🖤حبـك_أضاء_ظـلامـي🖤
🔱فَــاتِــنَــــــــــةُ آرسَــــــــلاَنْ🔱
بقلم: رباب_نجمة☆
الفصل الثاني: جحيم عشقك لا يطاق🔥
🌟الجزء الأربعون🌟
صوت الطبل والزغارت تقطع وكل واحد اتجه لغرفتو يرتاح وينعس....!
الليل طاح و الكل في بيتو ساد عليه كيرتاح من تعب هاد الليلة لي شهدات على خطوبة الحفيد الأكبر لعائلة التلمسي.... !!
إلا هو عاد داخل في عز الظلام والسكات طالع بخطوات مسرعة لبيتو جامد الملامح وعجبانوا مقطبة..... باينة معصب!!
دار وراه غير حس بشي خيال وراه.... لقاها قدامو بملامح قلقة باينة بلي مشطونة عليه.....
نصيرة: ولدي عمران.....
قربات منو شادا من خدودو ونطقات....
نصيرة: الله يا ولدي وأش هاد الغبرة النهار كامل مابنتيش..... حتى حالتك مكطمنش....
رمش بإنزعاج ونطق مبعد منها....
عمران: ماتشوشيش عليا المفروض تكوني فرحانة بخطوبة بنتك.....
عقدات حجبانها ونطقات معلية حاجبها.....
نصيرة: علاش مامنحقيش نتشوش عليك أولدي...... (سكتات شوية مكملة كلامها) أنا فمثابة ماماك....ومعتابراك ولدي لي ماعنديش....
قطب جبينو اكثر ونطق بإندفاع....
عمران: عارف هادشي ونتي على راسي وعيني ولكن قلبي كيضرني بزاف غادي نطلع لبيتي محتاج نبقى بوحدي....
ماتسناش تجاوبو حتى كان طلع الفوق بسرعة ومشات عينيه لبيتها كيتفحص بابها بلهفة.....سرعان مابعد عينيه ودخل لبيتو...... جلس على السرير شاد راسو بين يديه كيشوف بنطرات مظلمة..... وكيشوف في النافذة لي كيدخل منها ريح قوي مهاجم الستائر في شجار حاد.....
نزل عينيه الحمراء للأرض مدوز يديه على شعرو بملامح مظلمة مردد بخفوت......
عمران: دبا هي معاه ولكن من المفروض تكون معايا... هي ديالي....مشات وماعبراتش حبي ليها.... بلا ماتفكر تبعاتو.........
غوت بصوت عالي ناطق....
عمران: غادي ندمكم بجوج.....
🔱في_إحدى_الشقق_الفاخرة🔱
جالسة متوسدة ركابيها وشعرها الطويل مخبي وجها.... عينيها حومر وملامحها حزينة.... صونا هاتفها برقم غريب.... هزاتو كتشوف فيه بإستغراب....
هند: رقم غريب شكون كيصوني عليا ؟
ناضت حافية القدمين بقلق مقطبة جبينها ورافعة حاجبها الأيمن...... حلات الخط كتسنى تسمع صوت هذا لي مصوني عليها فنص الليل....
هند: واش صونيتي فزك الليل باش تبقى ساكت...جاوب ألخرا ولا تلاح بقيتي ليا غير نت نلعب معك.....
رد عليها بصوت هادئ عكس الإعصار لي فالداخل ديالو....
عمران: مزالة معصبة.... ولكن خصك تحكمي فراسك شوية باش ماثيريش الشكوك....
تجلسات فوق السرير مرجعة شعرها الطويل ورا وذنيها...... وردات بصوت شبه مسموع وبنبرة منكسرة....
هند: عمران هذا نت....
جاوبها على الفور ونطق بإستفهام....
عمران: كنتي كتبكي أ هند ؟
رفعات عينيها ماباغاش تدرف الدموع.... حاسة براسها مخنوقة...راسها ثقيل عليها وعاطيها الصداع بسبب البكا لي بكاتو.... رمشت ناطقة بإهتهزاء....
هند: فاش كيهمك هادشي نت...!!
عمران: راني سولتك جاوبي.... (سكت شوية ورجع نطق) ولا عرفتي كلشي راه باين من نبرة صوتك.... نتي وحدة جبانة وضعيفة اكيد دبا كتحسي براسك مخنوقة ومقادراش تتحملي خيبة الأمل لي تعرضتيليها....عاجزة وماقادراش تدير شي خطوة باش تمنع هاد الزواج....
سكت شوية كيتسنى يسمع صوتها كتوبخو على كلامو الوقح لي تجرأ وهانها بيه... مكانت إلا ثواني حتى نفاجرات كتبكي بصوت منخفض....
هند: أه فعلا أنا وحدة ضعيفة وفاشلة مكنعرف ندير والو من غير البكا... أنا مانافعة لوالو تخلقت باش نعيش وحيدة كنبكي على زهري.... عرفتي أصعب إحساس هو لي حسيتو اليوم أصعب بأضعاف من دوك الأحاسيس لي حسيتهم قبل.... الخسارة.... قلبي مكوي... حتى لساني عاجز ماقادرش يعبر على التفاصيل كلها.... فاقدة الأمل ومستسلمة وكأني رفعت الراية البيضاء بخسارة وإنهزام.... شعور مر لكن بالسيف عليا نشربو...
سكتات كتبكي وهو الأخر حس براسو حط يديه على الجرح... ونطق بهمس...
عمران: واش كتبغيه لهاد الدرجة....
زمت شفتيها بغضب ورددات....
هند: لا كنت مستعدة نبغيه لكن هو قطع حبل أمالي... أنا بغيت ننتاقم لهزيمتي....
تبسم جنب ونطق....
عمران: تزوجي بيا.... !!
وسعات عينيها مصدومة من عرضو داك.... وأنفاسها تسارعوا..... ابتاسمت تلقائيا.....
#يتبع....
أنت تقرأ
حبك أضاء ظلامي: فاتنة آرسلان من رواية قيامة تنهار
Romanceروايــــــــة: قــــيـــــــامـــة تــــنــــهـــــــار🖤 الجزء الأول: 🖤حـــبــــك أضــــاء ظــــلامــــي🖤 🔱فَــاتِــنَـــــــــةُ آرسَـــــــلاَنْ🔱 بأناملي: 🔥رباب نجمة Rabab Najma🔥☆ سلام حـار لمهوُوسات #الدراما......💓 #ا...
