جاوباتو مافاهماش... هند: كفاش نخرج ؟ أنا بغيت غي.....
قاطعها آرسلان وقرب منها شادها من ذراعها بقسوة ونطق قريب منها خلاها تغمض عينيها وتستنشق ريحتو وخا الخوف لي ركبها.... آرسلان: ماعزازينش عليا المتطفلين بحالك... لي كيدخلوا فالشبوقات لي مكتعنيهمش إلا بغيت شي حاجة غانمشي نجيبها لراسي مغانتسناش من وحدة بحالك تجيبهالي....
دفعها بالجهد ونطق... آرسلان: ودبا خرجي....
خرجات كتبكي وتنخصص ماحاملاش الموقف لي تحطات فيه هي بغات غير تتقرب منو وتدير بلاصة فحياتو.... هند: هننن عديم الإحساس......
دخلات للشقة ديالها لي كانت مقابلة مع شقة آرسلان تما فين لقات ماماها كتنقي وتاكل فالزريعة وعينيها غير على التلفازة...... هند: ماما واش مغاتنوضيش تعاونيني نوجدوا شي حاجة للغدا ؟ فيروز: واش مكاتشوفيش ولا مالك ؟ راني مشغولة....
هند(بخفوت): متطفلة وعورة زيدوني أنا لي نستاهل...
فيروز: أش كتبرگمي تما؟
هند: أش شاغلك بالسلامة؟ أخبار عائلة التلمسي لي مكاتساليش... فيروز: واش غادي تقلبي عليا هاد الساعة ولا غادي نوضلك سيري وجدي شي حاجة الغدا ولا طلبيها من برا انا ماشي خدامتك فهاد الدار.... هند: بببف الله يصبرني.....
⚜️هند المرنيسي، 24 سنة عندها ثالث عام فالدراسات الأنجليزية، حلمها هو تعيش قصة حب حقيقية، وإعجابها بالوزير الأول غادي وكيكبر، جميلة وسمراء بحروف سوداء، عينين بنيتين لامعتين، شعر أسود متوسط الطول بحال قامتها⚜️
⚜️فيروز آيت عمر أرملة حياتها دازت غير فالسفريات واللبس والماكياج.... مكادير والو فحياتها من غير التخربيق، رغم إهمالها لبنتها الوحيدة إلا وكتبغيها بزاف، ومعجبة بعثمان التلمسي (وهاد الساعة لي غادي دوز هي أكفس ساعة فحياتها ههه) كتقيل مقابلة أخبارو فالجرائد والمجلات وحتى التلفازة⚜️
🌸في🌸مكان🌸أخر.....🍭
قدام باب الدار كانت واقفة وهازة فيديها سطل دالما.... لابسة كسوة طويلة عاقدة جلايلها على خصرها، مخلية فخيضاتها البيضين يبانوا بشكل مثير وجامعة شعرها بإهمال على شكل سفنجة....كتبان بحال شي بنيتة صغيورة باغا تحداگ...... لي غادي ولي جاي يبقا سارح فيها خاصة وأنها مسرارة.....والدراري مكيقدروش يتزللوا عليها حيت عارفينها خت أيوب ولد الحومة لي مقطع الوراق لي شاف فحاجتو يجبدليه عينيه... أما هي مامسوقاش ليهم ولا لنظراتهم المتفحصة لجسمها المثير....
مليكة: براااءة سربي أبنتي دخلي راه غاتحرقك الشمس.... براءة: وخا هاني قربت نسالي... مليكة: غير تسالي تبعيني للسطح نصبنوا الزرابي....
تأفأفات براءة ونطقات.... براءة: وخا أماما....
كملات تسياقها وبدات تجمع فالسطولة والشطابة والسويگلاس وكتشوف فيهم برضى حتى حسات بشي خيال غطا عليها الشمس.... هزات راسها وهو يبان ليها خوها أيوب فوق الموطور.... أيوب: واش أ ساطة..
براءة اكتفات أنها تشوف فيه وتعاود تنزل عينيها للسطولة كتجمع فيهم منخلاه ومشات عاطاه بالظهر داخلة للدار..... أيوب: هانا على الناس دالحداگة....
