🖤حبـك_أضاء_ظـلامـي🖤
🔱فَــاتِــنَــــــــــةُ آرسَــــــــلاَنْ🔱
بقلم: رباب_نجمة☆
الفصل الأول: عالمي المظلم.☠️
🌟الجزء الحادي عشر🌟
فُــتــون: عييت مانخمم فلي جاي أو فلي غايكون.... صداع فالراس وهضرة الناس مابغات تنسالي....قلبي حاساتو غايوقف و أنا طريقي عاد بادي...دموعي على خدي وهمومي مابغات تسالي....الناس عايشة بلا هموم وأنا عايشة نعاني.....كلشي تبدل وحياتي غادا بالمهل...نتمنى نولي مزيان وعارفة لي تمنيت مزال عليه الحال...ماشي مستحيل ولكن نقدر نقول محال..... على بالي نعرف الأيام اش مخبيالي....⭐
قالت هاد الكلام وعيونها معمرين بالدموع... هزات رموشها المبللة فالسقف ماباغاش تضعف وتبكي.... مسحاتهم بطرف يديها.... ووقفات كتنش على وجها..... تمشات جهة الباب بعدما خدات نفس طويل وخرجات بإتجاه الصالة فين مجموعة العائلة...
أما براءة من مور ماخرجات من عند فتون تمشات فالممر بخطوات متوازنة وتابتة وصلات للصالة...دورات عينيها عليهم كانت لالة مليكة ونصيرة كيتجمعوا ويضحكوا وآرسلان مبعد عليهم وملهي مع المكالمات ديالو لي مكاتساليش أما يسرى وآمال مكاينينش.... زادت كتقلب بعينيها عليه لكن مالقاتوش... ابتاسمات بفرح شديد وقلبات أدراجها للطابق العلوي....
وصلات لغرفتو دقات جوج دقات ودخلات بعد ما خدات الإذن منو..... لقاتو واقف عريان من الفوق والقليل من الوشوم مزينة ظهرو العريض... كان كيطل من النافذة الزجاجية لي كتعكس البحر الهائج منظرو ساحر وجذاب وهاز فيديه گارو كايكمي.... تصعقات بالمعقول اول مرة تشوفو عاري الصدر أمامها بعضلاتو المشدودة ولون بشرتو لي الإحمرار خدا حيز كبير منها...بشرة لامعة وملساء ... وسيم لأقصى درجة تقول ماشي هذا لي عندو أكثر من اربعين سنة... وقفتو الرجولية وطريقتو فالكلام كلشي كيجذبها ليه.... ولي صدمها أكثر هو كيكمي ماعمرها ظنات غايكون كيكمي ولا كيستعمل هاد الأشياء....شكلها غافلة على بزاف دالحوايج....متبعة قلبها وماعارفاش بلي ماشي ساهل تدخل لهاد العائلة تحت إسم زوجة عثمان التلمسي... تمتمات بخفوت وهي حالة فوهة فمها بذهول...
براءة: شكون غايتيق بلي أنا طايحة فيك أ الشارف...اكيد غايقولو داخلاك على الطمع وانا مكايهمني من هادشي كامل غير نت... من صغري وانا كنحلم بيك... تعاملك معايا ولطفك خلاني نتعلق بيك....عارفة بلي صعيب نخليك تبغيني ولكن حالفة حتى نكسب قلبك أ عثمان....
قاطعها من شرودها كلامو الهامس لي بورش ذاتها وهز كيانها.... الهمس ديالو شبيه بشي عاصفة كتخربق خيام قلبها.....
عثمان: نعام أ الغزالة!!
هزات عويناتها الزورق فيه ونطقات بارتجاف....
براءة: أنا ءء غير بغيت نن...
الهضرة تلفات وحروفها مشات.. بقات تفتف وتدخل وتخرج فالكلام حتى قرب منها وهي عينيها على عضلاتو وكرشو المطراسية... حسات بالحرارة حتلت جسمها... أش هادشي كيطرا ليها........؟
ابتسم بخفة وهو مركز فعينيها لي ساهيين فجسمو المنحوت...ونطق مقرب منها عاجباه الحشمة لي بانت فخدودها الحميمرين... خجل أول مرة يلمحو عليها...
عثمان: فين لسانك أبنتي؟ براءة لي كنعرف لسانها طويل وكلامها كثير... ماشي معقول تحشمي مني وانا فمقام باك...
رفعات عينيها فيه بالزربة ماحاملاش كلامو....هو مستحيل يكون فمقام باها....هو حبيبها...روحها هو راه الراجل لي كتبغي هذا اش كيخربق عليها... واش هي مكتحرك فيه حتى حاجة كيشوفها مجرد بنت عادية بحالها بحال جميع البنات... لالا وقيلة البنات لوخرين احسن منها بالنسبة ليه...
تكلمات بعصبية ملحوظة....خلاتو غير كيشوف فيها مافاهمش...
براءة: انا ماشي بنتك ونت ماشي بابا...أنا وياك مكتربطنا حتى علاقة لي تخليك تقولي نتي بنتي... أنا بابا مات الله يرحمو ونت ماشي بابا فهمتي أسي عثمان....
ماكرهاتش تزيد تقوليه بلي هو الحب لي غزا قلبها وانتصر... ماكرهاتش تعتارفليه بمدى إعجابها وعشقها ولكن ماتقدرش ماشي الوقت المناسب...
شاف فيها بعيون مبسمة ونطق..
عثمان: أنا كنعرفك منين كنتي صغيرة ماشي حشومة تخلي بيناتنا هاد الرسميات...
ماتصدماتش من ردو الهادئ... من ديما كيتعامل معها بحال شي أميرة عمرو غوت عليها ولا جرحها... نزلات وجها ماعاجبهاش الحال.. وقالت ببراءة باغا تبكي...
براءة: ماتقوليش بنتي أنا ماشي بنتك...
#يتـ___ـبع.....
بقلم: رباب نجمة☆❣️
أنت تقرأ
حبك أضاء ظلامي: فاتنة آرسلان من رواية قيامة تنهار
Romanceروايــــــــة: قــــيـــــــامـــة تــــنــــهـــــــار🖤 الجزء الأول: 🖤حـــبــــك أضــــاء ظــــلامــــي🖤 🔱فَــاتِــنَـــــــــةُ آرسَـــــــلاَنْ🔱 بأناملي: 🔥رباب نجمة Rabab Najma🔥☆ سلام حـار لمهوُوسات #الدراما......💓 #ا...
