بما انه انهارده آخر يوم ف السكن كنت عايزة مفوتش لحظة واحدة اشوف فيها ياسين .. بعد ما رجعنا والسكن قفل خلاص قلت ل منه وندي اني هطلع اذاكر ع السطح وخدت معايا كتاب . بس مكنتش عارفه اذاكر لقيتني قاعدة بعيط وبس.. وحاطه الهاند فري (السماعة) وتقريباً سمعت كل الريكوردات ال سجلتها ل ياسين من أولهم . الحمد لله اني اخدت معايا بطانيه عشان الجو ع السطح تلج . كانت الساعه 2 الفجر كنت مركزة جداً ف الشارع حاسة فأي لحظة هلاقي ياسين قدامي . انا حافظة مواعيده ال بيكون فيها ف الشارع برغم انها بتبقي صدف أصلاً بس من كتر ما اتعودت أستناه بعرف أخمن امتي هو موجود وامتي لاء . هو أكيد ف الجيم دلوقتي عشان مراحش الساعة 4 بعد العصر ولا راح بعد صلاة العشا ولا كمان الساعة 10 برضو مشوفتوش خالص يبقي أكيد راح ع الساعة 12 وبيرجع ع 1ونص ولا 2 . كمان هو من ساعتين كان أونلاين واهو رجع أونلاين تاني يبقي أكيد جاي ف الطريق . هو متعود يبقي أونلاين ويسيب الفيسبوك ويبقي ماشي ف الشارع وماسك الفون ف ايده وأحياناً بيكون باصص ف الفون عادي. ع أي حال هو هيبقي هنا كمان شويه .. الشارع كان هادي مع هدوء صوت ياسين ال بسمعه .. وفجأة الحال اتبدل وكان ف صوت عالي جداً والشارع مليان شباب وكأنه ف احتفال لحاجه بس مش فاهمه في اي ؟ كمان نص بنات العمارة اتجمعواع السطح ومنه وندي معاهم ..
منه:أشرقت انتي من بدري هنا ! لحظه مال عينك انتي بتعيطي صح ؟ أشرقت : لاء مفيش حاجه ده بس من البرد . منه: برد اي ده ال يخلي عيونك حمرا ومنفوخه من كتر العياط كده!! وبعدين برد ازاي بالبطانية دي كلها ! أشرقت: يوووه بقي ي منه مانتي عارفه اني ببرد اوي . منه: ولما بتبردي قاعدة هنا ليه الجو تلج .. أشرقت: عادي .. منه: كان ممكن تستني ياسين ف شباك أوضتتا عارفه انك عايزة تشوفيه .. أشرقت: مش مهم بقي .. هو اي الدوشة ال ف الشارع دي واي كل الناس والاحتفالات دي في اي ؟ منه: يمكن عشان احتفال رأس السنة الجديدة .. أشرقت: لا حول ولا قوة إلا بالله معظم الناس دول مسلمين وبيحتفلو بعيد ميلاد المسيح عليه السلام وده حرام أصلاً عشان النصاري بيحتفلو بمولد ابن الرب أستغفر الله بقينا ف زمن عجيب . والله يكاد الدين يختفي .. منه: عندك حق ربنا يهدينا جميعاً ويصلح حالنا .. منه: اي ده الجميل سرحان ف اي .. أشرقت .. ي أشرقاااااات يبت طرشتي في اي بكلمك . أشرقت:هاا مش سمعاكي من الدوشة مش شايفة الشباب ال ف الشارع والبنات ال ع السطح والأصوات دي كلها.. منه:امممم يعني هو ده السبب ال مخليكي مش سمعاني دنا بتكلم ف ودانك يشيخه 🙂 .. اي ده لحظة مش ده ياسين ال واقف هناك ؟ أشرقت : اه هو . منه: قوووولي كده بقي عشان كرلوله حضر حضرتك لا سامعه ولا شايفه حد 😉 أشرقت : يبنتي بقولك الدوشه الدوشه .. منه:ايوه ايوه ايوه . شوفتيه ازاي يسطا وسط الشعب ده كله .. أشرقت : هو مميز عندي أعرفه من وسط مليار شخص كمان 🤭 منه: ياسيدي ع الحب . أشرقت : استني انتي دلوقتي ماله ده متعصب كده ليه ! منه: فينه أنا مش شايفاه أصلا الشارع زحمه . أشرقت :شايفة ال واقف لوحده ده عند عامود الكهربا ولابس جاكيت زيتي وشايل شنطه بتاعت جيم ف كتفه الشمال وعامل فيها الرجل الأخضر بعضلاته دي .