ICY : Sugar Free Ice Cream

Extra - 11

ကိုကြီးနဲ့စကားပြောဖြစ်အပြီး မွန်မြတ်သန့်စင်ရဲ့စိတ်အခြေအနေဟာ အင်မတန်မှ နူးညံ့သိမ်မွေ့နေ‌ပြီး မြင်မြင်သမျှအရာတိုင်းက ချစ်ခင်နှစ်သက်ဖွယ်ရာဖြစ်နေ၏။

Maddieလေးဟာလည်း သိပ်ကိုမှချစ်ဖို့ကောင်းသည်။ အိမ်နံရံမှာရှိတဲ့ ပန်းချီကားတွေ၊ စားပွဲထက်မှာရှိနေတဲ့ ကိုကိုနဲ့သူမရဲ့ ဓာတ်ပုံတွေ၊ အလှပန်းအိုးနဲ့၊ မျက်နှာကြက်ကမီးဆိုင်းအပါအဝင် အကုန်လုံးက ချစ်စရာအတိပင်။

ဒီလိုမျိုး သူမရဲ့နူးညံ့နေတဲ့စိတ်ကလေးကို ပိုပြီးအသက်ဝင်လှုပ်ရှားသွားအောင် အကောင်းဆုံးပံ့ပိုးပေးပြန်တာကတော့ ညနေပိုင်းမှာ ကိုကို့သူငယ်ချင်းနှစ်ယောက် အိမ်ကိုရောက်ရှိလာပြီး ပါတီအသေးစားလေးကျင်းပဖြစ်ခြင်း။

စားပွဲပေါ်က စားသောက်စရာတချို့၊ ပုလင်းတချို့၊ ဘူးတချို့တို့နဲ့အတူ နူးညံ့တဲ့စိတ်လေးပါ ရောစပ်မိသွားချိန်မှာတော့ ထူးသန့်စင်ဆီကနေ ကိုယ့်ညီမလေးကို နားရင်းအုပ်ချင်လိုက်တာဆိုတဲ့ အကြည့်တွေသာ လက်ခံရရှိနေတော့သည်။

" မောင်နှမတွေထဲမှာ အငယ်ဆုံးတွေက အချောဆုံး အလှဆုံး.. ကိုကြီးနဲ့ငါနဲ့ကို မောင်နှမလို့ပြောရင် ညီမလေးက အလှလေးလို့ပဲ ပြောကြတာ.. အစ်ကိုက ခန့်ချောနော်လို့ ဘယ်သူမှမပြောဘူး.. ဟုတ်တယ်မလား ကိုဘုဏ်း.. Hi five... "

" သူငယ်ချင်းတွေထဲမှာလည်း.. အသက်ငယ်တဲ့ကောင်က အချောဆုံးပဲ ငါ့ကိုကြည့်... "

ကိုဘုဏ်းနဲ့လက်ဖဝါးချင်း မရိုက်ဖြစ်လိုက်ပါ။ ကိုကိုက သူမအစား ကိုဘုဏ်းရဲ့လက်ဖဝါးကို ဖြောင်းခနဲ အသံမြည်အောင်ရိုက်ပစ်လိုက်တာကြောင့်ဖြစ်သည်။

" လူတွေကအရမ်းရက်စက်တာပဲ.. ကြက်ကလေးတွေ သနားစရာကောင်းလိုက်တာ... "