ICY : Sugar Free Ice Cream

Frangipani - 34

// ကော်ဖီဆိုင်လာခဲ့ //

အံ့ဩစရာပဲ။ သူက ဘယ်တုန်းက ဒီလိုမျိုး အာဏာရှင်ဆန်ဆန် အသုံးအနှုန်းတွေ သုံးတတ်သွားတာလဲ။ ဒါမှမဟုတ်... အခုမှ မျက်နှာဖုံးကွာကျသွားတာလား။

သဘောပဲ ပြောခဲ့ပြီး နာရီပေါင်းတစ်ရာနာရီကျော်တော့မှ ဒီလိုမျိုးပြောလာတာ ဘာသဘောလဲ။ ဘာအကွက်တွေလာရွေ့နေတာလဲ

လာခဲ့ ဟုတ်လား။ စိတ်တိုရလွန်းလို့ သူသာ အနားမှာရှိနေရင် တစ်ခုခုလုပ်မိမှာ သေချာနေသည်။

ဖုန်းကို Airplane Modeလုပ်လိုက်ပြီး အိပ်ရာပေါ်ပစ်တင်လိုက်၏။ စာလုံးလေး ငါးလုံးမြင်လိုက်ရတာနဲ့တင် Auto Aggressiveဖြစ်သွားတဲ့ ကိုယ့်စိတ်ကို ဆန်းစစ်ဖို့လိုပြီ။

လုပ်နေကြအတိုင်း အခန်းအတွင်း လမ်းလျှောက်ရင်း ဒေါသဖြစ်သွားတဲ့စိတ်ကို ဖြေလျော့ရသည်။

စိတ်ပြေသွားချိန်မှာပဲ အခန်းတံခါးခေါက်သံကြားရ၏။ တံခါးဖွင့်လိုက်တာနဲ့ အပြစ်တင်သံလေးကနေ လေလှိုင်းကနေ လွှင့်မြောလာပါပြီ။

" ဖုန်းစက်ပိတ်ပြီး ဘာလုပ်နေတာလဲ.. အိပ်နေတာလား.. အလုပ်မရှိရင် အိပ်ဖို့ပဲစဉ်းစားနေတာပဲ... "

အလုပ်မရှိလို့အိပ်တာပေါ့။
ဒါလေးတောင် အကြီးဖြစ်ပြီးမသိဘူးလား။ တကယ်ပါပဲ၊ စိတ်တိုလာရပြန်ပြီ။

" ငါ့ကို paletteလေး ခဏပေးဦး... "

" မရှိတော့ဘူး.. ကျကွဲသွားတာ... "

" ဟယ် နှမြောစရာကြီး.. နင်ကတော့လေ.. အဲ့တာဆို Foundationခဏပေး.. ငါ့ဟာက ငါနဲ့မလိုက်ပဲ ဖြူနေလို့... "

" ရှိရင် ယူသွား.. မေမေ့ဆီသွားလိုက်ဦးမယ်... "