ماله ده ليه باصص ع السطح ومتعصب كده !منه: الرجل الأخضر ! اه فعلا ماله كده ده تقريبا باصص عليكي انتي ي أشرقت . أشرقت : باصص عليا ازاي بس ي منه ي فزلوكه انتي 🙂 هو هيعرفني ازاي من وسط كل البنات دي ال ع السطح ده أكتر من نص العماره هنا . منه: هيعرفك عادي زي ما انتي عرفتيه يذكيه .. أشرقت : ما علينا فلنفترض انه عرفني ماله متعصب عليا ليه طيب 😒 منه:يمكن عشان واقفه ف البلكونه وفيه شباب كتير ف الشارع وحضرتك رقبتك باينه عشان بشرتك ما شاء الله فاتحه وباين اوي انك مش لابسه طرحه زي كل مره !! أشرقت : اوووبس صح .. منا اهو مغطيه شعري بالبتاع ده بتاع البيجامه اهو.. بس دي حتة صغيرة ال باينه يعني ومحدش هيركز . منه:البتاع اي قصدك الزعبوط ! أشرقت : اه هو ده مهو مش باين ولا حتي شعرايه مني أصلا ! منه: رقبتك ي آنسه مش متغطيه كويس .. اشرقت: اممم هاتي الطرحه دي ال وراكي ع الكرسي طيب.. انا جبتها ونسيت البسها . منه: اهو شوفتي مش متعصب اهو 😂😂 أشرقت : 😂😂تصدقي صح ده بيبتسم كمان . خلاص يسطا ي كرلوله والله اول مره نسيت. منه: إنما انتي عرفتي ازاي انه جاي من الجيم ! أشرقت : من الشنطة ال لابسها مهي باينه يعني . منه: لااااء اقصد عرفتي ازاي انك هتشوفيه وطلعتي ع السطح قبلها ؟ أشرقت : أنا حافظه مواعيده يا اما بيروح بعد صلاة العصر او بعد صلاة العشا او الساعه 10 او 12 وبيرجع 1ونص أو 2 الفجر .. منه: وه ! دنتي مركزه بقي يسطاااا😉 أشرقت : يعني مش اوي 🤭🤭.
خلص الاحتفاال الغريب برأس السنه ال مش مهم عندي أصلا ولا المفروض كمسلمين موحدين بالله نعترف بيه .. أهم حاجه حصلت انه شوفت ياسين . وانه عرفت اجمعه من وسط الزحمه دي وهو كمان عرفني .. شكله كان يضحك اوي وهو متعصب ولا لما فجأة ملامح العصبيه اتغيرت وابتسم وكان مركز نظره عليا لمدة كام ثانيه كده . نظرته دي محفورة جوا قلبي مستحييييل أنساها . نزلت شقتي عشان كنت بموت من البرد بصراحه ولسه الوقت بدري ع الفجر . صليت قيام وقرأت الورد بتاعي ورجعت أسمع قرءان بصوت ياسين وأنا تحت البطانيه ومش قادرة امسك دموعي ومش متخيلة خلاص كلها كام ساعه وهنمشي ومش هشوفه غير ف صلاة الفجر . منه وندي كانوا نايمين الحمد لله . وحتي لو صاحيين مكنش حد هيعرف اني بعيط تحت البطانيه . مبعرفش اعيط بصوت مستحيل اعيط بصوت . ودي حاجه حلوة ووحشه فنفس الوقت . حلو اني اعيط فأي وقت وبدون ما حد يعرف حتي لو معايا ف نفس المكان . ومش حلو عشان بحس فيه حاجه بتخنقني وصوتي مش طالع ونفسي بيتكتم وبحس نفسي أصرخ بصوت عالي بس مش بعرف .. يااارب نرجع من الاجازة بسرعه ومش تطول زي اجازة كورونا الأولي . يارب مش عايزة كل حاجه تتعاد تاني .. أنا حاسه بياسين وحاسه فيه حاجه مضايقاه . قلبي حاسس بحزنه اوي .. مش عارفه اعمل اي . بس نشرت بوست قرءان بصوت ناصر القطامي لأواخر سورة الزمر وكتبت عليه ..
