ICY : Sugar Free Ice Cream

Proof - 52

မနက်အိပ်ရာနိုးချိန်ဟာ ငါးနာရီခွဲစွန်းစွန်းသာရှိသေးသည်။ ချက်ချင်းဆိုသလို အတွေးထဲဝင်ရောက်တာက မနေ့ညတုန်းက ကိုကို့ရဲ့ ခရစ္စမတ်လက်ဆောင်ဖြစ်တဲ့ Paletteအသစ်အကြောင်းပင်။

လူတစ်ကိုယ်အကြိုက်တစ်မျိုးဆိုသလို သူမ,ရဲ့ စွဲလမ်းမှုက Eyeshadow Paletteတွေပင်ဖြစ်သည်။ မျက်ခွံထက်မှာ အနုစိတ်ခြယ်မှုန်းရတာကို နှစ်ခြိုက်တာကြောင့် အိမ်ကမှန်တင်ခုံထက်မှာ မသုံးဖူးတဲ့ Palette Brandဆိုတာ ရှားသည်အထိ အမျိုးအစားစုံလင်စွာရှိ၏။

မေမေကတော့ စားလို့လဲမရ၊ ဝတ်လို့လဲမရ၊ သုံးလို့လဲမရတဲ့ အကန့်သေးသေးလေးထဲမှာ ထည့်ထားတဲ့ ဒီအမှုန်‌လေးတွေကို ဘာကြောင့်ပိုက်ဆံပေးဝယ်သလည်း နားမလည်နိုင်ပါတဲ့။

အခုလည်း မနက်စာစားဖို့က်ို အချိန်မပေးအားသေးပဲ လက်ထဲကို ရောက်လာတဲ့ paletteအသစ်ကိုသာ သုံးကြည့်ဖို့စိတ်အားထက်သန်နေသည်။

" ဒါကိုလေ.. အစကတော့ မဝယ်တော့ဘူးစဉ်းစားထားတာ.. reviewတွေထဲမှာ အရောင်လေးတွေက အရမ်းလှနေလို့ မဝယ်လို့မဖြစ်တော့ဘူး တွေးပြန်ရော.. အဲ့တာကြောင့် ခဏသည်းခံလိုက်မယ်.. အိမ်ပြန်ရောက်တဲ့အထိ လိုချင်နေသေးရင်တော့ ဝယ်ဖြစ်အောင်ဝယ်မယ် စိတ်ကူးထားတာ... "

" ဘာလို့သည်းခံမှာလဲ.. လိုချင်နေတာ ဝယ်ရမှာပေါ့... "

" အွန်း.. ဝယ်ချင်တာတွေလျှောက်ဝယ်ထားတာ လက်လွန်သွားလို့လေ.. မဟုတ်ရင် မစဉ်းစားဘူး... "

ကိုကို့အမြင်မှာ အလှအပကို ဦးစားပေးတဲ့သူ၊ အဓိကနဲ့သာမည မခွဲခြားတက်တဲ့သူလို့ အထင်မခံချင်ပါ။

ဒါပေမဲ့လည်း paletteတွေအကြောင်း ပြောပြလို့ရတာ ကိုကိုတစ်ယောက်သာရှိသည်။ မေမေသိလို့မဖြစ်တဲ့ ဈေးနှုန်းဘယ်လောက်ရှိကြောင်းတွေပါ ကိုကို့ကို အကုန်ပြောပြလို့အဆင်ပြေလေသည်။