🖤حبـك_أضاء_ظـلامـي🖤
🔱فَــاتِــنَــــــــــةُ آرسَــــــــلاَنْ🔱
بقلم: رباب_نجمة☆
الفصل الثاني: جحيم عشقك لا يطاق🔥
🌟الجزء الخامس والسبعون🌟
جالسة وسط العائلة في جو عائلي مكهرب وعينيها على سكينة لي بدورها مراقبة عثمان... كانت طالقة شعرها الذهبي وملامح وجها رقيقة وهادئة من غير عينيها لي ظاهرة عليهم نار الغيرة....كتحاول تخبي مشاعرها الحقودة لي كون لقات كيف دير كون ماخلاتش سكينة تزيد حتى دقيقة اخرى قدامها....
براءة كتحاول تحني عينيها هاربة من نظرات مها ولالة نصيرة لي كتحسهم كيشوفوا فيها وكأنهم شاكين فشي حاجة...... ولكن كتصبر نفسها قائلة.....
براءة:مجرد تهيؤات...
علات عينيها ولكن مالقاتش أمامها سكينة... رجعات قلبات عينيها للجهة الأخرى وماكانتش لالة جيدان....
استغربات وتساءلات في نفسها على فين ممكن يكونوا مشاو في الوقت لي كلشي مجموع....
تباردات لذهنها مجموعة من الشكوك وانتهت بنهوضها بعدما استأذنات من الجميع... مغادرة ديك الجليسة وعيون عثمان متبعة خطواتها الأنثوية....
ظلت كتمشى طول داك الممر بالمهل وبلا حس.... عينيها الزرقين كيتحركوا بحال عيون الأفعى هنا ولهيه.... أو وذنيها كل مرة ملتاقطة شي كلمة غير مسموعة....
بقات متبعة الصوت منين جاي حتى وقفات مثبتة عينيها امامها بتركيز وإهتمام فاش وقفات جنب الباب ديال واحد الغرفة جاية في الطابق العلوي قبل من غرف الضيوف..
تغيرات ملامحها متضايقة وحواجبها تقطبات... فاش جبدوا سيرتها....عقلها بدا كيألف مية قصة وقلبها كيضرب بقلق.... لاياش كيخططوا هاد الخبيثات...!!
في الغرفة لداخل...لالة جيدان واقفة مقابلة مع سكينة وكتهضر بمكر دايرة إبتسامة خبيثة....
لالة جيدان: ديك البنت ولات مشكلة لينا حاجز خصوصا وأنها ولات معششة في هاد الڤيلا.... خصها تحيد من طريقنا ونتي لي غاتختاري الطريقة... الوقت ماكافيش والأمور ماشي لصالحنا...
ضحكات سكينة بميوعة ونطقت بثقة زايدة....
سكينة: عندي خطة غاتخليها تسمح فلي قدامها ولي وراها وتهرب من الفضيحة لي كتسناها....
الشك والخوف بدا يراودها من جديد..... خسرات ملامحها والجو ولا خانقها.... تظلمات عينيها الزرقين لي كانوا صافيين بحال البحر لكن كلامهم كان كلام مسموم.....
نطقات لالة جيدان بلهفة باغا تعرف الخطة لي فراس هاد البنت....
لالة جيدان: نطقي اسكينة شنو هي الخطة لي فداك الراس....
سكينة تمشات عاطياها بالظهر كتقرقب بطالونها او وقفات كطل من خلال النافذة الزجاجية.....
سكينة: مجتمعنا مهما تفتح ألالة جيدان العيب كاتهزو البنت اما الراجل عمرو مايتعاب... (ضحكات بخبث) وعيب البنت هو شرفها....
ضحكات لالة جيدان من جديد مشجعة كلامها ونطقات سكينة مكملة كلامها....
سكينة: يعني لي بغيت نقول غير غايعرفوا بلي ديك بنتهم ولات مرأة وهازة كرش من الحرام أكيد إلا ماقتلوها غادي يرميوها برا وعمرها تحلم تشوف لا عائلتها ولا حب قلبها.....
حسات براءة بالخنقة وعدم الأرتياح.....بعد ما سمعات لمخططاتهم.... نساحبات من تما بخطوات تائهة ومشوشة باينة من وجها.....
دخلات للحمام وتقابلات مع المراية.... وجها كان مخطوف....رفعات شعرها وغسلات وعاودات كتبردو....مسحاتو او تكات على الحائط كتسترجع إنتظام تنفسها.... خرجات كتسوط عقلها غائب ومامرتاحاش.... ولات كارهة هاد الڤيلا ومابقاتش باغا تجلس ولو ثانية فيها لكن إلا قالتها لماماها مغاتبغيش حيت هي لي واقفة على شغل الدار بيديها... عيات من الهم والنحس لي تابع حياتها....
تنهدات بعمق وحطات يديها على كرشها وكأنها كترسم خطة في بالها.... بدات كتفكر وهي كتمرر يديها على كرشها......ابتاسمات ونطقات بهدوء.....
براءة: بغيتوا غير الفضيحة اوا هي اللي ماتعاودش...
#يتبع..... بأنامل: رباب نجمة🖤🔥
أنت تقرأ
حبك أضاء ظلامي: فاتنة آرسلان من رواية قيامة تنهار
Romanceروايــــــــة: قــــيـــــــامـــة تــــنــــهـــــــار🖤 الجزء الأول: 🖤حـــبــــك أضــــاء ظــــلامــــي🖤 🔱فَــاتِــنَـــــــــةُ آرسَـــــــلاَنْ🔱 بأناملي: 🔥رباب نجمة Rabab Najma🔥☆ سلام حـار لمهوُوسات #الدراما......💓 #ا...
