I'm a Chef in the Modern Era [Myanmar Translation]

Chapter - 50

[Unicode]

{Filet Mignon}

အံ့ဩစရာမရှိစွာပင် ရှန်ဖူက မေမေရှန်၏ဖုန်းခေါ်ဆိုမှုကို ရလေ၏။ ဒါက ဖိုးဖိုးရှန်ညွှန်ကြားလိုက်တာ သိသာနေသော်လည်း သူက သူတို့ကို မဖော်ထုတ်ပါချေ။ မေမေရှန်က သူမရဲ့သမက်ကလေးကို သူမတို့ကိုပြဖို့ အိမ်ခေါ်လာရန်အတွက် သူ့ကို အရိပ်အမြွက်ပြကာဆိုသည်။ ပထမဆုံးကြိုးစားမှုနဲ့တင် ဖိုးဖိုးရှန်ရဲ့သဘောတူမှုကို ရသွားတဲ့လူအကြောင်းကို သူမတို့တွေ အမှန်တကယ်ပင်သိချင်နေခဲ့ကြသည်။

သို့သော်လည်း ရှန်ဖူကတော့ စိတ်ဝင်စားဟန်မပြချေ။

ဖိုးဖိုးရှန်ရဲ့ခွင့်ပြုမှုကို ရပြီ‌ဆိုမှတော့ လင်ရှုယီကို သူ့မိဘတွေဆီခေါ်မသွားခင် လင်ရှုယီနဲ့သူ့ဆက်ဆံရေး အတည်ဖြစ်သွားသည်အထိ သူ စောင့်ချင်သေးသည်။ နောက်ပြီး ဒါက သူ့မိဘတွေနဲ့ လင်ရှုယီကို အလေးထားခြင်းမျှသာဖြစ်သည်။ ဒါတင်မကသေး တကယ်လို့ ကြောင်ကသာ အိတ်ထဲကထွက်လာခဲ့လျှင် ရှန်မိသားစုတစ်စုလုံးရှိနေမှာဖြစ်တဲ့အတွက် ကြောင်ကို အိတ်ထဲပြန်ထည့်ဖို့ ပိုမိုခက်ခဲပေလိမ့်မည်။
[T/N : ဆိုလိုတာကကွာ လင်ရှုယီနဲ့သူက ဘာမှမဖြစ်သေးဘူး၊ လိမ်ထားတယ်ဆိုတာ ပေါ်သွားရင် လူအများကြီးရှိနေတာမို့ အလိမ်မပေါ်အောင်လုပ်ဖို့ ခက်လိမ့်မယ်လို့ပြောတာ။]

ထို့အတွက် ရှန်ဖူက သူ့အမေကို ရှင်းလင်းအောင်ပြောထားလေ၏။

"သူက အခုထိ အပြည့်အဝမပြင်ဆင်ရသေးဘူး။ အဖိုးသာ ကျွန်တော်တို့ကိုလာမရှာရင် ကျွန်တော် သူ့ကို အဖိုးနဲ့ဒီလောက်မြန်မြန်ကြီးပေးတွေ့ဖို့ မစီစဉ်ထားဘူးဗျ။ အမေတို့နဲ့တွေ့တာက ဒီလောက်ကြီးအလျင်စလိုမလုပ်သင့်ဘူးလေ။ ကျွန်‌တော်က သူ့ကို မြို့ထဲမှာလည်ပတ်ဖို့အတွက်ပဲခေါ်လာတာ၊ တွေ့ဖို့ကိုတော့ နောက်များမှလုပ်ကြတာပေါ့။"

မေမေရှန်က ထိုအကြောင်းတွေးကာ သဘောတူလိုက်ပြီး သူတို့ကို ပျော်ပျော်နေကြဖို့ပြောပြီးနောက် ဖုန်းချလိုက်လေ၏။

ရှန်ဖူတစ်ယောက် ကျေနပ်စွာဖြင့် လှည့်ထွက်လိုက်ချိန်၌ ချန်ဖန်းဆီမှ ပြောင်ပြောင်တင်းတင်းသရော်လှော်ပြောင်မှုကို ရရှိလိုက်သည်။