رمضان خلص خلااص كان رمضان حزين جداً ع قلبي من كل ناحية .. مفيش صلاة تراويح ولا فيه صوت ف المساجد .. ولا فيه جو أسري بينا وهمي الأكبر مفيش صلاة تراويح بصوت ياسين .. انا كنت بعد الأيام عشان نفسي يجي رمضان واشوف صلاة التراويح بصوت ياسين زي السنة ال فاتت وأسمع صوته لمدة ساعتين كاملين مش مجرد صلاة في عشر دقايق .. مفتقدة صوته جداً ولو اني بسمعه كل يوم من الريكوردات لكن ابداً مش زي ما اكون واقفة ع السطوح وصوته بيرن ف ودني كده 😞 كل حاجه بقت صعبة وكل حاجه بحبها بتبعد عني ومبتفضلش ... جه رمضان وخلص بدون صوت ياسين 😞💔 .
حاولت اعدي الأيام بكل ما فيها من حزن ال كان بيعيني هو الصلاة والقرآن الحمد لله ع نعمة الإسلام كنا هنعمل اي لو مكناش مسلمين ولينا صلاة نرمي حزننا فيها وسجدة طويلة بدموع الحزن وهمسات قلوبنا التي لا يسمعها إلا الله . وحوارنا الطويل لله سبحانه وتعالي ويقين قلوبنا انه سامعنا وعالم بما أسررنا وما أعلنا .. عليم بما نخفيه عن أقرب الناس لينا وتظاهرنا بالقوة وجوانا اضعف مما يكون وضعفنا ده ال مش بيظهر غير لله سبحانه وتعالي وهو الوحيد القادر ع جبر قلوبنا واصلاحها .. يكفينا من الدنيا الاطمئنان والأمان ال بنحسه لما نسمع آية قرآنية صدفة ونحس انها جاتلنا مخصوص ف الوقت ده بالذات عشان تساعدنا نتخطي كل صعب .. تكون مخنوق وحاسسها مقفلة من كل ناحية فجأة تسمع آية (هو عليِّ هين ) لو تدبرنا معناها هنطمن جداً تخيل سيدنا زكريا خلاص كبر ف السن وبقي عجوز وامرأته عجوز وعاقر يعني بالمنطق كده مستحيل يخلفوا رغم استحالة الأسباب زكريا كان واثق انه ربنا هيستجيب دعاءه ودعا بالذرية الصالحة تخيل رد ربنا عليه بكل بساطة هو عليَّ هين مقالش لاء صعب انت عجوز ومراتك عجزت وكبرت خلاص اطلب حاجه غير كده .. سبحانه وتعالي لاتعجزه الأسباب واذا أراد شئ قال له كن فيكون . بحب جداً قصة زكريا ودعاءه ويقينه بالاجابة بحب جداً الآية ال بتقول
( فَنَادَتۡهُ ٱلۡمَلَٰٓئِكَةُ وَهُوَ قَآئِمٞ يُصَلِّي فِي ٱلۡمِحۡرَابِ أَنَّ ٱللَّهَ يُبَشِّرُكَ بِيَحۡيَىٰ مُصَدِّقَۢا بِكَلِمَةٖ مِّنَ ٱللَّهِ وَسَيِّدٗا وَحَصُورٗا وَنَبِيّٗا مِّنَ ٱلصَّٰلِحِينَ ٩٣) بتطمن قلبي جداً وبتصبرني جداً وبتأكدلي ان ربنا هيستجيب مهما طال الوقت هو سبحانه لا تعجزه الاسباب كل الحكاية محتاجه شوية صبر مش أكتر ..
طول شهر رمضان كرلوله مكنش بينزل اي بوستات ولا حتي بيغير البايو ولا اي حاجه غير بوست واحد بس كان حد من أصحابه عامله تاج فيه فيديو من صلاة التراويح السنة ال فاتت وكاتب مفتقدين صلاة التراويح وراك يا شيخ ياسين وهو رد عليه وقال. والله انا كمان مفتقد الصلاة معاكم ربنا يعدي الأيام بخير وترجع كل حاجه من تاني ان شاء الله .
طول رمضان وانا بشغل قرآن بصوت ياسين وبنام ع صوته كل يوم وبشغله بصوت عالي لأني لوحدي ف الأوضة لكن محمد أخويا الصغير جه ف ليلة كان خايف ومش عارف ينام فنام عندي ف الأوضة وكان مبسوط جداً بصوت ياسين وبيقولي الشيخ ده صوته حلو وبقي ينام عندي كل يوم ويجي يقولي شغليلي صوت الشيخ الحلو ومش بيرضي يسمع لحد غيره . سبحان الله اللي وضع محبته ف قلب كل من سمع صوته أكيد انسان زي ده ربنا بيحبه جداً ومخلي كل الناس تحبه بالشكل ده من غير ما يعرفوه أصلاً .
فضلت متابعة صفحته ع الفيسبوك ومازال مش بينزل حاجه بس انا جوايا احساس انه مضايق او فيه حاجه معاه هو صحيح ليه أكتر من شهر بدون ما يكتب بوست واحد حتي بس كان أونلاين ع طول وده كان محليني مطمنه عليه .. بحس انه معايا طول ما هو أونلاين حتي لو مش بنتكلم بس بحس انه معايا .. لاحظت كتير جداً انه طول ما انا أونلاين بيفضل هو كمان أونلاين ومش بيقفل طول ما انا أونلاين الا لو قفلت انا الأول .. مرات كتير جداً قلبي بيحس بقوة انه مش كويس وعايش مضايق وحزين ولو انه مفيش دليل ع كده كنت بفضل اعيط وخلاص وانا مش فاهمه انا بعيط ليه! كنت بقوم أصلي قيام ليل وافضل ادعيله كتير وبقول يارب اسعد قلب ياسين وابعد عنه الهم والحزن والغم وارزقه سعادات متتالية لم تكن بالحسبان . اللهم اصرفه عنه كل شر واصرف عنه كل من أراد له السوء وقرب منه كل خير وكل من أراد له الخير وابعد عنه ولاد وبنات الحرام واهديه واصلح حاله واجعله من عبادكَ الصالحين وارزقه من حيثُ لا يحتسب وطمن قلبه.. مفيش اي وسيلة تواصل بيني وبينه ومش عايزة يكون فيه دلوقتي غير لو حاجه رسمية وبس . كل ما بحس انه عايزه اطمن عليه بقوم أصلي وادعيله يكون كويس .. انا شخصياً أكتر حاجه بتفرحني لو حد بيدعيلي .. والدعاء بظهر الغيب مستجاب فعشان كده كنت بدعيله كتييير ودي أكتر حاجه ممكن اقدمهاله وبإذن الله يكون الدعاء مجاب .
دخلت ع صفحته لقيته كاتب ف البايو وحيد حزين لا يشعر به أحد .. استغفر الله العظيم يارب يبني ليه كده طيب انا حاسة بحزنك من قبل ما تتكلم أصلاً قال لا يشعر به أحد ابو شكلك 🙂 وانا ال مبنامش لا ليل ولا نهار ودايما بدعيلك قال لا يشعر به أحد 😏😒🔪
