رجفة ثانية ورعدة خجل على لهفة ابتسمة انرسمت على شفايفي جريت نفس بلكت اتنفس دفوا قربه. انتظر وانتظر
فص ملح وذاب ما بين ايديه وراح شباب وراح ما تهنى يوم ارتاح.. يا شمس الدنيا والكمر انا اتفع شبابي والعمر لو يرجع اضمه و اعتذر و يشوف شسوى بيه القهر
هاي كلمات اصوات بعيدة موسيقى. لا هاي اغنية شوي شوي بديت استوعب. ارمش افتح عيوني طالعني السكف العتيق و عضامي تكسرت من قساوة القطن متعودة انام على سفنج وارقى انواع المفروشات تمغطت واني متمددة اريد استوعب اكثر وين انه لعد علي وين مو جنت بحظنه و نريد نتبادل مشاعر الحب وجان راح يبوسني
اجت عيني بالبلازما المشغلة...اففففف جان حلم حرامات و الله لو شوي مكاعدة و بايسني اول.. راحت علي البوسة من ورى هاي الأغنية بس صوت بجي و همسات عتاب من منال جذبت انتباهي وي منو تحجي؟
كعدت على حيلي واني اباوعلها لازمة صورة شاب انطيه عشريني وهو بالصورة بس شاربة ثخين و الرجولة تنضح من عيونه حادة و ملامحة بيها شبه من علاوي.. و الله احلى من علاوي.. لونه ابيض احمر علاوي اسمر و ملامحة خليط من امه و صاحب الصورة
