ICY : Sugar Free Ice Cream

Self-Control - 15

ဖြစ်ပြီးသွားတဲ့ကိစ္စကို တသသပြန်တွေးပြီး ကိုယ့်စိတ်ကို ဒုက္ခပေးနေလို့ မဖြစ်မှန်းသိပါသည်။ သိပေမဲ့လည်း မှန်ထဲက ကိုယ့်ပုံစံကိုကြည့်ပြီး စိတ်ပျက်ရလွန်းလို့ လူနဲ့စိတ်နဲ့ပင် မကပ်ချင်။

" ဘယ်သူလုပ်တာလဲ.. ကိုယ့်ဟာကို လုပ်တာလေ.. ကလစ်နဲ့အပေါ်လှန်သိမ်းထားလိုက်... "

ခုနတုန်းက မေမေက မီးပူတိုက်ပေးမယ်ဆိုပြီး လျှော်ထားတဲ့အ၀တ်အစားတွေ လာယူသွားသည်။ အခန်းတံခါးပြန်ပိတ်မသွားတာကြောင့် ပွင့်နေတဲ့တံခါးပေါက်ကနေ မမက တဟီးဟီးရယ်မောရင်း လာစနေသည်။

စနေတာကို စိတ်ဆိုးနိုင်ပဲ ဘာတစ်ခွန်းမှ မတုံ့ပြန်နိုင်တဲ့အခြေအနေမှာ။ တကယ့်ကို Soulless Dollလေး ဖြစ်နေတာ။

အကြောင်းအရင်းကတော့ အများသူငှာ တွေ့ကြုံနိုင်ဘူးလောက်မယ့်ကိစ္စပါပဲ။ ကိုယ့်ဟာကို လှမယ်ထင်ပြီး Bangအညှပ်လွန်သွားခြင်း။

အရှေ့ဆံပင်က နဖူးတစ်၀က်မှာ ဖရိုဖရဲကျဆင်းနေရှာသည်။ ပင်ကိုဆံပင်သားက ဖြောင့်စင်းအိစက်နေတာမဟုတ်ပေမဲ့ ကောက်ကောက်ကွေးကွေးလည်း မဟုတ်။ သိပ်ထွေထွေထူးထူးလုပ်စရာမလိုပဲ သူ့ဟာနဲ့သူ ပုံစံကျသည်။

မေမေ ပြောတာကတော့ ငယ်ငယ်တုန်းက အုန်းဆီတွေ တခေါင်းလုံးရွှဲအောင် လိမ်းပေးထားလို့ဆိုလား။

" စိတ်ဆင်းရဲလိုက်တာ... "

Short Bob Hairကို လက်နှစ်ဖက်နဲ့ ရှုပ်ပွနေအောင် ဖွမိတော့သည်။ ငယ်ရွယ်တုန်း ဆံပင်အတိုထားရတာ ညှပ်သာညှပ်ဆိုပြီး အားပေးသူက အိမ်ကအဒေါ်။ သူကိုယ်တိုင်ကတော့ ဂုတ်ဝဲသာသာ ဆံပင်လေးနဲ့။

တော်ပါပြီ။ ကိုယ့်သဘောနဲ့ကို ညှပ်ပြီးကာမှ ဘယ်သူ့မှလည်း တရားခံမရှာချင်ပါဘူး။ အရှေ့ဆံပင်ကလည်း ကိုယ့်ဟာကို ကတ်ကြေးကောင်းမကောင်း စမ်းကြည့်တာပါပဲဆိုတော့ ကြေကွဲနေလည်း ဘာမှမထူးတော့ပါဘူး။