ICY : Sugar Free Ice Cream

Black Sheep? - 2

ကျောင်းချိန်က မနက်ခြောက်နာရီခွဲကနေ စတင်သည်။ ရှစ်နာရီမှာ မုန့်စားခဏဆင်းပြီး ကိုးနာရီကနေ ညနေလေးနာရီအထိ တောက်လျှောက်။

မြန်မာစာကလွဲပြီး ဘာသာရပ်တိုင်းကို အင်္ဂလိပ်လို သင်ကြားရမှာ ဖြစ်တာကြောင့် စိတ်လှုပ်ရှားနေသည်။

အရေးကြီးဆုံးကတော့ ပတ်၀န်းကျင်အသစ်၊ နေရာအသစ်မှာ။ သိကျွမ်းတဲ့သူ တစ်ယောက်မှမရှိဘူးဆိုတဲ့ အသိစိတ်နဲ့ ဘာကိုကြောက်လို့ကြောက်ရွံ့မိမှန်းလည်း မသိ။

သေချာတာကတော့ သူ့ဘက်ကအရင် ဘယ်သူ့ကိုမှ ခင်မင်ရင်းနှီးလာအောင် မိတ်ဖွဲ့မှာ မဟုတ်ဘူးဆိုတာ။

ပထမဆုံးစာသင်ရက်မို့ ဆရာက ဘယ်ကျောင်းက ပြောင်းလာကြတာလဲ မေးမြန်းနေသည်။ သူ့ကျောင်းနာမည်ပါလာတော့ မတ်တပ်ရပ်လိုက်သည်။

အရှေ့ဆုံးတန်းက ကောင်မလေး၊ နောက်ဆုံးတန်းက ကောင်မလေးနဲ့ သူ့ရှေ့ခုံက ကောင်လေးတစ်ယောက်ပါ မတ်တပ်ရပ်ကြသည်။

ခက်တာက သူတို့က ရင်းနှီးဖော်ရွေစွာ ပြုံးပြလာပေမဲ့ တစ်ယောက်ကိုမှ သိမနေ။ ပြန်ထိုင်ခိုင်းတာနဲ့ ခေါင်းသာငုံ့နေလိုက်သည်။

နေ့လယ်ထမင်းစားချိန်ကို အိမ်မပြန်ပဲကျောင်းနဲ့နီးတဲ့ မမရဲ့အိမ်မှာပဲ ဘွားဘွားနဲ့ သွားစားလိုက်၏။ မမကတော့ တက္ကသိုလ်ကျောင်းသူဖြစ်တာကြောင့် ကျောင်းကပြန်မလာသေး။

အတန်းပြန်အရောက်မှာတော့ သူ့ခုံနေရာမှာ ကျောင်းသားတစ်ယောက်၀င်ထိုင်နေသည်။

ခုံလုရမယ့်အရွယ်လည်း မဟုတ်၊ အနောက်ခုံကလည်း နှစ်ယောက်ပဲ ရှိတာကြောင့် နေရာပြောင်းထိုင်လိုက်သည်။