براكين الشوق

الحلقة الاخيرة

بقيت اشتاك من دونك
و جان احسن اضوك الموت
ولا الفراك
بدونك ما عشت اني
احس روحي شخص ثاني
صارت دنيتي ظلمة
و اذا بجيت منو يهمه
الدنيا بدونك صارت صعبة
حسيت بنص بيت الغربة.. ꧁꧁꧁꧂

ماتت بعدكم روح
حبكم سكن بيها
صارت حياتي جروح
خربت معانيها
و شبيدي على النسيان
تعبني حيل الشوك
لو عمري يمكم اكضيه
لو روحي تصعد فوك
كاره الكون و اعشك شلون
بعدكم عشت بالكوة...

ــــــــــــــــــــــــــــــــــــ

بشاير

من يوم موت منال مو بس اياس تيتم حتى اني..

دخلت غرفتها واني اشوف مكينتها كعدت ابجي بحركة..

باوعت للساعة علي اخذ اياس و مرجعه

رحت لعلي جان عازل روحة بالسرداب

بس شفت الباب مفتوح دخلت..
سولاف ماكو.. ملتهية بالبيت لكيت علاوي كاعد بزاوية ورافع راسة لفوك وينحب..

: ولج يمة الايام تمشي و مكانج فارغ يمة ما مفاركج ما اكدر لا اصبر ولا اتحمل مخليت شي مسويته..

اشتريتج مشترى.. و ما فاد.. شلون بية شيصبرني يمة..
باوعت اله مكسور ومسحت دموعي و همست

: علاوي..

كمز خطية واكف و باوع للباب مفتوح جر نفس..

لاحظت من ماتت منال الولد ديتحرجون من اوكف واحاجيهم بينما قبل عادي ميانتهم وياي

وضع جديد علي وما اعرف شصرف

: ها خالة امري

نكتت ملابسي السودة عن تراب مدري منين

: علي مو جنه اياس تأخر هناك..

باوعلي و دنك: اخذه ابوه..

بس لا تخافي هو متعود هنا شوي يبجي ويرجعوه

شوي دخلت سولاف بركضة ومخبوصة وخايفة من شافت ماكو شي من الخايفة هي منه وكفت وجرت نفس وبصوت يرجف

: ليش وحدكم بالغرفة باوعلها علي مستغرب..

واني رجعت ورى
: مدام طمنتني على اياس اروح و يا سولاف اني خالته يعني مو بحال تفكيرج الوسخ و تعمدت الباب مفتوح...

طلعت و هو يرزل بمرته سمعتها

: وجودها صار زيادة علي اغار مو بيدي لا يلبسوها براسك بحجة تزوجها حتى تبقى لاياس و لا تنسى كل قرابتها بيكم حي الله بت خال امكم

يعني بحياة ماما منال عادي وجودها بس هسة شكو و هي تحل عليكم.. شوف حل

: سولاف كافي غيرة امي تحبها و البنية ممأذيتنا و شعلينا بالناس قابل ببيت عزاب هي شو مزوجين...

مشيت و اني لغرفتي دمعتي بعيني.. حضنت صورة منال
وينج منال شوفي خيتج وينج خية
شلون بية هاي مخليتني براسها خاف تخلي الولد يطردوني وين اروح