ICY : Sugar Free Ice Cream

The Crescent Moon - 41

နှစ်နှစ်ဆိုတဲ့အချိန်ကာလအတောအတွင်းမှာ ထင်မှတ်မထားလောက်အောင်ပဲ ချစ်ခြင်းမေတ္တာကို ယုံကြည်သက်ဝင်လာရသည်။ ကိုယ့်ကိုယ်ကိုယ်လည်း ဒီလောက်တောင်ချစ်ပေးနိုင်ပါလားဆိုပြီး အံ့ဩယူရတဲ့အထိ။

ပထမဆုံးအကြိမ် ကော်ဖီဆိုင်တံခါးကို ဖွင့်ပေးလာတုန်းက ဖြစ်ပေါ်လာခဲ့တဲ့ ခံစားချက်တွေဟာလည်း မပြောင်းမလဲ တည်ရှိ‌နေသေးသည်။

ချစ်ပါတယ်ဆိုပြီး ဖွင့်ဟပြောလာတုန်းက အချစ်စိတ်တွေကလဲ အခုအချိန်မှာပိုလို့ပင် များပြားနေပြီဖြစ်သည်။ အချိန်ကြာလာတာနဲ့အမျှ ရင့်ကျက်တဲ့ချစ်ခြင်းတရားကို ကူးပြောင်းနေပြီဟု ခံစားရပါသည်။

ကိုယ့်အတွက်ဆိုတာထက် ကိုကိုအဆင်ပြေဖို့နဲ့ ကိုကို့ရဲ့ပျော်ရွှင်မှုကိုသာ ဦးစားပေးကြောင်း၊ အတူရှိခွင့်မရလည်း ချစ်နေခွင့်ရတာနဲ့တင် ကျေနပ်ရတဲ့အကြောင်း။

" ဟိတ်.. အရှေ့ကို သေချာကြည့်ပြီးလမ်းလျှောက်မှပေါ့ကွ... "

ကားကွင်းထဲမှာဖြစ်တာကြောင့် ကားငှားဦးမလား၊ ဘယ်သွားမှာလဲဆိုတဲ့ စကားသံတွေနဲ့အတူ ပတ်ဝန်းကျင်ကလည်း အနည်းငယ်ရှုပ်ယှက်ခတ်နေသည်။

လက်ထဲမှာက်ိုင်ထားတဲ့ ကျောပိုးအိတ်တစ်လုံးနဲ့ လက်ဆွဲအိတ်ခပ်သေးသေးတစ်လုံးကို ကိုကိုက အဝေးပြေးကားပေါ်က ဆင်းတာနဲ့ ချက်ချင်းလက်လွှဲယူလိုက်ပြီး ညာဘက်လက်ဖဝါးကို မလွှတ်တမ်းဆုပ်ကိုင်ထားကာ ခပ်သွက်သွက်လမ်းလျှောက်သည်။

ကိုကို့မျက်နှာကို မော့ငေးနေရင်း ခေါ်ဆောင်ရာကိုလိုက်ပါနေတာကြောင့် ပခုံးစွန်းကို အန်တီတစ်ယောက်နဲ့ တိုက်မိသွား၏။ ဒါကြောင့် အရှေ့ကိုသေချာကြည့်ဖို့ ပြောလာပြီး လက်ဖဝါးကိုလွှတ်ကာ ပုခုံးကနေ ဖက်လာတော့သည်။