ICY : Sugar Free Ice Cream

Bad Attitude - 46

သူငယ်ချင်းတွေနဲ့ နေ့လယ်စာအတူစားပြီးမှ အန်တီ့ဆီသွားဖို့ စီစဉ်လိုက်သည်။ မွန်မြတ်သန့်စင်ရဲ့စိတ်ဖိစီးမှုကို ဖြေလျော့တဲ့နည်းလမ်းထဲမှာ အစားနဲ့စကားလည်း ပါဝင်တာကြောင့်။

မာလာရှမ်းကောစားမှာမို့ မြတ်နိုးက အသားနဲ့ပင်လယ်စာတို့ကို ရွေးချယ်နေပြီး ရတီက အသီးအရွက်တွေ ရွေးနေသည်။

" သုံးထပ်သားစားမှာမလား... "

" ငါက ကြက်သားနဲ့ပုဇွန်ပဲစားမှာ.. ခြေလေးချောင်းသားမစားဘူး... "

" နင်ကလေ မသိမသာနဲ့ လွှမ်းမိုးခြင်းခံနေရတာသိလား... "

" သိတယ်.. အန္တရာယ်မရှိလို့ ငါ့စိတ်ငါလွှတ်ပေးထားတာ.. နင်စားချင်ရင်စားလေ.. အသားဖတ်ဖယ်စားလိုက်မယ်... "

" စိတ်ကုန်... "

ဘာမှပြန်မပြောပဲ ရယ်သာနေလိုက်သည်။ မြတ်နိုးက ကြက်သားနဲ့ပုဇွန်နည်းနည်း ထပ်ထည့်ပြီးနောက် ပိုက်ဆံရှင်းပြီး သုံးယောက်သား ဆိုင်အပေါ်ထပ် တက်လာလိုက်သည်။

ကိုကို့ဆီ textပို့ဖို့လဲ မမေ့လျော့ပေ။ Onlineမဖြစ်ပေမယ့် နေ့လယ်စာစားပြီးတာနဲ့ ကိုကို့မေမေ့ဆီသွားမည့်အကြောင်း စာပို့ထားလိုက်သည်။

Outfitအနေနဲ့က စဉ်းစားလေခေါင်းကိုက်လေမို့ ရိုးရိုးရှင်းရှင်း Hawaii Collar Shirtနဲ့ Jeans Pantsတစ်ထည်သာ မြန်မြန်ရွေးလိုက်၏။ စိတ်တည်ငြိမ်သွားတော့လဲ သိပ်အများကြီးမတွေးမိပဲ ကိုယ့်fashionကို သဘောကျရသည်။

" နင့်ဖုန်းသိမ်းလိုက်တော့... "

" အွန်းပါ... "

ကိုကို့ဆီကို မနက်ကရိုက်ထားတဲ့ Selfieပုံကို ပို့လိုက်ပြီးနောက် ဖုန်းကို ပိုက်ဆံအိတ်ထဲ ထည့်လိုက်သည်။ နောက်တော့ တောင်စဉ်ရေမရ၊ အဆက်အစပ်မရှိတဲ့အကြောင်းအရင်းတွေ ပြောကြားရင်းပဲ စကားဝိုင်းဟာ စည်ကားသွားရတော့သည်။