شيرين تعاااالو . منه :في اي ي بنتي مالك كده . أشرقت : منه انتي كان عندك حق . شيرين :في اي يبنتي ومالك مصدومه كده ليه . ايه ال حصل ؟ أشرقت :مش هتصدقوا عمو فتحي قالي تاني ع الشيخ ال عاوز يجوزهولي . منه :الكيرلي صح ؟ أشرقت :ايوه ياسين . شيرين : كمان اسمه ياسين . أشرقت :ايوه ياسين . منه : لا بقي دانتي تقعدي كده وتحكي بالتفصيل الممل عمو فتحي قالك ايه عن الكيرلي قصدي ياسين .
