براكين الشوق

الجزا ثاني 2

#براكين_الشوق 2

دكات الوكت وياي
كلهن بالكلب صفن
ولا وحدة اجت بالريح
كلهن بالعظم دكن..

#اول شطرين بقلمي و اخر شطرين منقول

بشاير...

وخر مني فتحت دبوس حجابي و كوه اتنفس اشهك ابجي،حظي..

وهو يتأكد من محفظته و فلوسة..

حيل استهضمت شنو بباله اريد اقتله واسرقه لو شنو

رد بساع: بمنو اتصلتي؟

رديت: بغيث سمعتك تون وشفتك مصخن كلت بشر و يحتاج مساعدة...

صح املك اله مشاعر بس ما يعجبني رجال كايم كاعد بس يغلط و غير الضرب..

رغم منال تنتقده بهواي امور بس جانت تكول طيب وحنين و مو همجي ميمد ايده على مرة الا اذا فقد اعصابة و بسبب كبير كولش.. سولفتلي ضاربها مرة او مرتين بسببها هي..

الله يرحمج منال كد حبج اله ميهلج تحجين بكل عيوبه..

ظليت كاعدة وهو يجيك بكل غراضه

مدري منين جتني الضحكة
: ترى ما ابوك لو ابوك ما خلتني منال امينه على كل ممتلكاتها.. حتى لو كانت بسيطة جانت تثق بيه كولش..

يعني تطمن ما بايكتك ابد و لا ايدي طويلة...

: ما اثق بيج ولا باي امراة عدا منال..

هنا نرفزني وكفت بصيغة المعصبة

: صحيح ترى منال تحجيلي شلون تهضمها مو انت الي تكللها متتواصلين وياي بس حتى تردين فلوس لو شسمه المهم..

لا اني لا منال نحتاج فلوسك منال عمرها ما طلبت منك ولا اني اطلب مثل ما حرجوك بزواجنا اني حرجوني..

كل الردته مكان ابقى بيه لمن ارتب وضعي
ثق لو ما نسوان الولد هضمني بقيت يم علاوي واخوانه على الاقل ميوم هاني

و العيشة تدبر اول وتالي اشتغل للعلم ما خابرت صاحبي الحمد لله ما اصاحب من جنت حرة دون التزام بالوفاء لرجل على ذمته مو بعد من صرت بذمتك ولو متستحق هاي الذمة.. حيل امداني...

ضربت وجهي ندم لان جنت اشجع منال تصالحة لو تتواصل وياه لو تفوتله جفصاته و اطيب خاطرها واكوللها ترى هو طبعه وتعرفيه فوتي فوتي حتى المركب يرسى..

امداني هسة عرفت شلون تنجرح من يذب كلمة اكبر من راسه تجرحها. جربت هسة وعرفت سعور مرة تنهان و كلبها يحترك من القهر..

هسة عرفت الالم من واحد يجرحك بكل برود..

و المشكلة متنطي بيه لعد شكد تحبة متنطي بيه لدرجة تكول مجان هيج بشبابة يمكن تغير بسبب الصدمات المرت عليه او تجارب الحياة.. واختلاطة باسوأ نماذج..