براكين الشوق

38

#براكين_الشوق٣٨
حبي الاوحد

ــــــــــــــــــــــــــــــــــــــ

مغرورة والله مغرورة
متنمحي من بالي هاي الصورة
مغرورة ما ذكرت ايام الزغر و الجورة 
كل البنات تندمن من عافن الخلان
و الحب بدونه يا خلك ما ينسعد انسان....
وسنينه تبقى خالية ومهجورة..

خليك صابر يا كلب وي الجست وياك.

لابد تجي يوم وتحن لهل ماوفت وياك
تذكر حبيب الينتظر وزوره...

بلجي و عسى وباجر تمر ومكابر بروحي
خايف اسراري تنفضح و تبين جروحي

خليها بمواج البعد مغمورة
صايغ تراجيها ذهل(تعجب) من خدها الوردي
كايل الذهب عند السمر و الذهب  مو عندي
وحدتهن بوسط الشذر  بلورة

ـــــــــــــــــــــــــــــــــــــــــــــــ

التفتت ناحيتي وهي تجر نفس

كمشت وجهها من جوة حنجها بجف ايدي واني صافن بعيونها وسحرهن و جمال رسمهن..
: هاي العيون والسمار البدوي سابيني يا سمرة.

اشتعلت اطرافي بنار عشكها..  حرارة جسمي وي لهفة احضنها..

احتويها..   هنا بين ضلوعي اخليها تنبضني.
اي تنبضني بدفق الحياة

منال جانت هي الحياة بالنسبة الي رغم هي سلبية ودومها تبجي  و تحسس المقابل هاي هي نهاية العالم بمصايب تصيرلها..

بس فعلا رغم سلبيات صفاتها منال دفق حياتي استمراري بالنجاح.. 

حالي و براكين الشوق الها لهفة ابديه لو هي بين ايدية وبحضني هذا الشوق الها عطشان مثل صايم  ..   ناسي يشرب مي و صاح المؤذن امساك..

هنا من شفتها توخرني و النبي حسيت محروم.. 

:  ليش يا نظر عيني تعذبيني

:  رضا بطل ضوضائك كول ناس جيران تريد تنام لو ناس مرضى بطل هاي السولة

:  بطليني منها لهيني بيج لمن اتعب وانام و الا اضطر التهي اشتغل بالليل..  

:  انت ليش متنام ليش هيج ما تتعب

:  متعود..  بعد سحير ليل...

ضحكت و حضنتني حوطت خصرها وخليت راسي على صدرها..

اعبي ريتي بعطرها عطر اخاف لا بيوم يصير حسرة علي...