في سكن ياسين وأدهم..
أدهم: يكش تكون ارتحت ي استاذ ياسين بيه وانت ملففنا الشوارع كلها .. ويكش تكون ارتحت بعد ال عملته عند المسجد ده .. ياسين: الله! انا عملت ايه بس يبني دنا غلبااااان .. أدهم: عملت اي ! انت كل ده مش واخد بالك من حركات المراهقين ال عملتها دي .. ده الحمد لله محدش كان ف الشارع وشافنا .. لو بتحبها اوي كده اتأخرت ليه مكنت جيت من أول يوم دراسة يخويا .. ياسين:كان نفسي والله بس فرح اختي بقي وتجهيزات ومصاريف الفرح أخرتني .. تنهد ياسين وسكت بعد ما قال كلامه .. أدهم: اي يسطااا انت زعلت مني ولا اي انا بهزر معاك والله .. ياسين: لا يسطاا مزعلتش طبعاً انا بس... أدهم: بتفكر ف ايه قولي ! ياسين: حاجات ملغبطة مش عارف اوصفها! أدهم: قول بس وانا هفهمك يخويا . ياسين: بص انا فرحان جداً حاسس ان قلبي من جوا فرحان وطاير من الفرحه اول ما شوفتها هتقولي ازاي شوفتها وهي واقفه ف البلكونه والدور السادس وبعيد أصلاً!! بس انا شوفتها بقلبي قبل ما تشوفها عيني.. معرفش حصل ازاي بسرعه كده وقلبي اختارها هي وبس. حاسس نفسي اقولها اني اخترتها بقلبي وعقلي تكون مراتي ومستني نكمل عمرنا كله سوا بس ازاي هعمل كده وانت عارف ظروفي ولسه بدري عليا اني آخد خطوة زي دي .. وخايف اتعلق بيها اكتر ..وحد غيري ياخدها مني .. وقتها هبقي خسرت كل حاجه ف حياتي ..
أدهم: تنهد أدهم وقال:وقعت يصاحبي خلاص هو كده الحب بيجي مرة واحدة يساوي وشك بالأسفلت ومتعرفش حصل اواي وامتي ! متشغلش بالك انت بس وان شاء الله ربنا يجمعكم لو كان خير ليكم .. يُدبر الأمر صدقني ربنا مش هيخليك تتمني حاجه مش ليك ويخليك تتعذب بيها ويحرمك منها . الصبر يصاحبي وخير ان شاء الله.. ياسين:إن شاء الله.. وهما بيتكلمو ارتفع آذان العشاء .. أدهم: اهو عمو فتحي بيأذن العشاء يلا بينا يعم الشيخ ع الصلاة ...
في سكن أشرقت ومنه ..
منه: طبعاً انتي دلوقتي هتطلعي السطح وعايزة سجادة الصلاة عشان هتصلي فوق اكيد!
أشرقت: بالظبط وهاتي سجادتك انتي كمان وتعالي ورايا ع بال ما اسجل اول ركعتين بصوت كرلوله تكوني خلصتي لبس عشان ننزل وربنا لو اتأخرتي ي منه هزعل 🙂 منه:ياربي خلاص حفظت والله.. مش هتأخر متقلقيش انا عارفه انتي مستنيه اللحظة دي من زمان .. صح يسطااا اول مرة هيشوفك ياسين بالخمار انهارده .. ده انا لازم انزل معاكي عشان اشوف رد فعله وهيعرفك ولا شكلك اتغير بالخمار! ..
أشرقت: هيعرفني طبعاً عشان لبسي متغيرش هو هو ال اتغير لبست خمار بدل الطرحه بس.. وبعدين بطلي رغي بقي عايزة الحق اشوف كرلوله وهو جاي من اول الشارع .. طلعت السطح بسرعه عشان اشوف ياسين وهو جاي اكتر حاجه ف الكون كله بتسعدني لما بشوفه وهو جاي من ع اول الشارع وداخل شارع السكن عشان المسجد .. شكله وهو متلغبط ومتوتر وبيعمل اي هبل عشان ميبانش انه شايفني .. بيسرح شعره بايده او بيلعب بالمفاتيح ف ايده او يطلع الفون من جيبه ويمسكه كأنه بيعمل حاجه وخلاص 😂 واول ميكون جاي ع اول الشارع بيكون ماشي سريع لكن أول ما يلمحني يمشي بطئ جداً جداً وشكله وهو بيبص ع البلكونه بسرعه عشان ميبانش اني شايفاه 🤭 تفاصيل كتير وحشتني جداً ف الخمس ثواني دول ال بيعدي فيهم الشارع ومعتقدش حد غيري بيركز فكل التفاصيل دي.. المهم جه وقت إقامة الصلاة وياسين هو ال أقام الصلاة ودي حاجه غريبه اول مرة يقيم الصلاة ! كان دايماً عمو فتحي يقيم الصلاة بس مش مشكلة بالعكس فرحت ان ياسين هو ال أقام الصلاة انا عايزاه هو ال يأذن ويقيم الصلاة ويصلي إمام كمان 💙 بدأت الصلاة وكرلوله صلي أول ركعتين بسورة الرحمن عملت ريكورد وفصلته بعد أول ركعتين عشان الركعتين التانيين سريين أصلاً.. منه كانت جات ع السطح عندي فصلينا جماعه وبعدها صلينا السنة وكان لسه ياسين مخرجش من المسجد . منه: يبنتي مستنيه اي مش يلا ننزل اومال مين ال كان بيقولي متتأخريش وهزعل! أشرقت: مستنيه كرلوله يخرج من المسجد اومال يعني هقف قدام السكن استناه وفيه شباب كتير خارجين من المسجد! منه:اممم يبقي هو كمان اكيد هيستني لما الكل يمشي .. مفيش كام دقيقة وياسين خرج فعلاً من المسجد اتأكدت انه لسه واقف ف الشارع وممشيش برغم انه كان واقف لوحده .. نزلت وانا مش مصدقة أخيراً اول مرة هشوفه بعد غياب طويل أخيراً المسافات الطويلة بينا خلصت واحنا حلاص موجودين ف شارع واحد!! كنت متخيلة اني هعرف اشوفه وابص عليه عشان واقف لوحده .. بس بالعكس اتكسفت جداااا مقدرتش ابص ف وشه كالعادة ..لمحته اول ما شافني كان مثبت نظره عليا او مستغربني يمكن معرفش احدد عشان مقدرتش ابص عليه! كنت متوترة جدا وماسكة ايدي الاتنين ف بعض ومشيت بسرعه من الشارع وشاورت ل منه نتمشي بعيد ..
منه: هو ده ال هموت واشوفه ! دنتي مخدتيش ثانيتين ف الشارع ومشيتي وسبتيه وهو يعيني واقف وحده من بدري مستنيكي!! أشرقت: مقدرتش خااالص اتوترت جدااا مش عارفه اعمل اي! منه:انا بقي ركزت عليه جداً وشوفته وهو كان متوتر جدا ع فكره وبصلك باستغراب جامد عشان اول مرة يشوفك بالخمار . وعشان شكلك مرهق جداً من قلة النوم . نظرته وكأنه بيقول مالك حصلك اي!! أشرقت: للدرجة دي باين علي وشي اني تعبانه! منه:بصراحه ايوه باين جداً .. أشرقت: اممم طب عمل اي تاني كان فرحان يعني! منه: ايوه والله الفرحه كانت باينه ف عيونه جداً ولما شافني اني مركزه معاه اتكسف وعمل نفسه بيكلم حد ف الفون وبعدها مشينا وبس ..
