ICY : Sugar Free Ice Cream

Self-Love - 30

မန္တလေးဘက်ကလာလျှင် အင်းဝတံတားရဲ့ ဘယ်ဘက်‌ခြမ်းမှာ တည်ရှိတဲ့ သပြေတန်းခံတပ်ရဲ့ ဆောင်းမနက်ခင်းဟာ လွမ်းဆွေးစရာအတိလို့ ထင်မြင်မိသည်။

သို့ပေမဲ့ ထင်မြင်ယူဆချက်ဟာ ထင်မြင်ယူဆချက်သက်သက်ပဲပေါ့။ အခုလိုမျိုး လုံခြုံနွေးထွေးတဲ့ ရင်ခွင်ကျယ်ကြီးထဲမှာ ရှိနေမှတော့ လွမ်းဆွေးချင်တဲ့ စိတ်ခံစားချက်ကို ဘယ်မှာရှာလို့တွေ့နိုင်မှာလဲ။

ခန္ဓာကိုယ်တစ်ခုလုံး ရင်ခွင်ထဲမှာ နစ်မြုပ်နေတာကိုပင် မကျေနပ်နိုင်ပဲ တင်းတင်းကြပ်ကြပ်ပွေ့ဖက်လာတဲ့ ကိုကို့ကြောင့် အေးစိမ့်စိမ့်လေညင်းတို့ တိုက်ခိုက်နေသည့်တိုင် ခန္ဓာကိုယ်ကတော့ နွေးထွေးနေရ၏။

အတွေးနဲ့အတူ အသံထွက်ရယ်မောမိတော့ ကိုကိုက ဘယ်ရယ်တာလဲ မေးလာပြီး နားရွက်အောက်နားကို ဖိကပ်နမ်းရှိုက်လာသည်။

" ဟင်.. ဘာလို့ရယ်တာလဲ... "

" ဒီအတိုင်းပဲ.. စိတ်ထဲမှာ နေလို့ကောင်းလို့... "

" ဒီတစ်လနှစ်လအတွင်း.. Baby ပိန်သွားတယ်... "

" Shamingလုပ်တာပေါ့လေ... "

" မဟုတ်ဘူးလေ.. ဟိုရက်တွေက နေသိပ်မကောင်းဘူးမလား.. အခုရော စိတ်လည်းနေကောင်း.. လူလည်းနေကောင်းပြီမလား... "

သေချာမပြောတတ်ဘူး။
ကောင်းတယ်လို့တော့ ထင်ပါတယ်။

ကိုကို့ကို ဘာမှပြန်မပြောပဲ ဧရာဝတီမြစ်ပြင်ကျယ်ကိုသာ ငေးကြည့်နေလိုက်သည်။ ကြာကြာတော့ မငေးလိုက်ရ၊ ကိုကိုက ပါးနှစ်ဖက်ကို လက်ဖဝါးနှစ်ဖက်နဲ့ ထိကပ်ထားရင်း နဖူးချင်းထိလိုက်တာကြောင့်။

" ဘာလဲ... "

" အလုပ်တွေအရမ်းကြိုးစားနေတယ်လို့.. ကိုထူးသန့်စင်ကပြောတယ်.. ပိုက်ဆံရှာပြီး ကောင်လေးကို အမ်းမလို့ဆို... "