براكين الشوق

41

تدقيق سمر $ سلسبيل
بقلم نور
#براكين_الشوق41
الحب الاوحد..

رضا...

«اعطيني رصاصة في القلب  اجعليها في المنتصف فلعل حروف اسمك بسويدائي تنمحي.. ولعلك تغادرين روحًا بك تهيم».

صوت امي المبحوح بسبب المرض وهي تلطم..
: يمة «منيل» عوفي المسدس يمصكوعة ولج  مو لعب خاف مبيه امان...

راح تقتل ابني يبووو يا ناس لحكوني..

ظلت كاعدة بالكاع  رجليها ما تعينها  وهي تدك وتلطم..
ابوي ملتهي لازم حلك حسين الينزف..
بس حسين وخر ابوي وكام يريد ياخذ المسدس من منال الي بفعل رد فعلها ضغطت زناد

بس الرصاصة شاء القدر تشطح بيد فضل مدخلت مجرد شطح

ركضت أمي لفضل وهي صفرة و تنهت تعب

و شكرية هدت تريد تضرب منال.. لزمتها عنها.. ودفعتها على كيف...

اما جمايل توها دخلت هي و جنطتها الزغيرة.. مبينه متعاركة وي رجلها كالعادة..

: يبووو كتلتوا فضل خوية فضل...

سكتها ابوي

: كافي رضا تظل تسوي مشاكل الله  لا ينطيك واحد كسرت فجوجة واحد من وراك تصوب..

راح حسين لزم ايد فضل يتفحصها وخرته دفعته
رضا : وخر هيج شفهمك؟

صحت لام احمد

: جيبي المقص..
باوعولي بخوف بس عيون امي مطمأنه

فضل : شسويلي بالمقص

: لا تخاف ما ابتر ايدك بالمقص ميحتاج.

ابوي : ولك شي مو كدة لتتورط نجيب مضمد يعقمة اذا جرحة ميحتاج خياط..

تجاهلتهم و قصيت  ردنه وهو يتألم ومرته يمه لازمه ايده الثانية وتبجي بس دون ميبدر منها كلمة..زايدة.

بس تشجع زوجها يتحمل الألم..
ام احمد: شوي اصبر و الله جرح سطحي مبيك شي

فضل : راح اموت..

الجهال من منظر الدم خافوا وصار البجي وصريخهم..

تجاهلت استهزاء منال

منال: عمي لو تاخذوه مستشفى راح يخلص دمه و الاخ رضا يكلب بيده هو مو طبيب شفهمه.

ابوي : رضا اطلع برى و عوفهم تريد تموتهم و ترتاح ولك ساعة سودة خلفتك مو يوم شفت من وراك راحة. يا فاشل لو بيك خير مو كضيتها راسب لمن فصلوك.

افحص ايد فضل و ميهمني الاستهزاء مدنك اتفحص الجرح واني مبتسم
راضي عن نفسي وان كالوا يا فاشل مسوي روحك طبيب هة.  

ابوي : حسين امش ناخذكم مستشفى الله لا ينطيك رضا كون بيك الرصاصة ولك كاسر سن اخوك لو الثاني جا انكتل.. بوية منال انت شنو بوية شقاوة وينج وين السلاح