براكين الشوق

٤

#براكين _الشوق_الحلقة٤

شاب و شبع لوعات گلبي
الدنيا تتعب من تحطني ببالها
وانه اول ما صرت خيالها...

ــــــــــــــــــــــــــــــــــــــــــــــــــــ

غيث....

امشي اني و انمار  سلمنا على  مجموعة ولد

باوعلي انمار
: شوف ذول مسار كال لا تمشي وياهم ذول كبسلجية يجرجروك لدروب مو حلوة..

باوعتله : ممممم

: شوف اكو ديج اشتراه رياد... و الله ديج حاجيه يبيعه الي عندي مسابقة عركة ديوجة..

: وليش يبيعك ياه اكول غريب اول مرة نتمشى و ما تنتهي بعركة

ضحك : لا تحسد.. خليك هاديء..

هاي وصلنا سويلي طريق اتغدة عدكم..

دخلت وي انمار بنات عمي شردن للغرف
رجعت ورى رزلت انمار

: ليش ما سويتلي طريق... شكد عيب سديت نفسي طاح حظك انمار اروح اكل تمن ماش وروبة يم امي احسن.

خليت وطلعت صاحني مسار

:تعال وين رايح يمعود...

: اروح لأمي

شوي دخل عمي و شافني..

دنكت مستحي منه

غيث : شلونك عمو الله يساعدك

: هلا ابني هلا يمتى تبدي مدارسكم

انمار : عن قريب

رضا : يا الله حتى تدرسون وتلتهون نرتاح من لطلطتكم.. انمار ليش اخيك واكف ما كضيتوه على الغدة

غيث : مشكور عمي امي مسوية خوش تمن ماش و روبه...

: اكعد غيث بس والله مشتهي تمن ماش وروبة يابة غيث روح اطلبلي من ام علي صحن تمن ماش...

باوعت لعمي..  و كعدت واني متوتر مدري ليش اخاف منه واني الما يخوفني بشر

رضا : حيل فرحت لعلي من دخل قانون..   حتى يتخرج و نزوجه و انت هم شد حيلك نزوجكم.. انت ورياد بس تتخرجوا
نوفي امانه ابوكم.  تستقرون

غيث : احم.. 

رضا : اي ابني شخبار امك.. ليش،ما اجت  من عزمناكم..

غيث : هاا ما ادري عازمين محد كال.

رضا : اي والله ابني شفت حتى لو اتقرب من ولد اخوي امكم تريد تبعدكم عني

ام مسار الغدة شنو التأخير،هذا

شوي رجع انمار
: ممسوية تمن ماش علاوي متخربط و ماخذيه مستشفى توهم رجعوا

    كمت بقلق..  :  ليش وصل من بغداد!

:  اي و متلكيه اخوك بالديج مو  تدري عندة حساسية و فوبيا من الديوجه.