طلعات براءة للسطح ديال دارهوم لي كان كبير او واسع...حطات دوك السطيلات حدا الباب ومشات بإتجاه الغرس لي دايرينو تما... بدات كتسقي فيه وتقصو بشكل معين...حيدات القفازات لي كانت دايرة وناضت واقفة بعد ما صاوبات الغرس... الشمس ضاربة فعويناتها زرقاويتين شي لي خلاهم يبانوا شبه مغمضين.... وخصلات شعرها الرطب كيدي فيه الريح ويجيب علات عينيها فمها لي كطلل من السطح حاضية لي غادي ولي جاي.... ومشات هزات زربية من الزرابي لي محطوطين فالأرض سرحاتها وبدات تكب عليها الما مع التيد وتحك فيها وتفرك..........غوتات بالجهد مخرجة عينيها خلات مها دور مخلوعة لعندها....
براءة: واااهيا ناري شهاد الوسخ والكحولية خارجين من هاد الزربية تقول كنا مفرشينها فكوري... مليكة: وا قوليها لراسك يا العديمة...إلا مافكرتك أنا بشغل الدار گاع ماتفكريه لراسك.... شهر وزياد ماداز فراش الدار فالصابون ولا قاسو الما تعيط حس النسا مكاين فهاد الدار.... ومن الفوق باغا تزوجي....غا قوليلي باش لا حداگة لا لسان حلو... نبصمليك عليها غايرضوك فنهارك... براءة: قلبتي الطرح عليا أمي.... انا أصلا غاندير الخدامة.... مليكة(بسخرية): مالك نتي مقطعينلك اليدين.... براءة: لا غير مكنعرفش نخدمهوم... مليكة: فركي فركي وسكتينا أ بنتي....
قربات حداها كتعاونها.... ظلوا فالسطح كيصبنوا حتى تعاشات العشية.... هبطوا مدگدگين من تمارة دهاد النهار...... دخلات براءة تدوش من العرق والعيا..... وتبعاتها مليكة حتى هي وتجمعوا على براد د أتاي منعنع كيقادوا بيه المزاج....
مليكة: الله على راحة... براءة: شغل ديال شهر جمعناه علينا اليوم... مليكة: الحمد لله غير منين تحزمنا وكملنا شغلنا.... براءة: واييه حمل وتزاح علينا...
مليكة شافت فالساعة لي معلقة فالحيط وتكلمات.... مليكة: يلاه نوضي تلبسي هذا هو الوقت أنا دغيا كندلگ جلابتي اما نتي كتبقاي تما عاماين..... براءة: وخا هاني نايضة...
مشات براءة نيشان لبيتها وهبطات داك الماريو كامل كتقلب على شي لبسة تليق بالمكان لي غاديالو..... طاحت عينيها على فستان فالأحمر قصير ....لبساتو وشافت راسها فالمراية.... ابتاسمات برضى وهي كتشوف مقاس الفستان على جسمها الأنثوي.... بارز ليها التفيفيحات لي عندها وخا صغار ومؤخرتها المرفوعة والمستديرة.... دارت ماكياج ثقيل باش تبان أكبر من سنها... وطلقات شعرها المموج براحة شاداه ببوندو.... لبسات كعب عالي وخرجات فرحانة براسها هازة فيديها معطفها الثقيل....بلون داكن....
خلاتها واقفة قبل ماترجع تقوليها حيديها ومشات كتمختر فمشيتها... لبسات لالة مليكة جلابتها وقادات فولارها وخرجوا بإتجاه ڤيلا التلمسي.....كانوا العيالات والدراري دالحومة مجمعين كيف العادة حاضيين الغادي والراجع حتى لمحوهم وبداو ينمموا ويهضروا عليهم.... ~شوفلك العزبة قداش ولات.... ~إييه شفت أختي ربات الطرف كيتنا حنا لي نضلو نجربوا فالوصفات حتى وحدة ماقضات فينا.... ~ولكن شوفي أصاحبتي صدرها شحال صغير... ~اه عندك الحق ولكن جا مع فصالتها.. والكسوة لي لابسة شحال فنة باينة عندهم شي عراضة ثاني لديك العائلة لي لاباس عليها... ~امم داكشي لي يكون... ~أجي ماتكونش تاهي كدير شي وصفة باش ربات الطرمة... ~وماعرفت تاترجع وسوليها....
شدوا طاكسي ومع كل دقيقة كتمر قلب براءة كيضرب بسعادة كبيرة والتوتر كيزيد يلعب على أوتار قلبها..
🌸ڤـيـلا___التـلـمـسـي🌸
كانت الڤيلا جاهزة باش تستقبل الضيوف.....ڤيلا باللون الأبيض الممزوج باللون الذهبي لي عطاها رونق خاص....ڤيلا متكونة من جناحات عديدة...البعض منها خاصة بأفراد عائلة التلمسي وما تبقى فهو خاص بالضيوف....اما لتحت كاين غرف الخدم.... في قلب الڤيلا كاين صالونات بأثات رائع من صنع أشهر المصممين... أثات مغربي بإمتياز وأثات عصري كذلك... ڤيلا لا تخلو من التحف الفنية الفريدة والقيمة بألوان وأشكال ساحرة....وكذلك الثريات الكبيرة لي زايدة الڤيلا جمال خاص....... كانت الحركة في الڤيلا....الخدم لي كيحاولوا يوجدوا العشاء فالوقت.....
#يتــ_ـبـع.. خليولي آراؤكم ويا ريت توصلوا الأجزاء لأكبر عدد من لي جيم... وتعملوا إشهارات... بأنامل: رباب نجمة❣️
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