بحب سورة الزمر جدا جدا خاصة خواتيم السورة والتدبر في معاني الآيات وبتخيل مشهد يوم الحشر ومشهد الكفار وهم يساقوا إلي جهنم والعياذ بالله . ومشهد المؤمنين وهم بيدخلوا الجنة وحارس الجنة يقول لهم سلام عليكم طبتم فادخلوها خالدين . يا الله ع الجمال اللهم اجعلنا منهم .. كمان بتخيل مشهد الملائكة وهم حول الرحمن سبحانه وتعالي وهم يسبحون بحمده . يا الله ع عظمة المشهد .. فاللهم ازقنا رؤية وجهك الكريم وارزقنا الفردوس الأعلي بلا حساب ولا سابقة عذاب . كمان في سبب غريب شوية لحبي لسورة الزمر . بحب جدا أسمع آية . (وَأَشۡرَقَتِ ٱلۡأَرۡضُ بِنُورِ رَبِّهَا ) وبحب اسمي جدا عشان مذكور ف القرءان في واحدة من اقرب السور لقلبي . سبب غريب شوية بس حبيت اسمي جدا وحبيت الآية دي جدا من ماما كانت دايما تقرأها ليا قبل ما أنام وأنا صغيره .. سورة الزمر كلها بتاخد قلبي وأنا بسمعها 💙💙💙
كتبت البوست ونمت ساعه وصحيت عشان أصلي الفجر . قبل الفجر بنص ساعه كنت ع السطح مستنيه ياسين . الجو كان تلج جدا كنت حرفيا أسناني بتخبط فبعض من البرد بس يلا مش مهم كلها الكام دقيقة دول ال هشوف فيهم ياسين وخلاص .. ياسين جه لصلاة الفجر ومن أول الشارع وهو نظره عليا ف البلكونه . ومفيش غيرنا ف الشارع وكان ماشي بطئ وكأنه سمع صوت قلبي وهو بيتمني يشوفه وقت اطول .. أذن الفجر ياسين كالعادة وصلي بسورة الزمر 🤭 كنت حاسه والله اول ركعة صلي من أول (قُلۡ يَٰعِبَادِيَ ٱلَّذِينَ أَسۡرَفُواْ عَلَىٰٓ أَنفُسِهِمۡ لَا تَقۡنَطُواْ مِن رَّحۡمَةِ ٱللَّهِۚ إِنَّ ٱللَّهَ يَغۡفِرُ ٱلذُّنُوبَ جَمِيعًاۚ إِنَّهُۥ هُوَ ٱلۡغَفُورُ ٱلرَّحِيمُ ) بحب الآية دي بصوته وخشوعه جدا جدا . والركعه التانية صلي بآخر السورة وطبعا فيهم آية (وَأَشۡرَقَتِ ٱلۡأَرۡضُ بِنُورِ رَبِّهَا ) ي الله أول مرة يصلي بيها وصوته جميل جدا جدا غير كل مره🥺 جايز عشان بحب سورة الزمر جدا وجايز عشان المرة دي بسمعه وأنا عارفه إننا هنتفرق تاني ومش هشوفه لوقت غير معلوم 😢 وجايز فرحانه انه شاف البوست وقرأ كل كلمه فيه برغم انه طويل وفهم حبي لسورة الزمر وقرأ من نفس الآيات ال بحبها . وجايز عشان صرف عن عقلي الشك انه ميعرفنيش ولا يعرف حاجه عني واثبتلي عكس ال عقلي بيحاول يخدعني بيه . اسباب كتير مفرحاني ويوم مليئ بالعياط وبس 😢💔 نظرته وهو ماشي بعد الصلاه ووقفته ع أول الشارع لكام ثانيه كده وكأنه بيطمني وفعيونه نظرة شك زي ال ف عيوني وكأنه عايزني اطمئنه زي ما هو دايما بيحاول يخفف عني ويفرحني ... نظراته ليا ف اليوم ده محفورة ف ذاكرة عقلي ومحفورة في أعمق نقطة ف قلبي وعمري ما أنسى اللحظات دي ولو مر عليها ألف سنه ..
