براكين الشوق

٦٣

#براكين_الشوق٦٣
#تناقض

يا ديرتي يا ملعب الحب الصبا
حنيتلج والمحب يذكر صاحبه
من شارع لشارع تودينا
ونذكر صغرنا وطيب اهالينا.
و بعالي صوت نصيح
ياخذ حجينا الريح..
يا ديرتي شما نبتعد ما نغترب يا ديرتي
انت حلم من اول ايام العشك
يا ديرتي..

يا ديرتي شما نبتعد ما نفترك
انت حلمنا واول ايام العشك..
يا ديرتي بحضنج ربيت من صغر
يا صورة راسمها الوفى بغصن العمر
يا شذرة حلوة بخد ليالينا
و يبقى الحنين يذكرج بينا..

#منال و العودة للبصرة..
ـــــــــــــــــــــــــــــــ
منال..

الحيرة من ينطلب منك تختار و توكع بين خيارين  و الخيارين صعبات

توكف متصنم متعرف شترد

كرر نفس الطلب..

يعني شكولة صعب والله واني بحيرتي طلع اياس و بشاير تركض وراه تريد تلزمة بس انسل من ايدها و عكبني ورفع ايديه لابوه الي شاله

لاحظت ابد ما استغرب ابوه ليش هو منو يستغرب رضا ووجهة البشوش وحبه و حنانه..
للحظة غرني كل هذا..
اما بشاير حتى مسلمت بسبب رضا معاديها ويبسمرها كلما شافها لذا رجعت ورى و تركتنا..
و دخلت..

اباوع الهم لوحة.. انرسمت بعيوني..
اياس وهو بين ايدين ابوه

رجعت اباوع لبيتي التزاماتي

: رضا الموضوع مو سؤال جواب احنا ما عدنا امتحانات.  

رضا: بالعكس الحياة امتحان  يحدد مستقبل.
مثل الطالب شلون يجد بدراسته ياخذ استحقاقة بيهم يتفوق بيهم يجيب ع كد دراسته معدل بيهم يعيد سنه

هي هيج الحياة بتجاربها وانت لحد الان تمتحنين وترسبين لدرجة  استحقيتي يترقن قيدج

ركزت بكلامه و فهمته.. 
من الوكفة نقزة بكلياتي و مرة بالكبد احس جسمي كله يومية الم بمكان..

ماكو مكان محدد..

: بس نسيت شغلة يكدر يمتحن خارجي و يكمل المسيرة من غير قيود المدرسة ولا سيطرة المدرس يدرس هو والكتب وبالبيت يروح بس لمن يمتحن

: اي والقصد؟
: منال مثل ما دخلتها حياتك صعب ترقن قيدها.   لأن هي تتغلغل هنا بين ضلوعك لو شكد ما تعرف قبلي ووراي من نسوان منال هنا تنبض يا رضا.

تقدمت لافة عباتي زين.. و خليت ايدي على كلبه و بتحدي كتله

: اني هنا هي نفسي منال الي ظليت طول عمرك تتمنى تنولها ونلتها بس بقت نجمة هي يم الهلال بس صعب تنجمع بيه منال هي صعب المنال.. 
منال هي التزام بلي تحت مسؤوليتها

منال هي تعشقك بس اكو امور اوجب من الحب بالحياة.
و ياما ياما حاولت افهمك ظروفي صعبة مكدر التزم وياك التزام كلي بس انت مسمعت..
و اعتبرته تحدي و من تزوجنا بديت تنصدم بواقع اني وياك خطين متوازي صعب نلتقي
بس التقينا بنقطة زاوية واخر شي فصلنا  قطعه مستقيم..