🖤حبـك_أضاء_ظـلامـي🖤
🔱فَــاتِــنَــــــــــةُ آرسَــــــــلاَنْ🔱
بقلم: رباب_نجمة☆
الفصل الثاني: جحيم عشقك لا يطاق🔥
🌟الجزء الرابع والثلاثون🌟
دازت الأيام بسرعة وجات أيام لي غاتحسم مستقبل كل واحد من ابطال قصتنا..... ايام غاتخلي جوج عصافير يدخلوا لنفس القفص وكل واحد بنوايا خفية ومختلفة........
طاح الليل وتزينات السماء بالنجوم المضيئة على ڤيلا_التلمسي....الڤيلا لي كتعرف إحتفال من نوع خاص ألا وهو خطبة الفاتنة والحفيد الأكبر....🖤
فــي_الــغــرفــة....🌸
كانت جالسة على الكرسي مقابلة مع المرآة لابسة قفطان فالصومو كيبري وشعرها جامعاه بشدة محكمة مخلية بعض الخصلات الذهبية تنسدل على جبهتها الصغيرة.....ولايحة الشال المذهب فوق منو...دايرة ماكياج خفيف بارز ملامحها الجميلة... وحمرة زادت من فتنة ثغرها.....ساهية كتفكر ومامرتاحاش...قلبها ماسكتش من الخفقان السريع... وراسها ضرها من قوة التفكير......
مافيقها من سهوتها غير لمسة من يد خشنة دافية....عرفات شكون صاحبها...شكون من غير السند الرحيم.... والذرع القوي... وقفات أمام الأب ديالها وحنات باست يديه وحدرات راسها كتسناه يتكلم......
هز يديه كيدوزها على راسها بحنان والدمعة واقفة فطرف عينيه حمد الله فسرو حيت بنتو ماتقدرش تشوفها.. ماتقدرش تشوف ضعفو.....الاب قدما كان قاصح وصعيب إلا ان معزة وليداتو كاتكون كبيرة وخا مكيبينهاش ولكن غير يوصل وقت الفراق كيبان ضعفو وقلة حيلتو.....تكلم بعد صمت ليس بطويل.....
جبار التلمسي: تبارك الله على بنتي جات بحال الأميرة...
ابتاسمات فتون وخدودها حمارت بسرعة إثر مغازلتو ليها لأول مرة.... ماعاقلاش عليه كسر الحدود معها ونطق بكلمات غزل.. دائما مكايكون رسمي معها.....
فتون: الله يبارك فيك أبابا.....
جبار: غادي نسولك ابنتي وبغيتك تقولي الصراحة....
تحركات لؤلؤات عينيها بإستغراب كتسناه ينطق بسؤالو داك....
جبار: واش نتي مرتاحة لهاد الزواج......؟ بصح باغا تزوجي بولد عمك آرسلان....؟ مابغيتكش تندمي من بعد ابنتي.. الزواج ماشي لعبة وتبارك الله عليك عارفة كلامي مزيان مانحتاجش نقوليك ونزيد نشرح....
فركات يديها بتوتر وطولات فسكاتها كتفكر عاد نطقات بصوت رنان ومطمئن....
فتون: غير تهنا عليا أبابا ورتاح من جيهتي انا ماخطيت هاد الخطوة إلا ولقيت راسي قادرة نكمل فهاد الطريق غير بلاما تشغل بالك معايا.....
ضحك جنب ونطق...
جبار: وكيف ندير مانشغلش بالي وبالي كلو معاك ابنتي... ماشي ساهل عليا نسخا بيك... نتي وختك لي معمرين عليا الدار ومونسيني انا وماماكم الا مشيتي نتي نص فكبدتي غاتمشي.... بصح ربي مارزقنيش الولاد ولكن ولد جوج بنيات خير ليا منهم....نتمنى غير نشوفهم بخير وعلى خير هداك هو الربح....
ابتاسمات بخجل وهضرات بلطافة عاجبها الحال...
فتون: الله يخليك لينا ابابا ويطول فعمرك ماغانطولوش بزاف فروسيا اتافقنا ندوزوا تما غير شهر العسل (ابتاسمات حشمانة) ونرجعوا....
جبار: اوا الله يرضي عليك ابنتي ويسعدك لي نوصيك عليه تهلاي فراسك وفراجلك....غدا غاتمشي باش تكتبي الكتاب وبعد تلاث ايام غايكون العرس هكا اتافقنا مع الحاجة وخويا عثمان المهم يكون كلشي برضاك....
هزات راسها بالإيجاب ونطقات....
فتون: كلامك هو الكبير أبابا......
خرج الحاج جبار من الغرفة متجه لتحت تما فين كانت الحفلة مستمرة بأمداح جميلة والطاولات مالية الجردة بمشروبات واطباق شهية.... بلا الناس لي بداو يجيو وكيتكلموا على هاد الخطبة لي جاتهم غريبة نوعا ما.....
البنت1~ياختي الرجال مافيهم ثقة وخا هو مزوج جاب عليها الضرة.....
البنت2~ لا نتي عاد عرفتيها....الرجل والله وماكنتيلو لالة ومولاتي حتى يشوف فغيرك وخا تكونوا مدوزين الحب والغرام....
البنت1~اييه اختي عندك الصح فالتالي رجع خدا بنت عمو هاديك لي مكتشوفش... ماعرفت شعجبو فيها وهي عورة... شغايدير بيها....
البنت2~ولكن الصح يتقال زوينة ومسرارة..تحطيها على الجرح يبرى السكوتية ومرزنة....
البنت1~واتي نوضي راه قالك دوزي على الواد الهرهوري وماتدوزي على الواد السكوتي...من هادوك بنادم يخاف....هي غير عمية وجابتوا وحنا لي بعويناتنا مبلقينهم كيف البومة ماجبنا غير الريح.....
البنت3~مزال ماشبعتوا من الغيبة فعباد الله...السيد راه طلق مافهمتش كفاش درتوا حتى فلتوا هاد الخبيرة.... وإلا كانت هي عمياء راه قلبها زوين كيتكم نتوما يا العوجات....
الصحافة كانت كتصور فالحضور والمكان.... مستنية قدوم الفاتنة وآرسلان باش يكتبوا عليهم خبر الغد.......
وصل الطاكسي حتى لقدام الڤيلا..... ونزلات براءة مخنزرة ومزروبة ماعاجبها حال..... وكتكلم مع راسها بحال الحمقة.....
#يتبع....
بقلم: رباب نجمة💓
أنت تقرأ
حبك أضاء ظلامي: فاتنة آرسلان من رواية قيامة تنهار
Romanceروايــــــــة: قــــيـــــــامـــة تــــنــــهـــــــار🖤 الجزء الأول: 🖤حـــبــــك أضــــاء ظــــلامــــي🖤 🔱فَــاتِــنَـــــــــةُ آرسَـــــــلاَنْ🔱 بأناملي: 🔥رباب نجمة Rabab Najma🔥☆ سلام حـار لمهوُوسات #الدراما......💓 #ا...
