ICY : Sugar Free Ice Cream

What If Love - 8

ပုံမှန်အားဖြင့် စာကြည့်ပြီးတာနဲ့ ဖုန်းမသုံးတော့ဘဲ အိပ်ရာဝင်လေ့ရှိသည်။ ဒီနေ့လည်း အိပ်ဖို့ကြိုးစားပေမဲ့ အခန်းမီးပိတ်ပြီးမှပဲ Requestပို့ထားတာ ငါးရက်တိတိရှိသွားပြီ ဆိုတာကို သတိရသွား၏။

သူ့ဘက်က ပြန်Cancelသွားမှာမျိုး အဖြစ်မခံနိုင်တာနဲ့ Friend Requestကို ညဆယ့်တစ်နာရီကျော်မှာပဲ လက်ခံဖြစ်သွားသည်။

တက္ကသိုလ်တက်ကတည်းက ညဆယ်နာရီဆိုတာနဲ့ အိပ်ရာဝင်တဲ့အကျင့် လုပ်ထားသည်။

အကြောင်းကတော့ ညဘက်လူခြေတိတ်ချိန်ကို သိပ်သဘောမကျတတ်လို့။ အထီးကျန်သလို ခံစားရပြီး အခုလို ရူးကြောင်ကြောင် လုပ်ရပ်တွေ လုပ်တတ်လို့ဖြစ်သည်။

အခုမှတော့ ထူးမနေတော့။ သန်းခေါင်ထက် ပိုပြီးလည်း ညဥ့်မနက်တော့ပါဘူး။ သူကလည်း အခုအချိန်ထိ Activeဖြစ်နေစဲ။

လက်ကယောင်မှားပြီး မဆိုင်တာတွေ မထိမိဖို့ကြိုးစားရင်း သူ့accountထဲ ၀င်ကြည့်လိုက်၏။

အခုက Marchလ ပထမပတ်ထဲမှာဆိုပေမဲ့ သူ့accountမှာ ပထမဆုံးတွေ့ရတဲ့ပိုစ့်ကတော့ Happy New Yearဆိုတဲ့ Captionနဲ့ သူ့ဓာတ်ပုံသာဖြစ်သည်။

New Yearကို ကျိုက်ထီးရိုးတောင်ပေါ်မှာ ဘုရားဖူးရင်း ဖြတ်သန်းခဲ့တယ်ထင်သည်။ ဓာတ်ပုံထဲက သူ့ပုံစံက ပုဆိုးနဲ့ရှပ်အင်္ကျီနဲ့ သန့်ပြန်လို့နေ၏။ မြင်လိုက်ရတာနဲ့ သဘောကျစရာလည်း ကောင်းသည်။

ဘုရားမှာကပ်လှူဖို့ ရွှေသင်္ကန်း၀ယ်ရင် ရလေ့ရှိတဲ့ ရင်ထိုးတံဆိပ်ကို အင်္ကျီမှာ တွယ်ချိတ်ထားပြီး အဲဒီတံဆိပ်ကို လက်ညှိုးထိုးရင်း မျက်နှာအနည်းငယ်မော့ကာ ပြုံးရယ်နေတဲ့ပုံလေး။