ICY : Sugar Free Ice Cream

Yellow Card - 50

ပုံမှန်ဆိုရင် ဒီလိုအခြေအနေမျိုးကို ရှက်ရွံ့မိမှာ အသေအချာ။ အပိုတွေလုပ်လွန်းတယ်၊ ပိုက်ဆံဖြုန်းတယ်လို့တော့ ကဲ့ရဲ့မှာမဟုတ်။ ရင်ခုန်စိတ်လှုပ်ရှားစရာကောင်းတယ်လို့ မတွေးမိမှာတော့ ဧကန်ပင်ဖြစ်သည်။

အိမ်တံခါးဖွင့်လိုက်တာနဲ့ လျှောက်လမ်းမှာ ဖြန့်ကျဲထားတဲ့ နှင်းဆီပန်းပွင့်တွေ၊ စားပွဲခုံပေါ်က နှင်းဆီပန်းအိုး၊ လှေကားလက်ရန်းမှာ ဆင်ယင်ထားတဲ့ ပန်းပွင့်တွေနဲ့ အခန်းတွင်းအခြေအနေက ရိုးရိုးရှင်းရှင်းနဲ့ ကြည်နူးစရာအတိ။

မိန်းကလေးဆို ပန်းကြိုက်ရမယ်ဆိုတဲ့အထဲမှာ ငါမပါဘူး ပြောခဲ့ဘူးသည်။ အခုတော့ မြင်နေရတဲ့ အိမ်အတွင်းပိုင်းအပြင်အဆင်နဲ့အတူ၊ လက်ဝယ်ရရှိထားတဲ့ နှင်းဆီပန်းစည်းကို သဘောကျနှစ်ခြိုက်လွန်းလို့ တစ်ခုခုတော့ မှားယွင်းနေပြီတွေးမိတဲ့အထိ။

" ကြိုဆိုပါတယ်... "

" ကျေးဇူးတင်ပါတယ်... "

သင်းပျံ့နေတဲ့ နှင်းဆီပန်းရနံ့တို့ကို ရှုရှိုက်ရမယ့်အစား ပန်းစည်းပေးတဲ့အစ်ကိုကြီးရဲ့ လည်တိုင်ကိုသိုင်းဖက်ပြီး ပါးပြင်နှစ်ဖက်ကိုသာ နမ်းရှိုက်ပစ်လိုက်သည်။

" လေဆိပ်ထဲမှာတုန်းကမပေးပဲ... "

" ပေးဖို့ပဲ.. ပျာယာခတ်ပြီး ပန်းစည်းက အိမ်မှာမေ့ခဲ့တာ... "

အော်... ငါ့ကောင်မလေးက မကြိုက်လောက်ဘူးထင်လို့ မပေးတာမဟုတ်ဘဲ မေ့ခဲ့လို့ပေါ့လေ။ အတွေးနဲ့အတူ နှုတ်ခမ်းစူမိသွားတော့သည်။

" ကောက်ပြီကွာ... "

" ကောက်မှာပဲ... "

ခြေဖျားထောက်ပြီး နဖူးချင်း ခပ်ဖွဖွတိုက်ပစ်ဖို့ကြံရွယ်လိုက်သော်လည်း ကိုကိုက သိသိသာသာ ရှောင်ဖယ်လိုက်တာကြောင့် ပုခုံးကိုသာ မိမိရရကိုက်ပစ်လိုက်သည်။