كان الضباب يعلو روحي.. أتيت أنت نورا أضاء ظلامي الحالك.. عن العالم أعلنت انعزالي صرت أملي من أجله أحيك أحلامي❣️
الظلام.. الضجيج.. فوضى عارمة....صوت الرياح يهز المكان....أنين أنثوي خافت🖤
كتمشي وتجي فالغرفة بحال شي حمقة كتشتت فالديكورات لي فوق الكوافوز وأي حاجة بانت قدامها... دخلات فالحيط بلا ماترد بالها حتى سال نيفها بالدم.. كتضرب وتنتف فراسها بحال المجنونة صبرها تسالا وقناعتها تلاشات... طاحت فالأرض كتبكي بحرقة وكتصدر أنين معلن على ضعفها وإنكسارها... ماشي ساهل عليها الوضع لي هي فيه.....من لما كانت صغيرة وهي عايشة وسط الظلام، عايشة وحيدة، كتعذب في صمت، مشاركة آلامها غير مع راسها، وشحال كيجيها صعيب تواسي نفسها، تمنات تمد ليها شي يد فعز ظلامها وتخرجها للنور..... تمنات بزاااف🤍
⚜️فُـتــون التلمسي أنثى رقيقة المشاعر....عايشة بدون أمل.....كل طموحاتها هي حياة سعيدة تقدر تشوفها وتحس بيها....... عندها 19 سنة وكتقرا عن بعد في السنة الأولى جامعة وكتلقى دروس خاصة بالناس المكفوفين......جميلة وفاتنة... بيضاء البشرة، جسم منحوت بقوام ممشوق، متوسطة الطول، وجه ملائكي وجميل، عينين زرقاويتين برموش كثاف، شعر حريري ناعم فالبني⚜️
~تكلمات بخفوت، بصوت كيكسر الخاطر....
فـتـون: شنو ندير فراسي هئ هئ شنو ؟ واش نقتل راسي... (حركات راسها بنفي) لا أنا مانقدرش نرتكب هاد الذنب فحق نفسي... نفسي هي أعز ما عندي... هي لي واساتني في الوقت لي تخلا عليا كلشي....(رجعات كتبكي بحرقة) علاش العملية لي كنت واضعة أملي فيها ماصدقاتش هئ هئ علاش واش الله كيكرهني!!...
دخلات ماماها كتجري ماقادراش تزيد تصبر وتشد راسها
⚜️نصيرة مرأة في عقدها الأربعين، زوجة جبار التلمسي، مزالة صغيرة وزوينة بيضاء وحروفها كحلين، مكاديرش الماكياج، ومحافظة على حجابها ولباسها الطويل، مبدأها في هاد الحياة هو 🍭الأمل يصنع المعجزات🍭 حلمها هو تشوف بنتها سعيدة⚜️
وقفاتها وتمشات بيها للسرير وتكلمات بألم على حالتها...
نصيرة نزلوا دموعها ماقادراش تزيد تصبر كثر وتكلمات بألم.... نصيرة: شنو لي خلاك تقولي هكا...؟ فـتـون: حياتي بحر من المشاكل وأنا غارقة فيه حتى للودنين مقادراش ننقذ راسي.. هادي العملية العاشرة لي مكتنجحش.. مليت من كوني عمياء أماما...مجرد نطقي لهاد الكلمة كيحطمني... عمياء أماما هئ هئ عمياء واش عارفة باش كنحس... نصيرة(مخبية آلمها): أملك في الله هو المنقذ ديالك الوحيد...وقناعتك أهم حاجة فحياتك...(وضعات يديها على حناكها كتمسح دموع بنتها) الإنسان المؤمن خصو يكون قنوع وشكور راضي بقدرو وقادر يتجاوز المحن... أكيد الله مغاينساكش... كلما اشتدت بيك كوني على يقين ستفرج ولو بعد حين.. (حطات سبابتها على قلب بنتها) خلي الإيمان لي فقلبك مايموتش خليه يحيى من أول وجديد... فـتـون: وليت كنشوف الدنيا ظلام فظلام هئ هئ (وضعات يديها على عنقها) كنحس براسي مخنوقة... نصيرة: آه منك أ فتون آه أبنتي راجعي نفسك هاد الكلام ماخصوش يتقال... ماتكونيش أنانية وتفكري غير فراسك كاينين ناس لي كيتمناو يكونو مكانك...نتي أ بنتي عندك حوايج زوينة لي ماعندش الناس لوخرين...
نزلوا دموعها وتكلمات بألم... فـتـون: وشنو الفايدة منهم أماما إلا مكنتش نقدر نشوفهم...
غمضات نصيرة عينيها حسات وكأنها كتكب الماء في الرملة... نصيرة: حاولي تفكري بطريقة إيجابية خليك قوية أبنتي هادي غير أزمة وغادي تفوت متافقين...
هزات راسها بالإيجاب وحضنات ماماها كتبكي بصمت أما ماماها فقلبها كيبكي الدم على حال بنتها الصغيرة لي منين كانت طفلة وهي عايشة في عالم مظلم... شي لي خلاها تولي إنسانة إنطوائية ذات شخصية معقدة وغير قنوعة...بالإضافة إلى أنها إنفعالية وسريعة الغضب... ولكن ماشي لخاطرها المحيط لي ضاير بيها هو لي خلاها تولي هكا...هو لي حكم عليها تكون منبوذة.... كلام الناس وإهاناتهم ليها هما لي زرعوا عدم القناعة بذاتها....بغات تتخلص من عالمها المظلم... عالم وحيدة فيه....عالم فارغ يكسوه الظلام🖤🌟
#يتــ_______بع.. بقلم #رباب نجمة☆❣️
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
