🖤حبـك_أضاء_ظـلامـي🖤
🔱فَــاتِــنَــــــــــةُ آرسَــــــــلاَنْ🔱
بقلم: رباب_نجمة☆
الفصل الأول: عالمي المظلم.☠️
🌟الجزء الثالث عشر🌟
حط يديه السخان على يديها لي فوق صدرو ونطق...
عثمان: من ديما كنت كنحميك وغانبقا هكاك...(بغمزة) نتي عزيزة عليا كثر ما أنا عزيز عليك......
حسات بروحها غادي تزهق إثر كلامو.... تخيلات راسها فعلا حبيبتو وكيتغزل بيها... الصهدة طلعات معها والفراشات دايرين سباق فكرشها الصغيرة.... وقلبها كيعزف لحن عشق استوطن قلبها من لما كانت بنت صغيرة....
فاقت من افكارها الجميلة فور مادوز يديه قبالت عينيها...
شافت فعينيه سرحانة فغرامو من جديد وقلبها كيضرب بالجهد... وهو ماكانش غافل على التغيرات لي وقعوا عليها من لما دخلات عندو للغرفة.... هو بدورو شاف مباشرة فعينيها كيحاول يقرى معانيهم... اش مخبية عليه هاد المراهقة الصغيرة.... مستبعد فكرة أنها تكون كتبغيه ولا معجبة بيه بمفهوم غالط فهم معني عيونها...
تكلم معلي حاجبو ونظراتو أبدا ماتزحزحوش من على عويناتها الزرقين.... خلا قلبها يسكت واللون يتخطف من وجها... ومشاعرها المخلطة بالفرح والسعادة يتقلبوا لمشاعر اليأس والخيبة...
عثمان: واش فحياتك شي شخص؟
يعني عند بالو كتبغي شي شخص أخر... هو قدر يشوف علامات الحب فعينيها ولكن ماقدرش يلاحظ بلي داك الحب ليه هو ماشي لواحد أخر...
سكتات كتشوف فيه بلا ما ترمش فحين هو كمل كلامو...
عثمان: كتبغي شي واحد أ براءة وهو رافضك!! ماتخبيش عليا من ديما كنلقاو الحل مع بعضياتنا.....
هزات راسها بالإيجاب وحدرات راسها كتغبن باغا تبكي....
زير بعصبية علي يديها الناعمة لي فقبضة يديه....
والعرق لي فجبهتو برز بوضوح معبر على الغضب لي تملكو....
تكلم بحيرة وهو كيشوف فعينيها تايه فبحرهم....
عثمان: واش حب من طرف واحد ؟
هزات راسها بالإيجاب وعينيها فالأرض....
عثمان: شكون هذا واش كنعرفوا.....؟
بقات ساكتة بلاما تجاوبوا اش غاتقوليه...."نت لي كنبغي" ماتقدرش تخسرو بسبب إعترافها التافه........ ماشي الوقت المناسب باش يعرف........صبرات حياتها كلها ومزال قادرة تصبر شوية وخا يكلفها سنين طويلة...
عثمان: واش هو عارف ؟ من إمتى أ براءة... ؟
مد يديه لذقنها كيتلمسو بحنان و كيمرر أصابعو على أطراف يديها بحب كبير........ براءة مكانتها خاصة فقلبو....... كيحس براسو هو مسؤول عليها وحمايتها واجبة عليه.........
عثمان: غير تكلمي أ براءة... نلقاو الحل بجوج....
رفعات راسها فيه بعينين مغرقة بالدموع وخدودها حمرين وصدرها كيطلع ويهبط بوتيرة متصاعدة....تكلمات بخفوت وبألم........
براءة: منين كنت صغيرة وهاد الحب ساكن فقلبي معذبني بزاف ولكن فرحانة حيت وقعت فحب داك الشخص... وغانبقا نبغيه حتى نموت وعمرني غادي ننساه ولا نمحي هاد الحب من قلبي وخا يوقع لي يوقع.... (بتنخصيصة) وخا هو يرفضني او وخا مايبغينيش كيف ما أنا كنبغيه.... المهم أنا بغيتو وباغياه حيت انا لي ختاريتو يعني خصني نتحمل عواقب حب مستحيل....ماعرفتش واش أنا قادرة نتحمل هاد الرفض او واش قادرة نبقا صامدة وكندافع على حبي... ويمكن خصني نصبر على فراقو نهار يعرف ولكن خصني نتحمل هادشي كامل....
قالت كلامها وبغات تمشي حتى جرها لحضنو مخليها تبكي فراحتها.... كتبكي فحضن الراجل لي كتبغي.... هادشي يكفيها...⭐يكفيها تكون قريبة منو وبجنبو⭐..
قلبو ضرو على حالتها... بقات فيه بزاف وحس براسو فاشل حيت ماقدرش يحميها.... هو لي كان معها في جميع مراحل حياتها كفاش قدر يغفل عليها حتى بغات شي شخص...خصو يتصرف ويحاول يعاونها وينسيها فيه... عارف بلي صعيب ولكن كلشي لمصلاحتها... هو مايقدرش يشوفها كتعذب هادشي كيضرو بزاف..... ناسي بلي مدام مقرر يخليها فجنبو وينسيها فحبها..غادي تزيد تبغيه كثر وتتعلق بيه كثر وكثر......
#يتبــ____ـع....
بقلم: رباب نجمة☆❣️
أنت تقرأ
حبك أضاء ظلامي: فاتنة آرسلان من رواية قيامة تنهار
Romanceروايــــــــة: قــــيـــــــامـــة تــــنــــهـــــــار🖤 الجزء الأول: 🖤حـــبــــك أضــــاء ظــــلامــــي🖤 🔱فَــاتِــنَـــــــــةُ آرسَـــــــلاَنْ🔱 بأناملي: 🔥رباب نجمة Rabab Najma🔥☆ سلام حـار لمهوُوسات #الدراما......💓 #ا...
