ICY : Sugar Free Ice Cream

Extra - 14

" Goal! "

" ဟာ မဂိုးဘူးကွ.. ဂိုးပြီထင်တာကွာ... "

တစ်ဖက်အသင်းပရိတ်သတ်တွေဆီကနေ ညည်းညူသံတွေထွက်ပေါ်လာတာနဲ့အမျှ ကိုကို့အသင်းသားတွေကလည်း ဂိုးသမားဖြစ်တဲ့ ကိုကိုနဲ့လက်သီးချင်းတိုက်တဲ့သူကတိုက်၊ နောက်ကျောပေါ်ခုန်တက်သူက ခုန်တက်ပြီးနောက် ထောင့်ကန်ဘောအတွက် နေရာယူကြတော့သည်။

ထောင့်ကန်ဘောကို ရှင်းထုတ်နိုင်လိုက်အပြီး သိပ်မကြာခင်မှာပဲ ပွဲသိမ်းခရာမှုတ်သံကြားရပြီး အနိုင်ရရှိသွားတဲ့ မင်းသားပါရှိတဲ့အသင်းက ပျော်ရွှင်စွာနဲ့ပဲ အောင်ပွဲခံကြတော့သည်။

အောင်ပွဲခံပုံကလည်း တကယ်ကြမ်းတမ်းသည်။ Premier League Titleဆုကို ဆွတ်ခူးနိုင်တဲ့ အသင်းကတောင် သူတို့လောက် အောင်ပွဲခံနိုင်မှာမဟုတ်။

အဆိုးဆုံးက ကိုဘုဏ်း။ ကိုကို့နောက်ကျောပေါ်ခုန်တက်လိုက်တာများ၊ ကိုကို့မှာ လဲကျတော့မလို။ ‌ဦးခေါင်းကို ဖတ်ခနဲရိုက်သူရိုက်၊ နောက်ကျောကို ရိုက်သူကရိုက်နဲ့။

သူမမှာတော့ သူတို့အဲ့လိုမျိုး ဝိုင်းအုံဖက်ကြ၊ ရိုက်ကြ၊ ကျောပိုးကြတာနဲ့ ကိုကို ဒဏ်ရာရတော့မှာပဲ အတွေးနဲ့ ‌ရင်ပူလာရသည်။

ဒုတိယပိုင်းအစမှာလည်း ခြေကျင်းဝတ်ကို အကန်ခံရသေးတာ။ အခုကြည့်နေရင်းနဲ့လည်း လမ်းလျှောက်တာက ထော့နဲ့ထောနဲ့ဖြစ်နေသေးတာ။

ဒီလောက်ဖြစ်တာပဲ တော်သေးတယ် တွေးရပါသည်။

Isabellaနဲ့သူမဟာ ပွဲအစကတည်းက ဒဏ်ရာအနာတရဖြစ်မလား စိုးရိမ်စိတ်နဲ့ ရင်တထိတ်ထိတ်နဲ့ ကြည့်နေရတဲ့ နှစ်ယောက်မို့ အခုလို ဒဏ်ရာကင်းစင်မှပဲ အသက်ဝဝရှူနိုင်ကြ၏။